ޓްރެފިކް ޕޮލިހުން ސައިކަލުތަކެއްގައި ސްޓިކާ ޖަހަނީ: ތޮއްޖެހިފައިވާ މާލޭގައި ވެހިކަލް ޕާކު ކުރާނެ ތަނެއް ހޯދުމަކީ ފަސޭހަކަމެއް ނޫން-- ފޮޓޯ: މުހައްމަދު ޝަރުހާން/ މިހާރު
16 ޑިސެމްބަރ 2016 - 14:54
107 comments
މާލޭގައި ގަވައިދާހިލާފަށް ޕާކްކޮށްފައި ހުންނަ އުޅަނދުތަކުގައި ފުލުހުން ސްޓިކާ ޖެހުން ވަރަށް ބޮޑަށް އިތުރުވެ އާންމުންގެ ޝަކުވާ ގިނަވެއްޖެ އެވެ.
މާލޭގައި ސްޓިކާ ޖަހަނީ ގަވާއިދާ ހިލާފަށް ޕާކު ކުރާ އުޅަނދުތަކުގައި ވިޔަސް، ސްޓިކާ ޖެހުމުގައި އެއްވެސް ހަމައެއް ނުގެންގުޅޭ ކަމަށް ބުނެ ގިނަ ބަޔަކު ވަނީ ނޭޝަނަލް އިންޓަގްރިޓީ ކޮމިޝަނަށް (އެންއައިސީ) އަށް މައްސަލަ ހުށަހަޅައިފަ އެވެ.
އެންއައިސީއަށް މައްސަލަ ހުށަހެޅި ބައެއް މީހުން "މިހާރު"އާ ވާހަކަ ދައްކަމުން ބުނީ ފުލުހުން ސްޓިކާ ޖެހުމުގައި އެއްވެސް ހަރުދަނާ އުސޫލެއް ގެންގުޅެމުން ނުދާ ކަމަށެވެ. އެ ގޮތުން ކުޑައިރުކޮޅަކަށް ޕާކްކޮށްފައި ހުންނަ ވެހިކަލްތަކުގައި ސްޓިކާ ޖެހުން އާންމުވެފައިވާ ކަމަށް އެ މީހުން ބުންޏެވެ.
"ފިހާރައަކަށް ނޫނީ ތަނަކަށް ވަދެފައި ނުކުންނައިރު، ސްޓިކާ ޖަހާފައި ހުންނަނީ، ޕާކް ކުރާނެ ތަންތަން ނެތްއިރު މިއީ ތަންކޮޅެއް ބޮޑުވަރު،" އެންއައިސީއަށް މައްސަލަ ހުށަހެޅި މީހަކު ބުންޏެވެ.
ފުލުހުން ވެހިކަލްތަކެއްގައި ސްޓިކާ ޖަހަނީ: މާލޭގައި ސްޓިކާ ޖެހުން ވަނީ ވަރަށް ބޮޑަށް އާންމު ކަމަކަށްވެފައި. --ފޮޓޯ/މިހާރު
މީގެ އިތުރުން ޓްރެފިކް ފުލުހުން މަގުމަތީގައި ހަރަކާތްތެރިވާއިރު، ޕާކް ނުކުރެވޭނެ ތަންތަން އަންގަމުން ނުދާތީ ގިނަ ބަޔަކު ތިބީ ހިތްހަމަނުޖެހިފަ އެވެ. ބައެއް މީހުން ސިފަ ކުރާ ގޮތުގައި މިއީ ގަސްދުގައި ސްޓިކާ ޖަހަން ފުލުހުން މަސައްކަތް ކުރާ ކަމުގެ ހެއްކެކެވެ. ނަމަވެސް ފުލުހުން އެކަން ދޮގު ކުރެ އެވެ.
