ކުރީގެ ޓޫރިޒަމް މިނިސްޓަރު އަލީ ވަހީދު: އޭނާ ހައްޔަރުކޮށްގެން ރާއްޖެއަށް ގެނައުމަށް އިންޓަޕޯލް ރެޑް ނޯޓިސް ނެރުމުގެ މަސައްކަތް ފުލުހުން ދަނީ ކުރަމުން --
01 ޑިސެމްބަރ 2021 - 10:25
ޓޫރިޒަމް މިނިސްޓްރީގެ މުވައްޒަފުންތަކަކާ މެދު ޖިންސީ ކުށުގެ އަމަލުތަކެއް ހިންގި ކަމުގެ ތުހުމަތުގައި އެތައް ދައުވާއެއް އޮތް ކުރީގެ ޓޫރިޒަމް މިނިސްޓަރު އަލީ ވަހީދު ހައްޔަރުކޮށްގެން ރާއްޖެއަށް ގެންނަން އިންޓަޕޮލް ރެޑް ނޯޓިސް ނެރެން ހުށަހެޅުމުގެ މަސައްކަތް ފުލުހުން ފަށައިފި އެވެ.
މީހަކު ޖާމިނުކޮށްފައި ބޭސްފަރުވާއަށް ކަމަށް ބުނެ އަލީ ވަހީދު ރާއްޖެއިން ބޭރަށް ވަޑައިެގެން ގޮތަށް އަނބުރާ ވަޑައެއް ނުގަންނަވަ އެވެ. އަދި އޭނާއަށް ދައުވާ ލިބޭ މައްސަލަތަކުގައި ޝަރީއަތަށް ހާޒިރު ކުރަން ވެސް ވަނީ ދަތިވެފަ އެވެ.
އެންމެ ފަހުން ކްރިމިނަލް ކޯޓުގައި ބޭއްވި އަލީ ވަހީދުގެ ޝަރީއަތުގެ އަޑުއެހުމަށް އޭނާ ވަޑައިނުގަތުމުން އެ ކޯޓުން ވަނީ އަލީ ވަހީދު ހާޒިރުކުރަން، އޭނާގެ ބަދަލުގައި ޖާމިނުވި ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީއަށް ތިން ދުވަހުގެ ފުރުސަތެއް ދީފަ އެވެ. އަދި ކޯޓުން ވަނީ އަލީ ވަހީދު ހައްޔަރުކޮށްގެން ކޯޓަށް ހާޒިރު ކުރުމުގެ އަމުރެއް ފުލުހުންގެ މައްޗަށް ނެރެފަ އެވެ.
މިކަމާ ގުޅިގެން ފުލުހުންގެ ސްޕޯކްސްޕާސަން ޔޫނުސް ސޮބާހު މިއަދު "މިހާރު" އަށް ވިދާޅުވީ، އަލީ ވަހީދުގެ ހައްޔަރު އަމުރު ލިބުމާ އެކު އޭނާ ހޯދުމަށް ރެޑް ނޯޓިސް ނެރުމަށް އިންޓަޕޮލްއަށް ހުށަހެޅުމަށް ކުރަން ޖެހޭ އިދާރީ މަސައްކަތްތައް މިހާރު ފުލުހުން ކުރަމުން އަންނަ ކަމަށެވެ.
"އަޅުގަނޑުމެން އިންޓަޕޮލް ރެޑް ނޯޓިސް ނެރުމަށްޓަކައި ކުރަންޖެހޭ މަސައްކަތް ކުރަމުން މިދަނީ،" ޔޫނުސް ވިދާޅުވި އެވެ.
މީގެ ކުރިން ވެސް އަލީ ވަހީދު ގެނައުމަށް ރެޑް ނޯޓިސް ނެރުމަށް ފުލުހުން މަސައްކަތް ކުރި އެވެ. އަދި އިނގިރޭސި ވިލާތުގެ ފުލުހުންނާ ގުޅިގެން ވެސް އޭނާ ރާއްޖެއަށް ގެނައުމުގެ މަސައްކަތް ކުރި ކަމަށް ފުލުހުން ބުނެފައިވެ އެވެ.
