ޑްރަގްގެ ފައިސާ ދޮންނަނީ ފުލުހުންގެ އިދާރާއިން: ޔައުގޫބު

މަސްތުވާތަކެތީގެ ވިޔަފާރިން ހޯދާ ފައިސާ ދޮންނަ ތަނަކީ ފުލުހުންގެ އިދާރާ ކަމަށް ރައްޔިތުންގެ މަޖިލީހުގެ ދާންދޫ ދާއިރާގެ އެމްޑީޕީ މެމްބަރު ޔައުގޫބް އަބްދުﷲ މިއަދު ތުހުމަތު ކުރައްވައިިފި އެވެ.

"ޗޭންޖް އެންޑީއޭ"ގެ ނަމުގައި މަޖިލީހަށް ހުށަހެޅި ޕެޓިޝަން، މަޖިލީހުގެ ޕެޓިޝަން ކޮމިޓީން ދިރާސާކޮށް ނިންމިގޮތުގެ ރިޕޯޓަށް، މަޖިލީހުގެ މިއަދުގެ ޖަލްސާގައި ކުރި ބަހުސްގައި ޔައުގޫބު ވިދާޅުވީ މަސްތުވާތަކެތީގެ ވިޔަފާރިކުރާ ފަރާތްތަކުގެ ހިދުމަތް، ފުލުހުންގެ އިދާރާއަށް ހޯދަމުން ގެންދާ ކަމަށެވެ. އެފަދަ ބައެއް ކަންތައްތައް އެނގިގެން، ފުލުހުންނަށް ރިޕޯޓްކުރައްވާފައި ވާނެ ކަމަށް ވެސް އޭނާ ވިދާޅުވި އެވެ.

އޭނާ ތުހުމަތުކުރެއްވި ގޮތުގައި މަސްތުވާތަކެތީގެ ވިޔަފާރިކުރާ ފަރާތްތަކުގެ ހިދުމަތް ފުލުހުން ހޯދަމުން ގެންދަނީ، އެ ފަރާތްތަކުން އެކުށް ކުރާކަން އެނގިތިބެ ކަމަށާއި އެހީ ހިތާމަހުރިކަމެއް ކަމަށެވެ.

އެހެންވީމާ މިކަންކަމަށް ހައްލު ނުލިބި، އެއްފަޅިން މަސްތުވާތަކެތީގެ ވިޔަފާރިކުރާ މީހުން ހައްޔަރުކުރެވި، އަނެއް ފަޅިން އެމީހުން އެކުރާ މަސައްކަތަށް ބާރުދެވޭ ޒާތުގެ ކަންކަން އެމީހުންނާ އެކީ ކޮންމެވެސް ސިފައެއްގައި ކުރެވެންޏާ ހަގީގީ މާނައިގައި އަޅުގަނޑުމެން މި ބޭނުންވާ ހެޔޮ ބަދަލު ނާންނާނެކަން އަޅުގަނޑު ފާހަގަކުރަން -- ޔައުގޫބް

"ނަތީޖާއަކަށް ވަނީ މަސްތުވާތަކެތީގެ ވިޔަފާރިން ލިބޭ ފައިސާ ދޮންނަން، މަނީ ލޯންޑާ ކުރަން ބޭނުންކުރާ ވަސީލަތަކީ މޯލްޑިވްސް ޕޮލިސް ސާވިސް [އަށް ވުން]،" ޔައުގޫބް ވިދާޅުވި އެވެ.

އޭނާ ވަރަށް ޔަގީންކަމާއި އެކު ވިދާޅުވީ އެކަން އެހެން ހިނގާކަން ފުލުހުންނަށް އެނގި، އެކި އެކި ރިޕޯޓްތަކުގައި ވެސް އެ މައުލޫމާތު ހިމެނިފައިވާ ކަމަށެވެ. އެއީ މީގެ އެތައް އަހަރުތަކެއް ކުރިން ފެށިގެން ހިނގަމުންދާ ކަމެއް ކަމަށް ވެސް އޭނާ ވިދާޅުވި އެވެ.

"އެހެންވީމާ މިކަންކަމަށް ހައްލު ނުލިބި، އެއްފަޅިން މަސްތުވާތަކެތީގެ ވިޔަފާރިކުރާ މީހުން ހައްޔަރުކުރެވި، އަނެއް ފަޅިން އެމީހުން އެކުރާ މަސައްކަތަށް ބާރުދެވޭ ޒާތުގެ ކަންކަން އެ މީހުންނާ އެކީ ކޮންމެވެސް ސިފައެއްގައި ކުރެވެންޏާ ހަގީގީ މާނައިގައި އަޅުގަނޑުމެން މި ބޭނުންވާ ހެޔޮ ބަދަލު ނާންނާނެކަން އަޅުގަނޑު ފާހަގަކުރަން،" ޔައުގޫބް ވިދާޅުވި އެވެ.

މަަސްތުވާތަކެތީގެ ވިޔަފާރިކުރާ މީހުންގެ ހިދުމަތް ފުލުހުން ބޭނުންކުރާ ކަމަށް ތުހުމަތުކުރެއްވި ނަމަވެސް އޭގެ ތަފްސީލެއް، މިއަދުގެ ޖަލްސާގައި ނުދެއްވަ އެވެ.

ޑްރަގް ބޭނުންކުރުން ހުއްޓުވައި، އެ ވަބާގައި ޖެހުނު މީހުން އަނބުރާ މުޖުތަމައަށް ނެރުމުގެ ޒިންމާ އޮންނަ ނެޝަނަލް ޑްރަގް އެޖެންސީ (އެންޑީއޭ)ގެ މައްސަލަތައް ބެލުމަށް ފަހު މަޖިލީހަށް މިއަދު ހުށަހެޅި ރިޕޯޓްގައި ލަފާ ދީފައި އޮތީ އެތަނުގެ ޕާފޯމެންސް އަދި ފައިނޭންޝަލް އޮޑިޓެއް ހެދުމަށެވެ. އެންޑީއޭގައި ހުރި ގިނަ މައްސަލަތަކެއް އެ ރިޕޯޓްގައި ފާހަގަކޮށްފައި އެބަހުއްޓެވެ.