"ވެހިކަލެއް ޕާކް ކުރަން ދާއިރު، ފުލުހުން ބައެއް ފަހަރު ތިބޭ ކައިރީގައި، އެކަމަކު އެއްވެސް އިރުޝާދެއް ނުދޭ. އެންމެ ކުޑަމިނުން ޕާކް ނުކުރެވޭނެއޭ ބުނެލާނަމަ ކިހާ ރަނގަޅު،" އެ މީހާ ބުންޏެވެ.
އެންއައިސީއަށް ހުށަހެޅި މައްސަލަތަކުގެ ތެރޭގައި ކުޑައިރުކޮޅަކަށް ޕާކްކޮށްފައި ހުންނަ އުޅަނދުތަކުގައި ސްޓިކާ ޖެހުމުގެ އިތުރުން މަގުމަތީގެ ނިޝާންތައް ސާފު ނޫން ތަންތަނުގައި ޕާކް ކުރީމަ ސްޓިކާ ޖެހުން ފަދަ ޝަކުވާތައް ހިމެނެ އެވެ. އެނގިފައިވާ ގޮތުގައި ކޮންމެ ދުވަހަކު ވެސް ސްޓިކާ ޖެހުމުގެ މައްސަލަ އެންއައިސީއަށް ހުށަހަޅަ އެވެ. ނަމަވެސް އެކަމާ ބެހޭ ގޮތުން އެންއައިސީން އެއްވެސް އެއްޗެއް ނުބުނެ އެވެ.
ފުލުހުންގެ މީޑިއާ އޮފިޝަލް ވިދާޅުވީ އާންމު ދަތުރުފަތުރަށް އުނދަގޫވާ ގޮތަށް ޕާކް ކުރާ އުޅަނދުތަކުގައި ސްޓިކާ ޖެހުމާއި ޓޯ ކުރުމަކީ އަބަދުވެސް ކުރާ ކަންކަން ކަމަށެވެ. އާންމުންގެ ޝަކުވާތައް އިތުރުވިޔަސް، އޭނާ ވިދާޅުވި ގޮތުގައި އެއީ ވަކި ހާއްސަކަމެއް އޮވެގެން ކުރާ ކަމެއް ނޫނެވެ.
"ސްޓިކާ ޖަހާތާ 24 ގަޑިއިރު ތެރޭގައި އުޅަނދެއް ނުނަގައިފިނަމަ ޓޯ ކުރާނެ، އާންމު ދަތުރުފަތުރަށް އުނދަގޫވާ ގޮތަށް ޕާކް ކުރާނަމަ، ސްޓިކާ ޖެހުމަކާ ނުލައި ޓޯ ކުރާނެ،" އޭނާ ވިދާޅުވި އެވެ.
ކުރީގެ ޕޮލިސް ކޮމިޝަނަރުކަން ކުރެއްވި ކިނބިދޫ ދާއިރާގެ މެމްބަރު އަބްދުﷲ ރިޔާޒް ވިދާޅުވި ގޮތުގައި މިހާރަކަށް އައިސް ސްޓިކާ ޖެހުން ސިފަ ވަނީ ދައުލަތަށް އާމްދަނީ ހޯދާ ކަމެއްގެ ގޮތުގަ އެވެ. ޕާކް ކުރާނެ ޖާގަތައް ނަހަދައި ސްޓިކާ ޖެހުމަކީ މައްސަލައެއް ކަމަށް ވެސް އޭނާ ވިދާޅުވި އެވެ.
ރިޔާޒް ވިދާޅުވި ގޮތުގައި ޕާކު ކުރާނެ ޖާގަ މާލޭގައި ގާއިމުކުރަން ފުލުހުން އިސް ނަގައިގެން ޓްރާންސްޕޯޓް އޮތޯރިޓީއާ މަޝްވަރާ ކުރަން ޖެހެ އެވެ. އަދި މާލޭގައި ޕާކް ކުރެވޭނެ ޖާގަތައް ސަރުކާރުން ހަދައި ނުދީ އާދަޔާ ހިލާފަށް ގިނައިން ސްޓިކާ ޖެހުމަކީ އިންސާފަކަށް ނުވާނެ ކަމަށް ރިޔާޒް ވިދާޅުވި އެވެ.
