ރާއްޖޭގައި އޮންނަ ވަކި މީހަކު ވަށައި އެނބުރޭ ސިޔާސީ ޕާޓީގެ ނިޒާމް ބަދަލުކޮށްލާނެ ކަމުގެ އުއްމީދާ އެކު އުފައްދާ މޯލްޑިވްސް ނެޝަނަލް ޕާޓީ (އެމްއެންޕީ)ގެ ވަގުތީ ރައީސްގެ މަގާމަށް ދަގެނތީ ދާއިރާގެ މެމްބަރު މުހައްމަދު ނާޒިމް ކުރިމަތިލައްވައިފި އެވެ.
އެ ޕާޓީގެ އިންތިގާލީ ކައުންސިލަށް މެމްބަރުން ކުރިމަތިލާން ހުޅުވާލި މުއްދަތު މިއަދު ހަމަވިއިރު ޕާޓީގެ ރައީސަކަށް ނާޒިމް ފިޔަވައި އިތުރު އެއްވެސް ބޭފުޅަކު ކުރިމައްޗެއް ނުލަ އެވެ. އެހެންކަމުން، އެންއެންޕީގެ ވަގުތީ ރައީސަކަށް އޭނާ މިވަނީ އޮޓޮމެޓިކުން ހޮވިވަޑައިގެންފަ އެވެ.
އެކި ސަރަހައްދުތަކަށް ހާއްސަކޮށް އެ ޕާޓީގެ ހަ ނައިބުން ހޮވާއިރު، މި މަގާމްތަކަށް 9 ބޭފުޅަކު ކުރިމަތިލެއްވި އެވެ.
އެމްއެންޕީއަކީ "އެއް ބޭފުޅަކު ވަށައި އެނބުރޭ" ފިކުރު ދޫކޮށް، އެހެން ސިޔާސީ ޕާޓީތަކާ ހިލާފަށް ހުރިހާ އެންމެނަށް ވެސް ފުރުސަތު ލިބޭ ޕާޓީއެއް ކަމަށް އެ ޕާޓީގެ އިސް މެންބަރުން ވަނީ ވިދާޅުވެފަ އެވެ. މި ޕާޓީގެ ލީޑަޝިޕްގައި އެންމެ ގިނަ ވެގެން ފުރުއްވޭނީ ދެ ދައުރު ކަމަށް އަސާސީ ގަވާއިދުގައި ލިޔާނެ ކަަމަށް ވެސް ވަނީ އިއުލާންކޮށްފަ އެވެ.
ކުރިއަށް އޮތް 2023 ގައި ރިޔާސީ އިންތިހާބުގައި ވާދަ ކުރައްވާނެ ކަމަށާއި އެ އިންތިހާބު ކާމިޔާބުކޮށް ވެރިކަމަށް ވެސް އަންނާނެ ކަމަށް އެ ޕާޓީން ބުނެ އެވެ.
އެމްއެންޕީ އުފައްދަން އިއުލާންކުރިތާ ދެ މަހެއްހާ ދުވަހުގެ ތެރޭގައި 5،000 މީހުން ހޯދައި އިލެކްޝަންސް ކޮމިޝަނަށް ވަނީ ހުށަހަޅައިފަ އެވެ. މަޖިލީހުގެ މެމްބަރުންތަކެއް އިސްވެ ތިބެ އުފައްދަވާ ޕާޓީގެ އަމާޒަކީ މި އަހަރު ނިމޭއިރު 10،000 މެމްބަރުން ހަމަކުރުމެވެ.
