ތިން ކުއްޖަކަށް ކޮވިޑް ޖެހި މިލަންދޫ އަނެއްކާވެސް ބަންދު

ށ. މިލަންދޫން ތިން ކުއްޖަކާއި ބޮޑު މީހަކު ކޮވިޑް-19 އަށް ޕޮޒިޓިވްވެ އަނެއްކާ ވެސް ރަށް ބަންދުކޮށްފި އެވެ.

އެރަށު ކައުންސިލްގެ ރައީސް އަބްދުﷲ އާތިފް ވިދާޅުވީ އެ މީހުން ޕޮޒިޓިވްވީ ރޯގާގެ އަލާމާތް ފެނިގެން ފްލޫ ކްލިނިކަށް ދެއްކުމުން ނެގި ސާމްޕަލުން ކަމަށެވެ.

ހަތަރު ސާމްޕަލް ޕޮޒިޓިވްވެ ރަށް ބަންދުކުރިއިރު މިވަގުތު އެރަށުގައި އަރިދަފުސް ރޯގާ ވެސް ފެތުރެމުން އަންނަ ކަމަށް އޭނާ ވިދާޅުވި އެވެ.

މިހާރު އެ މީހުންނާ ކޮންޓެކްޓްވި މީހުންގެ ސާމްޕަލް ނެގުމުގެ މަސައްކަތް އަންނަނީ ކުރަމުންނެވެ.

އާތިފް ވިދާޅުވީ ޕޮޒިޓިވްވި ތިން ކުދިންގެ ތެރެއިން ދެ ކުދިންނަކީ ސްކޫލުގައި ކިޔަވަމުން އަންނަ ދެ ކުދިންނަށް ވާތީ، އެ ކުދިންނާ އެއް ކްލާހުގައި ކިޔަވާ ކުދިންގެ ގެތައް ވެސް ކަރަންޓީނުކުރަން ނިންމާފައިވާ ކަމަށެވެ.

ސްކޫލު ބަންދުކޮށް ރަށަށް އަރައި ފޭބުން މަނާކުރި ނަމަވެސް މާސްކް އަޅައިގެން ރަށުގައި އުޅޭ މީހުންނަށް ބޭރަށް ނުކުމެވޭނެ އެވެ. އަދި ގައިދުރުކަމާ އެކު މާސްކް އަޅައިގެން މިސްކިތުގައި ޖަމާއަތް ހެދޭނެ އެވެ.

އާތިފް ވިދާޅުވީ ބަލިން ރައްކާތެރިވުމަށް ވިޔަފާރިތަކުން އަމަލުކުރުމަށް އެޗްޕީއޭ އިން ނެރެފައިވާ އުސޫލާ އެއްގޮތަށް ވިޔަފާރިތައް ވެސް ހިންގޭނެ ކަމަަށެވެ.

މިއީ މިލަންދޫ ބަންދުކުރި ތިން ވަނަ ފަހަރެވެ. ކުރިން ވެސް ދެ ފަހަރަކު ރަށުން ކޮވިޑް ފެނިގެން ބަންދުކުރަން ޖެހުނެވެ.

ކޮވިޑް ފެނިގެން އިއްޔެ ވަނީ ލ. މުންޑޫ ވެސް ބަންދުކޮށްފަ އެވެ. މިއާ އެކު މިވަގުތު މޮނިޓަރިންގައި އޮތް ރަށްތަކުގެ އަދަދަކީ 16 އެވެ.