މާލޭގައި ހުންނަ ހުޅުމާލޭގެ ފެރީޓާމިނަލްގެ ޕާކިން ޒޯންގައި ވެހިކަލްތަކެއް ޕާކްކޮށްފައި.---ފޮޓޯ: ނިޝާން އަލީ/މިހާރު
"އެކަށީގެންވާ ވަރުގެ ޖާގައެއް ނެތް ޕާކް ކުރާކަށް، ސަރުކާރުގެ ޒިންމާއެއް އެ ތަންތަން ހެދުމަކީ، ކުލި ދައްކައިގެން ވިޔަސް ޕާކް ކުރެވޭނެ ތަންތަން ގާއިމު ކުރަން ޖެހޭނެ،" ރިޔާޒް ވިދާޅުވި އެވެ.
އޭނާ ވަނީ އެއްގަމާ ބެހޭ ގާނޫނުގައި ރާއްޖެ އެތެރެކުރާ ވެހިކަލްތަކުގެ އަދަދެއް ކަނޑައަޅަން އޮންނައިރު، އެ ގާނޫނަށް ސަރުކާރުން އަމަލު ކުރަމުން ނުދާތީ ކަންބޮޑުވުން ފާޅުކުރައްވާފަ އެވެ.
ޓްރެފިކްގެ މައްސަލަ ބޮޑުވުމުގެ ސަބަބުން ވެހިކަލްތަކަށް ޕާކު ކުރުމުގައި ދަތިތަކެއް ހުރުމުން ފުލުހުން ދޭތެރެ ދޭތެރެއިން އުޅަނދުތަކުގައި ސްޓިކާ ޖެހުން ވަރަށް ބޮޑަށް މަދު ކުރެ އެވެ. އެ ގޮތުން ނަމާދަށް މިސްކިތަށް އަރާއިރު ޕާކުކޮށްފައި ހުންނަ އުޅަނދުތަކުގައި މިހާރު ސްޓިކާ ޖެހުން ވަނީ ހުއްޓާލައިފަ އެވެ.
މާލޭގައި ދުއްވާ އުޅަނދުތައް އިންތިހާ އަށް އިތުރުވެފައިވާތީ އެ އުޅަނދުތައް ޕާކު ކުރާނެ ތަނެއް ނުލިބެ އެވެ. އަދި ގަވައިދާ ހިލާފަށް ސްޓިކާ ޖަހައިގެން ކޮންމެ ފަހަަރަކު ވެސް ބޮޑެތި އަދަދުތަކުން ޖޫރިމަނާ ކުރެ އެވެ. ޕާކު ކުރުމުގައި ހުރި ދަތިތަކަށް ހައްލެއް ގެނައުމުގެ ގޮތުން ސަރުކާރުން ދަނީ މެކޭނިކަލް ޕާކިން ސިސްޓަމްތައް ތައާރަފްކުރުމުގެ މަސައްކަތް ކުރަމުންނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޕޮލިސް ފޭން
18 December 2016
2 މިނިޓް ކިރިޔާ ވާނީ ސައިކް ބަހައްޓާފަ،އައި އިރުގަ ސްޓިކަރ އެއް ލިޔަނީ. އަހަރެން ބުނިން މި ނަގަނީ އޭ. ނުން ދެން ނުވާނެޔޯ،މިހާރު ސްޓިކާރ ލިޔެވިފަ އޮތީމަ ހިފައިން ދާށޯ. ކިހާ ބޮޑު ކަމެއް.
