ވިޔަފާރި ނިންމުމަށް ފަހު ގެއަށް ގެންދިޔަ 1.4 މިލިއަން ރުފިޔާ މާލޭގެ މަގުމަތިން ފޭރިގެންފި އެވެ.
ލިލްމާސް ނަމަކަށް ކިޔާ ކުންފުނީގެ ދަށުން ހިންގާ މަނީ އެކްސްޗޭންޖު ކުރާ ތަނެއްގެ ގިނަ އަދަދެއްގެ ފައިސާ ފޭރުނީ މިދިޔަ ހޯމަ ދުވަހުގެ ރޭ ވިޔަފާރި ނިންމުމަށް ފަހު، އެ ތަނުގެ ވެރިމީހާ ގެ ގެ އަށް އެ ފައިސާތައް ހިފައިގެން ގެންދިޔަ މަގުމަތީގަ އެވެ.
އެކަމުގެ މައުލޫމާތު އެނގޭ މީހަކު "މިހާރު" އަށް ކިޔައިދިން ގޮތުގައި އެ ރޭ 10:10 ހާއިރު އެ ފައިސާތައް ދަބަހަށް އަޅައިގެން ވެރިމީހާގެ ގެ އަށް ގެންދިޔައީ އެ ތަނުގައި މަސައްކަތްކުރާ ބިދޭސީ ދެ މީހެކެވެ.
އޭގައި 900،000ރ. އަދި 25،200 އަށް ވުރެ ގިނަ ޑޮލަރު ހުންނާނެ ކަމަށް އޭނާ ބުންޏެވެ. އެއީ، އެ ދުވަހުގެ ވިޔަފާރިން ލިބުނު ފައިދާ އާއި ވިޔަފާރީގައި ބޭނުންކުރަން ބަހައްޓާފައި ހުރި ފައިސާ އެވެ.
"އެ މީހުން ސައިކަލުގައި ދަނިކޮށް ސައިކަލު ކޮއްޕާލީމާ ސައިކަލުން އެ ދެ މީހުން ވެއްޓުނީ. ވެއްޓުނު ގަޑީގައި ވަޅިން ބިރުދައްކާފައި ލާރި ދަބަސް ފޭރިގަތީ ހެންވޭރު ދަނޑު، ޝަވަރުމާ ކައިރީގައި،" އޭނާ ކިޔައިދިނެވެ.
އެކަމާ ގުޅިގެން ފުލުހުންގެ މީޑިއާ އޮފިޝަލަކު މިއަދު ވިދާޅުވީ މާލޭގެ މަގުމަތިން ގިނަ އަދަދެއްގެ ފައިސާތަކެއް ފޭރުނު މައްސަލައެއް ހުށަހަޅާފައިވާ ކަމަށެވެ. އެކަން ތަހުގީގު ކުރަމުން އަންނަ ކަމަށް ވިދާޅުވި ނަމަވެސް އޭގެ އިތުރު ތަފުސީލެއް ނުދެއްވަ އެވެ.
އެކި ކުންފުނިތަކުން ބޭންކަށް ޖަމާކުރަން ގެންދާ ފައިސާތައް ފޭރުމުގެ ހާދިސާތައް ދޭތެރެދޭތެރެއިން ހިނގަ އެވެ. އޭގެ ތެރެއިން ބައެއް މައްސަލަތަކުގައި ތުހުމަތުކުރެވޭ މީހުންނަށް ދައުވާ އުފުލާފައި ވެ އެވެ.
