ޕްރީއޯޑާގެ މައްސަލައިގައި ނަޒާކީގެ އަގުވައްޓާލި ކަމަށްް ބުނެ މީހެއްގެ އަތުން 7.6 މިލިއަނުގެ ބަދަލެއް ހޯދަން ދައުވާއެއް

ނަޒާކީ އޮންލައިންއިނުން ޕްރީއޯޑަރަށް ތަކެތި ގެނެސްދޭން ގިނަ ބައެއްގެ އަތުން ފައިސާ ނެގުމަށް ފަހު މުދާ ވެސް އަދި ފައިސާ ވެސް ނުދޭ ކަމަށް ބުނެ މީހަކު ސޯޝަލް މީޑިއާގައި ކުރި ޕޯސްޓުތަކަކާ ގުޅިގެން 7.6 މިލިއަން ރުފިޔާގެ ބަދަލެއް ހޯދަން އެ ކުންފުނިން ދައުވާކޮށްފި އެވެ.

ނަޒާކީ އޮންލައިންއިން މެދުވެރިކޮށް ޕްރީ-އޯޑާކޮށް، ފައިސާ ދައްކާފައި އެތައް ދުވަހެއް ވީ އިރު ވެސް ތަކެތި ނުލިބޭ ކަމަށާއި އަދި ރީފަންޑް ވެސް ނުދޭ ކަމަށް ބުނެ ބައެއް ކަސްޓަމަރުން ސޯޝަލް މީޑިއާގައި ޝަކުވާކުރަން ފެށީ މިދިޔަ އަހަރުގެ ފަހު ކޮޅު އެވެ. އެ މައްސަލަ ބައެއް މީހުން ފުލުހަށް ވެސް ހުށަހެޅި އެވެ. މީހުން ޕްރީއޯޑާ ކުރި ސާމާނުގެ ތެރޭގައި ފަރުނީޗަރާއި އިލެކްޓްރޯނިކްސްގެ އެކި ބާވަތްތައް ހިމެނެ އެވެ.

އެ މައްސަލާ ގުޅިގެން ޓްވިޓާ އަދި ފޭސްބުކްގައި ނަޒާކީއާ ދެކޮޅަށް ޕޯސްޓު ކުރި ހ. ފޭރުވާދީ، އައިޝަތު މާވީ އަތުން ބަދަލުގެ ގޮތުގައި 7،667،100ރ. ހޯދަން ނަޒާކީ ސާވިސަސް ޕްރައިވެޓް ލިމިޓެޑުން ވަނީ ސިވިލް ކޯޓުގައި ދައުވާކޮށްފަ އެވެ.

އެ މައްސަލައިގައި ނަޒާކީގެ ފަރާތުން ބުނެފައި ވަނީ، މާވީ މަސައްކަތްކުރީ ނަޒާކީއަށް އާންމުން ކުރާ އިތުބާރު ގެއްލުވާލައި އެ ކުންފުނީގެ އޮންލައިން ވިޔަފާރި ހުއްޓުވާލަން ކަމަށެވެ. އަދި އޭނާ މަސައްކަތްކުރީ ކުންފުނީގެ ހިއްސާދާރުންގެ އަބުރާއި ޝަރަފު ގެއްލުވާލަން ކަމަށެވެ.

މާވީގެ ޕޯސްޓުތަކުގެ ނަތީޖާއެއްގެ ގޮތުން، ކުންފުންޏާއި ކުންފުނީގެ ހިއްސާދާރުންގެ އަގު އާންމުންގެ ކުރިމަތީގައި ވެއްޓި، ކުންފުނިން ޕްރީއޯޑާކޮށްފައިވާ ފަރާތްތަކުން މުއާމަލާތްތައް ބާތިލުކޮށް ރިފަންޑަށް އެދުނު ކަމަށް އެ ކުންފުނިން ބުނެފައިވެ އެވެ.

މިހާރު ސިވިލް ކޯޓުގައި ކުރިއަށްދާ މި މައްސަލައިގައި މާވީގެ ފަރާތުން ވަނީ، އޭނާ ދައްކާފައި ވަނީ "ނަޒާކީ އޮންލައިން" ކިޔާ ބައެއްގެ ވާހަކަ ކަމަށާއި އެއީ ރަޖިސްޓްރީކޮށްފައިވާ ވިޔަފާރިއެއް ނޫން ކަމަށެވެ. އެހެންވެ ނަޒާކީ ސާވިސަސް ޕްރައިވެޓް ލިމިޓެޑަށް އެ މައްސަލާގައި ދައުވާކުރުމުގެ ހައިސިއްޔަތު ނެތް ކަމަށް ބުނެ އިޖުރާއީ ނުކުތާއެއް ނެގި އެވެ.

ނަމަވެސް، ނަޒާކީ އޮންލައިނަކީ ނަޒާކީ ސާވިސަސް ޕްރައިވެޓް ލިމިޓެޑުން ހިންގާ ވިޔަފާރިއެއް ކަމަށް އެ ކުންފުނިން ބުނެފައިވާތީ، މިދިޔަ ހޯމަ ދުވަހު ގާޒީ އަލީ ނަސީރު ނިންމެވީ އެ އިޖުރާއީ ނުކުތާ އަކީ މައްސަލަ ކުރިއަށް ނުގެންދެވޭނެ ވަރުގެ ސަބަބެއް ނޫން ކަމަށެވެ.

ނަޒާކީން މީގެ ކުރިން "މިހާރު" އަށް ބުނެފައިވާ ގޮތުން ވިޔަފާރިއަށް ބޮޑެތި ހުރަސްތަކެއް ކުރިމަތިވެ ޕްރީއޯޑާކުރި ތަކެތި ގަޑިއަށް ފޯރުކޮށްނުދެވުނީ ކޮވިޑްގެ ބަލިމަޑުކަމުގެ ސަބަބުން ކުރިމަތިވި ހުރަސްތަކާ ހެދި އެވެ.

އެގޮތުން، ރާއްޖެއަށް ތަކެތި ގެނައުމުގައި ދިމާވި ދަތިތަކާއި ރާއްޖޭގައި ޑޮލަރުގެ އަގު މައްޗަށް ގޮސް ޑޮލަރު ލިބުމަށް ދަތިވުމަކީ އެ ތަކެތި ގެނެސްނުދެވުނު ސަބަބު ކަމަށް އެ ކުންފުނިން ބުނެފައިވެ އެވެ.

ރިފަންޑަށް އެދޭ ކަސްޓަމަރުންނަށް ރިފަންޑު ދޭނެ ކަމުގެ ޔަގީންކަން އޭރު ނަޒާކީން ދިނެވެ.