ވިސްނާ
18 December 2016
ޕިކަޕާއި ލޯރި އަދި މުދާ އުފުލުމަށް ގެންގުޅޭ ވޭން ފަދަ ތަކެތި އާންމު ޕާކިންޒޯންތަކުގައި ޕާކު ނުކުރެވޭގޮތަށް ހަދައި އެތަކެއްޗަށް ވަކި ސަރަހައްދެއްގައި ފީއެއްދައްކައިގެން ނޫނީ ޕާކު ނުކުރެވޭގޮތް ހެދުމުންވެސް ކޮންމެވެސްވަރެއްގެ ހައްލެއް ލިބޭނެއެވެ. ސައިކަލަކީ މިހާރު މާލޭގެ ހާލަތު ހުރިގޮތުން ޒަރޫރީއެއްޗަކަށް ވަނީ ވެފައެވެ. އެއީ މަސައްކަތުގައި އަވަދިނެތި އުޅެން ޖެހުމުން ވަގުތުގެ ދަތިކަން އޮތުމުންނެވެ. މަގުތަކުގައި ހިޔާދޭ ގަސްތައް ނެތުމުން އެންމެހާ ހޫނުވާތީއެވެ. ޕާކިން އޭރިޔާތަށް ފާހަގަ ނުކޮށް ހިތައްއެރި ދުވަހެއްގައި ކޮންސިސްޓެންސީއެއްނެތި ސްޓިކާޖެހުމުން ހަމައެކަނި އާންމު ދަތުރުފަތުރަށް އުދަގޫވާތީ ސްޓިކާޖަހާކަމަށް ގަބޫލެއް ނުކުރެވެއެވެ.
ސަލާމް
18 December 2016
ސްޓިކާ ޖެހުމަކީ އޭގެ ޒާތުގައި މައްސަލައެއް ނޫނެވެ. ނަމަވެސް ރަގަޅު ނިޔަތުގައި މިކަން ނުކުރުމަކީ މައްސަލައެކެވެ. އާންމު ދަތުރުފަތުރަށް އުދަގޫވާތީ ސްޓިކާ ޖަހާނަމަ ކޮންމެ ދުވަހަކުވެސް ސްޓިކާ ޖަހަންޖެހޭނެއެވެ. މިސާލަކަށް ވަކިތަނެއްގައި ޕާކު ކުރުމުން އާންމު ދަތުރުފަތުރަށް އުދަގޫވާނަމަ އެތަނުގައި ޕާކު ކުރާ އުޅަނދުތަކުގައި އަބަދުވެސް ސްޓިކާ ޖަހަންޖެހެއެވެ، ހަފްތާއަކު އެއްދުވަހު ނުވަތަ މަހަކު އެއްފަހަރު އައިސް ރާސްލާފައި ސްޓިކާ ޖެހުމުން ރަގަޅެއް ނޫނެވެ. މަގުޞަދު ހާޞިލެއް ނުވެއެވެ. އަދި މާލޭގެ ގިނަ ސަރަހައްދުތަކުގައި ޕާކީންޒޯންތައްވެސް މިހާރަކު ސާފެއް ނޫނެވެ. ކުލަތައް ފުހެވިގެންގޮސް ތަނެއް ދޮރެއް ނޭންގެއެވެ. މިސާލަކަށް އެމްއެމްއޭ ކުރިމަތީގައި އޮންނަ ޒޯނުގައި އެގޮތްމިގޮތަށް ރޮގުތައް ހުރެ ވާނުވާއެއް ނޭންގެއެވެ. ހުއްދައީ ކޮންތަނެއްކަމެއްވެސް ނޭންގެއެވެ. އެކަމަކު ދޭތެެރެއަކުން އައިސް ސްޓިކާޖަހައެވެ. މިކަންކަން ރަގަޅު ނިޒާމެއްގެ ތެރެއިން ނުކުރާތީ މަގުޞަދާ ދޭތެެރޭ ސުވާލު އުފެދެއެވެ.