އަލީ ވަހީދުގެ މައްޗަށް ހަތް ދައުވާއެއް އުފުލާފައިވެ އެވެ. މި ކަންކަމަށް އިންކާރުކޮށް އަލީ ވަހީދު ވިދާޅުވެފައި ވަނީ މި ދައުވާތަކަކީ އޭނާ މަގާމުން ވަކިކުރުމުގެ ރޭވުމެއް ކަމަށެވެ.
އޭނާ ހައްޔަރު ކޮށްގެން ކޯޓަށް ހާޒިރު ކުރުމުގެ އަމުރެއް ނެރުނަސް، ކޯޓުން އޭނާ ދޫކޮށްލައި ރާއްޖެއިން ބޭރުގައި ހުރެގެން ޝަރީއަތުގައި ބައިވެރިވެވޭނެ ގޮތް ހަމަޖައްސައިދިނެވެ. ކޯޓުގެ އެ ނިންމުން ދައުލަތުން އިސްތިއުނާފުކޮށް މިހާރު އޮތީ ސުޕްރީމް ކޯޓު މަރުހަލާގަ އެވެ.
އޮންލައިންކޮށް ޝަރީއަތް ބާއްވާ މައްސަލައިގެ އަޑުއެހުމަށް އަލީ ވަހީދު ސުޕްރީމް ކޯޓަށް ހާޒިރު ނުވުމުން އެ ކޯޓުން ވަނީ އޭނާ ހުރުމަތް ކެނޑީ ކަމަށް ބަލައި ދެ މަހާއި 12 ދުވަހަށް ޖަލަށް ލާން ހުކުމް ކޮށްފަ އެވެ. އެ ހުކުމް ވެސް ތަންފީޒު ނުކުރެވެނީ އަލީ ވަހީދު ރާއްޖެއަށް ނުގެނެވުމުންނެވެ.
މީގެ ކުރިން ވެސް އެކި މައްސަލަތަކުގައި ދިވެހީން ހޯދަން އިންޓަޕޮލް ރެޑް ނޯޓިސް ނެރެފައިވެ އެވެ. އޭގެ ތެރޭގައި ސީލައިފް ގްލޯބަލް ކުންފުނީގެ އެމްޑީ އަހުމަދު މޫސާ (އަންމަޓީ)އާއި އެމްއެމްޕީއާރްސީގެ ހިޔާނާތާ ގުޅޭ ބައެއް މީހުން ހިމެނެ އެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
އެގިދާނެތާ
02 December 2021
އަހަރެމެން މިތިބެނީ ބަލަން. އެސް.އޯ.އެފަށް ވެސް ނެރުނު ތިބުނާ ނޯޓިސް. ބޮޑު ސުވާލަކީ އިންޓަޕޯލް ނޯޓިސް ނެރެނީ ވީތަނެއް ފިލާފައި ތިބޭ މީހުން ހޯދަން. އެކަމަކު މިސަރުކާރަށް ެއގޭ އޭނަ ވީތަނާއި، ގެންނަން ވެއްޖިއްޔާ ގުޅާނީ އިގިރޭސިވިލާތުގެ ސަރުކާރުގެ ކޮން އޮފީހަށްކަމަށް. އެހެންވީމާ ކުޑަކޮށް އެބަހެވޭ.
ކުރިސްމަސް
01 December 2021
މާ ލަސްވެސްވެއްޖެއްނު ތިޔަކަމާ އުޅެން. ދެން ކުރިމިނަލް ކޯޓު ދޭ ޗުއްޓީއަށް.
ސަސި
01 December 2021
ތި ބުނާ އަލީ އެބައުޅޭ ޓުވިޓާގަ.
އަބޫބަކުރުބޭ
01 December 2021
ދެން ތިކަން ބާއްވާފާ އެހެންކަމަކާ އުޅޭ.
ޖަމީލުބެ
01 December 2021
އަބޫބަކުރުބެއަށް ރަނގަޅު ގޮތެއް ނެތީތޯ؟