މަނީ ލޯންޑަރިންގެ މައްސަލާގައި އައި ފަސް އަހަރުގެ ޖަލު ހުކުމުން ސަލާމަތްވުމަށް ފަހު، ކުރީގެ ރައީސް އަބްދުﷲ ޔާމީން ބައިވެރިވެޑައިގަންނަވާ ފުރަތަމަ ޖަލްސާ އަންނަ ހުކުރު ދުވަހުގެ ރޭ ބާއްވަން އިދިކޮޅު ޕީޕިއެމް/ޕީއެންސީ ކޯލިޝަނުން ތައްޔާރުވެއްޖެ އެވެ.
އެ ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވީ "މަރުހަބާ ރައީސް ޔާމީން" ގެ ނަމުގައި ބާއްވާ ޖަލްސާ އޮންނާނީ ހުކުރު ދުވަހުގެ ރޭ 8:30 ގައި ކާނިވާ ސަރަހައްދުގައި ކަމަށެވެ.
އެ ޖަލްސާގައި ޕީޕީއެމްގެ ރައީސް ޔާމީން ވާހަކަފުޅު ދައްކަވާނެ ކަމަށް ޝުޖާއު ވިދާޅުވި އެވެ.
"އަޅުގަނޑުމެންގެެ އެދުމަކީ ހަމަ ހުރިހާ ލޮބުވެތި ރައްޔިތުން މި ޖަލްސާގައި ބައިވެރިވެވަޑައިގަތުން. އަދި ހުރިހާ ލޮބުވެތި ރައްޔިތުންނަށް ރައީސް ޔާމީނާ އެ ތަނުން، ކާނިވާ ސަރަހައްދުން އިންޝާﷲ ބައްދަލުކުރުމުގެ ނަސީބު ލިބިގެންދާނެ،" ޝުޖާއު ވިދާޅުވި އެވެ.
ހުޅުމާލެ ދާއިރާގެ ކައުންސިލް މެންބަރު ޝުޖާއު ވިދާޅުވީ ޖަލްސާގެ އެންމެ ފަހުގެ ތައްޔާރީތަކުގެ ތެރެއިން ކާނިވާ ސަރަހައްދުގައި ޖަލްސާ ބޭއްވުމުގެ ހުއްދަ މިހާރު މާލެ ސިޓީ ކައުންސިލުން ލިބިފައިވާ ކަމަށެވެ.
ޔާމީންގެ މައްޗަށް ކްރިމިނަލް ކޯޓުން 2019 ވަނަ އަހަރު ކުރި ފަސް އަހަރުގެ ޖަލު ހުކުމް ބާތިލްކުރަން ސުޕްރީމް ކޯޓުން އިއްޔެ ކުރި ހުކުމާ އެކު މިނިވަން ވެފައި ވިޔަސް ކޯޓުގައި އޮތް އެހެން މައްސަލައެއްގައި ވަނީ ޕާސްޕޯޓް ހިފަހައްޓައިފަ އެވެ. ޔާމީންގެ މައްޗަށް ތުހުމަތުކުރާ މަނީ ލޯންޑަރިން އާއި ރިޝްވަތުގެ އެހެން ދައުވާތަކެއް މިހާރުވެސް ކުރިއަށްދެ އެވެ.