އުނދަގޫ
18 December 2016
ކުޑަ އިރުކޮޅަކަށްވެސް ޕާކްކުރަން ކަނޑައެޅިފައިވާ ތަނެއްގައި ނޫނީ ޕާކް ކޮށްގެން ނުވާނެ. ފިހާރައަކަށް ވަންނަންށޭ؟؟ ލަދެއް ނުގަނޭތަ ތިހެން ބުނަން؟ ކުރީ ދުވަހަކުވެސް މަދުށިން ސައިކަލެއް ފިހާރައެއް ކުރިމަތީ ޕާކް ކޮށްފަ ވަންތަން. އެކަމަކު ހަމަ އެޕާކްކުރި ފަރާތުގެ އަނެއް ފަރާތުގައި ޕާކިން ތަންއޮތް. އަދި ޖާގަވެސް އޮތް. އެކަމަކު އޭނަނީ ހަމަ ފިހާރަ ދޮރުމަތީ ޕާކް ކުރަން. ދެންވީ އަންނަ އެހެން އެއްޗެހި އެއަށް ބަލައިގެން ދާން. ތޮއްޖެހިފައިވާ މާލޭގައި މިގޮތަށް ވެހިކަން ބެހެއްޓީމަ އުނދަގޫވޭ. ބައެއް ފަހަރު ހިތައްއަރާ ޖަހާ ވައްޓާލަފާނަމޭ ނުގަވައިދުން މިހެން ހުންނަ ވެހިކަލްތައް. ހަމަ ރަނގަޅު. ސްޓިކާ ޖަހަންވީ!
ދައުލަތުގެ އިސްޓީކާ
18 December 2016
ވަރަށް ތެދުވާހަކައެއް. އަޅުގަނޑަކީ އަޅިކިޅެގެފާނުމަގު މިސްކިއްކައިރީ ދިރިއުލޭ ރައްޔިތަކީމު. އަދި ގެއިން ނިކުމެ މޫނުޖެހެނީ ސައިކަލް ޕާކިންޒޯނަށް. އެހެނަސް ހުދު އަޅުގަނޑު ސައިކަލް ޕާކްކޮއްލަން ޖާގެ ނުލިބޭ ބޮޑެތި ބިޔަ ޕްރައިވެޓް ކާރުތަކާއި ވޭންތަކާއިހެދި. ސައިލް ޒޯންގައި ހުއްނަ މިޒާތުގެ ވެހިކަލް ތައް އެގޮތައް ހުއްނަތާ 1 ނުވަ 2 މަސްވާއިރު ޓޯކް ނުކުރެވި ،
ހާންދާން
18 December 2016
ހުރަވީ ބިލްޑިންގ، ޤާޒީ ބިލްޑިންގ، ވެލާނާގޭ ބިލްޑިންގ ސަރަޙައްދުގައި ރަސްމީގަޑީގައި އިސްޓިކާ ޖެހުމާއި މިގަޑީގައި މިސަރަޙައްދުގައި ހުންނަ އެއްޗިހި ޓޯކްކުރުން މީ ހަމަ ގަސްތުގައި މީހުނަށް ދޭގެއްލުމެއް.... ރަސްމީ ދުވަސްދުވަހު އެސަރަޙައްދުގެ އޮފީސްތަކުގެ މުއައްޒަފުންގެ އިތުރުން އެއޮފީސްތަކުގެ ޙިދުމަތް ހޯދަން ކިތައްމީހުން ދާނެކަން ކަމާބެހޭފަރާތްތަކަށް އެނގިނުލައްވަނީތޯ!!!
ރޮނީ
18 December 2016
އާ ދެން ތި ހިސާބުގަ މަގުގަ ދެ ފަޅީގަ ސައިކަލު ޖަހާ މަސްވެރިންގެ ޕާކު ޒާތަށް ފުރާލާ އޭރުން އެންމެ ރަނގަޡލުވާނީ... އަހަރެމެން ދިވެހިންނަކީ ދުނިޔޭގެ އެންމެ ކަންފަސޭހަ ...
