ޗައިނާއިން ރާއްޖެ އަށް އާ ސަފީރެއް ކަނޑައަޅައިފި

ޗައިނާ އިން ރާއްޖެ އަށް ކަނޑައަޅާފައި ހުރި އެމްބެސެޑަރު ޖަންގް ލިޖޮންގް ގެ ދައުރު ހަމަވިތާ ހަތަރު މަސްދުވަސް ފަހުން އެ ގައުމުން އާ ސަފީރަކު ހަމަޖައްސައިފި އެވެ.

ރާއްޖެ އަށް ޗައިނާ އިން ސަފީރެއްގެ ގޮތުގައި ކަނޑައަޅާފައި ވަނީ ވާން ލިޖިން އެވެ. ނަމަވެސް ސަފީރުގެ ފަތްކޮޅު ރައީސް އިބްރާހީމް މުހައްމަދު ސޯލިހަށް އަރުއްވައިފައެއް އަދި ނުވެ އެވެ.

ޗައިނާގެ އާ ސަފީރު ރާއްޖެ އަށް ރޭ ވަޑައިގެންފައި ވާއިރު، އޭނާ އަށް މަރުހަބާ ދެންނެވީ ފޮރިން މިނިސްޓްރީގެ އެޑިޝަނަލް ސެކްރެޓަރީ ޖާވިދު ފައިސަލާއި ޑެޕިއުޓީ ޗީފް އޮފް ޕްރޮޓޮކޯލް އަހުމަދު މުޖުތަބާ އެވެ.

ވާން ލިޖިން ވިދާޅުވީ ޗައިނާގެ ސަފީރެއްގެ ގޮތުގައި އޭނާ އައްޔަން ކުރުމަކީ ލިބިވަޑައިގަންނަވާ އުފަލެއް ކަމަށެވެ. އަދި ރާއްޖޭގެ ސަރުކާރާއި ރައްޔިތުންނާ ގުޅިގެން، ދެ ގައުމުގެ ދެމެދުގައި އޮންނަ ގުޅުން އިތުރަށް ބަދަހިކުރުމަށް މަސައްކަތް ކުރައްވާނެ ކަމަށް ވެސް ސަފީރު ވިދާޅުވި އެވެ.

ފޮރިން މިނިސްޓްރީގެ ކޮމިއުނިކޭޝަންސް ޑިރެކްޓަރު މިއުވާން މުހައްމަދު "މިހާރު" އަށް އާ ސަފީރުގެ ފަތްކޮޅު ރައީސަށް ވަރަށް އަވަހަށް އަރުވާނެ ކަމަށެވެ.

ވޭތުވެދިޔަ ތިން އަހަރު ޗައިނާގެ ސަފީރެއްގެ ގޮތުގައި ހުންނެވީ މިހާރު ޔޫގެންޑާ އަށް ޗައިނާގެ ފަރާތުން ކަނޑައެޅި ސަފީރު ޖަންގް ލިޖޮންގް އެވެ.

މިދިޔަ އޭޕްރިލްގައި ދައުރު ހަމަވުމުން ބޭއްވި ވަދާއީ ބައްދަލުވުމުގައި ލިޖޮންގް ވިދާޅުވީ ރާއްޖެ އާއި ޗައިނާއަކީ ވެސް ވަރަށް ރަހުމަތްތެރި ދެ ގައުމު ކަމަށާއި، ދެ ގައުމުގެ ސައިޒުގައި ކިތަންމެ ބޮޑު ފަރަގެއް ހުރި ނަމަވެސް، އޮތީ ހަމަހަމަ ގުޅުމެއް ކަމަށެވެ. އަދި މީގެ ކުރިން ދުވަހަކު ނުވާވަރަށް، ދެ ގައުމުގެ ގުޅުން މިހާރު ވަރުގަދަވެފައިވާ ކަން ލިޖޮންގް ވަނީ ފާހަގަ ކުރައްވައިފަ އެވެ.