ކަނާތުގެ ތިން އިނގިލި ރަނގަޅުކުރެވޭނެކަމުގެ އުއްމީދު ކުޑަ: ނަޝީދު

ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާއަށް ފަހު ރަނގަޅަށް ހަރަކާތްނުކުރާ ތިން އިނގިލި މުޅިން ރަނގަޅުވާނެ ކަމުގެ އުއްމީދުކުޑަ ކަމަށް އެ މަނިކުފާނު މިއަދު ވިދާޅުވެއްޖެ އެވެ.

ނެދަލޭންޑްސްގެ ރޮޓާޑަމްގައި ހުންނަވައި ވާޗުއަލްކޮށް ބޭއްވެވި މީޑިއާ ބްރީފިންގައި ނަޝީދު ވިދާޅުވީ އެ މަނިކުފާނުގެ ހާލުކޮޅު މިހާރު ކުރިއަށް ވުރެ މާބޮޑަށް ރަނގަޅު ކަމަށެވެ. ނަމަވެސް ކަނާތްްޕުޅުގެ ތިން އިނގިލި އައްސިވެފައި އޮންނާތީ އެ ތިން އިނގިލި އަދިވެސް ބޭނުން ނުކުރެވޭ ކަމަށް ވިދާޅުވި އެވެ.

"ޑޮކްޓަރުން އެބަ އުއްމީދުކުރޭ އެއަށް ފަރުވާއެއް ލިބިދާނެ ކަމަށް. އެހެން ނަމަވެސް އެއީ އަޅުގަނޑަށް ފެންނަ ތަނުގައި ފަނޑު އުއްމީދެއް،" ނަޝީދު ވިދާޅުވި އެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ވާޗުއަލްކޮށް ނޫސްވެރިންނާ ބަައްދަލުކުރައްވަނީ. ފޮޓޯ: އަހްމަދު އަވްޝަން އިލްޔާސް/މިހާރު.

މިދިޔަ މޭ މަހުގެ ހަވަނަ ދުވަހު އައިއީޑީއެއް ގޮއްވާލައިގެން ދިން ހަމަލާއަށް ފަހު ނަޝީދަށް ފުރަތަމަ ފަރުވާކުރީ އޭޑީކޭ ހޮސްޕިޓަލްގަ އެވެ. އެ މަނިކުފާނުގެ ފުރާނަ ސަލާމަތްކުރުމަށް ވަގުތުން ކުރަން ޖެހުނު ގިނަ އޮޕަރޭޝަންތައްް އެ ހޮސްޕިޓަލްގައި ކުރުމަށް ފަހު އިތުުރު ފަރުވާއަށް ވަޑައިގަތީ ޖަރުނަމަށެވެ. އެއަށް ފަހު ވަޑައިގެން ހުންނެވީ އިނގިރޭސިވިލާތުގަަ އެވެ.

ނެދަލޭންޑްސްގެ ރޮޓާޑަމް އަށް މިހާރު ވަޑައިގެން ހުންނެވީ މޫސުމަށް އަންނަ ބަދަލުތަކާ ބެހޭ ގޮތުން ބައިނަލްއަަގުވާާމީ ގޮތުން މަޝްވަރާކުރުމަށް ބާއްވާ "ކޮޕް 26" ސަމިޓަށެވެ.

މިއަދުގެ މީޑިއާބްރީފިން ގައި ނަޝީދު ފުރަތަމަ ވެސް ދެއްވީ ސިއްހީ ހާލުކޮޅާ ބެހޭ މައުލޫމާތެވެ. އެ މަނިކުފާނު ވިދާޅުވިގޮތުގައި މިހާރު ޑޮކްޓަރަށް ދައްކަވަން ޖެހިވަޑައިގަންނަވަނީ ކޮންމެ ތިން ހަފްތާއަކުން އެއްފަހަރު އެވެ. ނަމަވެސް އެއް ފަހަރު ޑޮކްޓަރަށް ދެއްކެވުމަށް ފަހު އަނެއް ފަހަރު ދެއްކެވުމާ ދޭތެރޭ ހޭދަވާ މުއްދަތު އިތުރުކުރެވޭނެ ކަމަށް ޑޮކްޓަރުން ލަފާކުރައްވާ ކަމަށް ވެސް އެ މަނިކުފާނު ވިދާޅުވި އެވެ.

"އަޅުގަނޑު ކުރީގައި އުއްމީދުކުރިން ސެޕްޓެމްބަރު ނިމޭހާތާނގައި އަޅުގަނޑަށް ދެވިދާނެކަމަށް. އެެހެން ނަމަވެސް މިހާރު އަޅުގަނޑަށް ލަފާކުރެވެނީ އެއީ އަދި ތަންކޮޅެއް ބޮޑު އުއްމީދެއް ކަމަށް،" ނަޝީދު ވިދާޅުވި އެވެ.

މިއަދުގެ މީޑިއާ ބްރީފިން ނިންމަވައިލައްވަމުން ވިދާޅުވީ ރާއްޖެއަށް ވަޑައިނުގެން ދުވަސްކޮޅަކު ހުންނަވަން ދުވަސްކޮޅެއް ލިބިވަޑައިގެންނެވުމަކީ ބޭއިންސާފެއް ނޫންކަން އެންމެން ވެސް ގަބޫލުކުރާނެ ކަމަށެވެ. ރާއްޖެއަށް އެނބުރި ވަޑައިނުގެން ހުންނަވަން ޖެހިވަޑައިގެންނެވުމަކީ ހިތާމައެއް ކަމަށް ވެސް ވިދާޅުވި އެވެ.