ދޮޅީދާން
17 December 2016
މިކަހަލަ އިޖުތިމާއީ މައްސަލަ ހައްލުވާނީ ސަރުކާރުންވެސް ގުރުބާނީ ތަކެއް ވެގެން ، އެގޮތުން މާލޭގައި ހިނގާފައި އުޅޭމީހުންނަށް ހިތްވަރު ދިނުމަށް ކެމްޕޭންތަކެއް ހިންގަންވީ ސައިކަލްދޫކޮށްލާފައި ހިނގަންފަށާ މީހުންނަށް އެލަވަންސް ލަކީޑްރޯވެސް ބާއްވަންވީ
ާޑަކުޓަރު
17 December 2016
ޖެހިވަރަކަށް ސަރުކާރަށް ލިބޭ އާމްދަނީ. ހަބޭސް ޖަލްސާތަކަށް ދާމީހުންގެ އުޅަނދުގައި ނަމަނަމަ ނުކެރޭނެ ޖަހާކަށް . ޕާކިންގ ނިޒާމެއްވެސް ނުހަދާތި. ގެންނަވަރުން ދުއްވާތަކެތި ގެންނާތި. މިއޮތީވާ ޤައުމެއް.
ށަރުމީލާ
17 December 2016
ޖަހާލެއްމަދީ އަދިވެސް ފިހާރައައް ވަންނާކަން ނުޖެހޭ އެހެން އެއްޗެހިނުދެވޭގޮތައް ބަހައްޓާފައި، ލައިސެންސް ޓެސްޓްހަދާއިރު ޕާކިން ނޯޕާކިން އިގެންޖެހޭ، ތިހެން ގަވާއުދާ ހިލާފަން ޕާކުކުރާމީގުން ގެ ލައިސަން ކެންސަލްކޮއްފައި އަލުން ޓެސްޓް ދޭން ފެނޭ!
މާލިމީ
17 December 2016
ކާރު ޕާކް ނުކުރެވޭ ޒޯންގައި ދެކާރު ޖެހިޖެހިގެން އޮންނައިރު ދެލޮލަށް ނުފެނި ޖެހިގެނެ އޮންނަ ސައިކަލް ޕާކް ނުކުރެވޭ ޒޯންގައި ހުންނަ ސައކަލް ލޮލަށް ފެންނަ ނަމަ ސްޓކާޖަހާ މީހުން ލޯ ޓެސްޓް ކޮށް ނުފެންނަނީ ނަމަ އެމީހުން ވަޒީފާއިން ވަކިކުރަންޖެހޭ.
ދޮންބެ
17 December 2016
ތީގައި އާންމުންގެ މައްސަލަވެސް ކުޑައެއްނޫން. މިސްކިތައް ނަމާދަށް ދިޔަސް އެދާތަނެއްގެ ދޮރުމަތީނޫނީ ސައިކަލް ބެހެއްޓޭ ކަމަކަށް ނުވޭ. ކައިރިތަނެއްގަ ސައިކަލް ބަހަށްޓާފަ ހިގާލާފަ އައުން، ނޫނީ މިސްކިތް ކައިރި ގޭގޭ މީހުން ހިނގާފަ މިސްކިތަށް ދިއުން ދިވެހިންނަށް ވަނީ ހަޑި ކަމަކަށް. މިސްކިތް/ސްކޫލު ދޮރުމަތީ ޕެލެޓް ނުބެހެއްޓިއްޔާ އެތަންވެސް ފުރާލާ. ދެން ކުޑައިރުކޮޅެކޭ ބުނާއިރު، ކޮންމެ ސައިކަލެއްކައިރީ ފުލުހަކަށް ހުރެވޭނެބާ ސްޓޮޕް ވޮޗް ޖައްސައިގެން. އަލުގަނޑަން ސްޓިކާޖެހުމުގައި އެންމެ ބޮޑަށް އަޅައިގަންނަ ތަންކޮޅަކީ ޕްރައިވެޓް ކާރުތަކުގައި ސްޓިކާ ޖަހާލެއް މަދު ތަންކޮޅު. އަނެއްހެން ދެން ރަނގަޅުހެން ހީވަނީ. އަޅުގަނޑު މާލޭގަ ސައިކަލް ދުއްވާތާ 5 އަހަރު. ސްޓިކާއެއް ނުޖަހާ އަދިޔެއް.