އަންމަޓީގެ ޝަރީއަތް ހެނދުނުން ހަވީރަށް: 42 ދައުވާއިން 20 ދައުވާ އިއްވައިފި

ހުޅުމާލޭގައި ފްލެޓް އިމާރާތްކޮށްދޭނެ ކަމަށް ބުނެ ގިނަ ބައެއްގެ އަތުން ފައިސާ އަތުލި މައްސަލައިގައި ސީ ލައިފް ގްލޯބަލް ކުންފުނީގެ މެނޭޖިން ޑިރެކްޓަރު އަހުމަދު މޫސާ (އައްމަޓީ)ގެ މައްޗަށް އުފުލާފައިވާ 42 ދައުވާގެ ތެރެއިން މިއަދު 20 ދައުވާ ކްރިމިނަލް ކޯޓުގައި އިއްވައިފި އެވެ.

މިއަދު ހެނދުނު 9:30 އަށް ތާވަލުކޮށްގެން ބޭއްވި އައްމަޓީގެ މައްސަލައިގެ އަޑުއެހުމަކީ އޭނާގެ މައްޗަށް އުފުލާފައިވާ ދައުވާތައް ހުށަހެޅުމަށް ބޭއްވި އަޑުއެހުމެކެވެ.

އެ އަޑުއެހުމުގައި ވަނީ އޭނާއާ ދެކޮޅަށް 20 ދައުވާއެއް ހުށަހަޅައިފަ އެވެ. އެ ދައުވާތައް އިއްވައި ނިމުނީ މިއަދު ހަވީރު އެވެ. އައްމަޓީ ވަނީ އެ ހުރިހާ ދައުވާތަކެއް ވެސް ސާފުވެއްޖެ ކަމަށް ބުނެ ހުރިހާ ދައުވާތަކަށް ވެސް އިންކާރުކޮށްފަ އެވެ.

ޕީޖީ އޮފީހުގެ މީޑިއާ އޮފިޝަލު ވިދާޅުވި ގޮތުުގައި ކުރިއަށް އޮތް އަޑުއެހުންތަކުގައި ބާކީ 18 ދައުވާ ވެސް ހުށަހަޅާނެ އެވެ.

މިއަދުގެ އަޑުއެހުމުގައި އައްމަޓީގެ ބަންދު މުރާޖާ ކުރުމާ ބެހޭ ގޮތުން ވެސް ވަނީ ވާހަކަ ދައްކައިފަ އެވެ. ނަމަވެސް އެކަމާ މެދު ގާޒީ ހަސަން ސައީދު ގޮތެއް ނިންމަވާނީ ދެން އޮންނަ އަޑުއެހުމެއްގަ އެވެ.

އައްމަޓީގެ މައްޗަށް އެ ދައުވާތައް ސާބިތުވެއްޖެ ނަމަ 65 އަހަރުގެ ޖަލު އަދަބެއް ކަނޑައެޅޭނެ ކަމަށް ފެންނަ ކަމަށް ޕީޖީ އޮފީހުން ބުންޏެވެ.

އައްމަޓީ ވަނީ ގިނަ ދުވަސްތަކެއް ވަންދެން ތަހުގީގީ އިދާރާތަަކަށް ފިލައިގެން ރާއްޖެއިން ބޭރުގައި އުޅެފަ އެވެ. އޭނާ ހޯދަން 2019 ވަނަ އަހަރު އިންޓަޕޮލް ރެޑް ނޯޓިސް ވެސް ނެރުނެވެ. ލަންކާގެ ފުލުހުން އޭނާ މިދިޔަ ފެބްރުއަރީ މަހު ހައްޔަރުކުރުމުން ޖެހިގެން އައި މާޗް މަހު ދިވެހި ފުލުހުން ވަނީ އެ ގައުމަށް ގޮސް އައްމަޓީ ރާއްޖެ ގެނެސްފަ އެވެ. އޭނާ ކޯޓުގައި ބުނެފައި ވަނީ ފިލައިގެން ނޫޅޭ ކަމަށާއި ލަންކާގައި އުޅުނީ އެ ގައުމުގެ މީހަކާ އިނދެގެން ކަމަށެވެ.

ސީ ލައިފުން ފައިސާ އަނބުރާ ނުދިނުމުގެ ސަބަބުން ގެއްލުންވި މީހުންގެ ތެރެއިން 203 މީހަކު ކޯޓުގައި ދައުވާކުރުމުން ސަރުކާރުން މައްސަލައިގެ ތެރެއަށް ވަދެ، ދައުވާކުރި މީހުންނަށް ބަދަލުދޭން ވަނީ ނިންމައިފަ އެވެ. އެގޮތުން، ފައިސާގެ ބަދަލުގެ އިތުރުން ބޯހިޔާވަހިކަމުގެ މަޝްރޫއަކުން ފްލެޓް ގަތުމަށް އެ މީހުންނަށް ފުރުސަތު ދޭ ގޮތަށް ކޯޓުން ބޭރުގައި މައްސަލަ ވަނީ ނިންމައިފަ އެވެ.