އަފްގާނިސްތާނަކީ އެ ގައުމުގެ ރައްޔިތުންނަށް ރައްކާތެރި އަދި ދުނިޔޭގެ ގައުމުތަކާ ގުޅުން ބަދަހި ގައުމަކަަށް ވުމަށް ޓަކައި އެ ގައުމުގައި ރައްޔިތުން އިންތިހާބުކުރާ ސަރުކާރެއް އޮތުން މުހިއްމު ކަމަށް ރައީސް އިބްރާހީމް މުހައްމަދު ސޯލިހު މިރޭ ވިދާޅުވެއްޖެ އެވެ.
އދ.ގެ އާއްމު މަޖިލީހުގެ 76 ވަނަ ސެޝަނުގައި ތަގުރީރުކުރައްވަމުން ރައީސް މިރޭ ވިދާޅުވީ ދެކުނު އޭޝިއާގެ އަވަށްޓެރި ގައުމެއްގެ ހައިސިއްޔަތުން އަފްޣާނިސްތާނުގެ މިއަދުގެ ހާލަތާ މެދު ކަންބޮޑުވެވަޑައިގަންނަވާ ކަމަށެވެ. އެ ގައުމުގެ ރައްޔިތުންގެ ރައްކާތެރިކަން ކަށަވަރުކުރަން ރާއްޖޭން ބޭނުންވާ ކަމަށާއި އަންހެނުންނާއި އަންހެން ކުދިންގެ ހައްގުތަކާއި، ސަލާމަތާ ހިމާޔަތް އެ ގައުމުގައި އޮންނަން ރާއްޖޭން އެދޭ ކަމަށް ވެސް އެ މަނިކުފާނު ވިދާޅުވި އެވެ.
"މިކަންކަން ހިފެހެއްޓި ކަށަވަރުވެފައި އޮތުމަށްޓަކައި ރައްޔިތުން އިންތިހާބުކުރާ ސަރުކާރެއް އެ ގައުމުގައި އޮތުން މުހިންމު. މި މަގުން ގޮސް އަފްޣާނިސްތާނަކީ ދުނިޔޭގެ ގައުއުމުތަކާ ގުޅުންބަދަހި، ހުރިހާ މާނައެއްގައި ކުރިއަރައިދާ، ސުލްހަވެރި، އަމާން ގައުއުމަކަށް ވެވިދާނެ،" ދިވެހި ބަހުން ތަގުރީރުގައި ރައީސް ވިދާޅުވި އެވެ.
ރައީސް ދެއްކެވި ވާހަކަފުޅަކީ ތާލިބާނުންގެ ބާރުގެ ދަށަށް އަފްޣާނިސްތާން ދިޔަ ފަހުން އެކަމާ ބެހޭ ގޮތުން ދިވެހި ސަރުކާރުން ރަސްމީކޮށްް ދެއްކި ފުރަތަމަ ވާހަކަ އެވެ.
ބައެއް ގައުމުތަކުން ޓެރަރިސްޓް ޖަމާއަތެއް ކަމަށް ކަނޑައަޅާފައިވާ ތާލިބާނުން އަފްގާނިސްތާނުގައި އުފެއްދި ސަރުކާރު ބަލައިގަންނާނެ ކަން ނުވަތަ ނޫންކަން ރާއްޖޭން ރަސްމީކޮށް ހާމަކޮށްފައެއް ނުވެ އެވެ. ހާރިޖީ ދާއިރާގެ މާހިރުން ވިދާޅުވާ ގޮތުގައި ގައުމުތަކުގައި އުފެދޭ ސަރުކާރު ބަލައިގަތުމާއި ނުގަތުމަކީ ރާއްޖޭން ކުރާ ކަމެއް ނޫން ކަމަށެވެ.
