ކޮވިޑުން ދިފާއުވުމަށް ޖަހަން ޖެހޭ ވެކްސިންގެ ދެ ޑޯޒް ޖަހާފައިވާ މީހުންގެ ތެރެއިން ބަލިޖެހުމުގެ ނުރައްކާ ބޮޑުވެދާނެ މީހުންނާއި ފްރަންޓްލައިންގައި މަސައްކަތްކުރާ ސިއްހީ ހިދުމަތް ދޭ މީހުންނަށް ތިން ވަނަ ޑޯޒެއް (ބޫސްޓާ ޑޯޒެއް) ދޭން ނިންމާފައިވާ ކަމަށް އެޗްޕީއޭ އިން މިރޭ ބުނެފި އެވެ.
އެޗްޕީއޭ އިން ދާދި ދެންމެއަކު ކުރި އިއުލާނެއްގައި ބުނީ ބަލިޖެހުމުގެ ނުރައްކާ ބޮޑު މީހުންނަށް ކޮވިޑްގެ ވެކްސިންގެ ބޫސްޓާ ޑޯޒެއް ދިނުމަށް މޯލްޑިވްސް ޓެކްނިކަލް އެޑްވައިޒާރީ ގްރޫޕް އޮން އިމުނައިޒޭޝަނުން އެ އިދާރާ އަށް ލަފާދީފައިވާ ކަމަށެވެ. އަދި މި ލަފާ ދީފައި ވަނީ މިކަމާ ބެހޭގޮތުން މިހާތަނަށް ކޮށްފައިވާ ދިރާސާތަކަށް ބެލުމަށް ފަހުގައި ކަމަށް ވެސް ބުންޏެވެ.
މި ވަގުތު ވެކްސިންގެ ބޫސްޓާ ޑޯޒެއްގެ ގޮތުގައި ޖެހުމަށް ހަމަޖައްސާފައި ވަނީ ފައިޒާ ވެކްސިން އެކަންޏެވެ. މި ޑޯޒް ދޭން ފަށާނީ އަންނަ އާދިއްތަ ދުވަހުން ފެށިގެންނެވެ.
ބޫސްޓާ ޑޯޒެއް ޖަހައިދޭނީ ކޮވިޑްގެ އެއްވެސް ވެކްސިނެއްގެ ދެ ވަނަ ޑޯޒް ޖެހި ފަހުން، ހަ މަސް ދުވަސް ވެފައިވާ ނަމަ އެވެ.
ބޫސްޓާ ޑޯޒް ދިނުމުގައި ބަލާ އިތުރު ކަންކަން
* 60 އަހަރު މަތީގެ މީހުން
* ދިފާއީ ނިޒާމު ބަލިކަށި މީހުން
* ހަށިގަނޑުގެ ގުނަވަނެއް ބަދަލުކޮށްފައިވާ މީހުން
* ހަށިގަނޑުގެ ދިފާއީ ބާރު ދެރަކުރާ ފަދަ ބޭސްތައް ބޭނުންކުރާ މީހުން
* ދިގު މުއްދަތަކަށް ސްޓެރޮއިޑްސް ބޭނުންކުރާ މީހުން
* ގަވާއިދުން ޑަޔަލިސިސް ހަދާ މީހުން
* ކެންސަރަށް ފަރުވާ ކުރާ މީހުންނާއި ފަރުވާ އަށް ފަހު އެއް އަހަރު ނުވާ މީހުން
* އިސްކޮޅާ އަޅާ ބަލާއިރު ބަރުދަން މަތި މީހުން
* އޮކްސިޖަން ތެރެޕީ ނަގާ މީހުން
* ފުއްޕާމޭގެ އެކި ބަލިތަކަށް ފަރުވާ ކުރާ މީހުން
* ފުރަމޭގެ ބައްޔެއްގައި ފަރުވާދީފައިވާ މީހުން
* ހަކުރުބަލީގެ ސަބަބުން ގުނަވަނަކަށް ގެއްލުންވެފައިވާ މީހުން
* ބަލީގެ ސަބަބުން އެނދުމަތިކޮށްފައިވާ މީހުން
އާދިއްތަ ދުވަހުން ފެށިގެން މި ބޫސްޓާ ޑޯޒް ޖަހައިދޭނީ މާލެ ސަރަހައްދުގެ ތިން ހޮސްޕިޓަލަކުންނެވެ. އެއީ އޭޑީކޭ ހޮސްޕިޓަލާއި ހުޅުމާލެ ހޮސްޕިޓަލާއި އަދި ވިލިމާލެ ހޮސްޕިޓަލުންނެވެ.
ރާއްޖޭގައި ކޮވިޑް ވެކްސިން ޖަހަން ޖެހޭ އާބާދީގެ ބޮޑު ބައެއް މިހާރު ވަނީ ވެކްސިން ޖަހައިފަ އެވެ. މިހާރު 3،00،000 އަށް ވުރެ ގިނަ މީހުން ވަނީ ވެކްސިން ފުރިހަމަ ކޮށްފަ އެވެ.
ކޮވިޑްގެ ކޭސްތައް ވެސް ރާއްޖޭގައި ވަނީ އެއްވަރެއްގައި ހިފެހެއްޓިފަ އެވެ. ދުވާލަކު އާންމުކޮށް ޕޮޒިޓީވް ވަނީ 100-200 ދެމެދުގެ މީހުންނެވެ. އޭގެ ތެރެއިން ވެސް ބަލި ހާލު ގޯސްވާ މީހުންގެ އަދަދު ވަރަށް މަދެވެ.