29 ޑިސެމްބަރ 2021 - 20:12
15 comments
ރަށްރަށުގައި މީހުން ދިރިއުޅޭ ގެތަކުގައި ޓޫރިސްޓުން ބޭތިއްބޭ، ހޯމް ސްޓޭ ޓޫރިޒަމްގެ 200 އެނދު މ. ދިއްގަރުން ނެރުމަށް އެ ރަށު ކައުންސިލުން އަމާޒު ހިފާ ކަމަށް ޓޫރިޒަމް މިނިސްޓްރީން ބުނެފި އެވެ.
ޓޫރިޒަމް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސީނިއާ އެގްޒެކެޓިވް ޑިރެކްޓަރު އަލީ ރައްޒާން ވިދާޅުވީ ހޯމް ސްޓޭ ފަށާ ރަށުގެ ގޮތުގައި ދިއްގަރު ހަމަޖެއްސި ނަމަވެސް އެ ރަށަކީ ބިން ފުރިފައި އޮތް އަދި ގެސްޓް ހައުސްއެއް ވެސް ނެތް ރަށެއް ކަމަށެވެ.
އެހެން ނަމަވެސް އެ ރަށުގެ ވަަރަށް ގިނަ ޒުވާނުން މަސައްކަތް ކުރަނީ ރިސޯޓުތަކުގައި ކަމަށާއި ޓޫރިޒަމަށް ބޭނުންވާ ހުރިހާ ކަމެއް އެ ރަށުގައި ފުރިހަމަވާ ކަމަށް އޭނާ ވިދާޅުވި އެވެ.
"ރިސޯޓެއްގެ މުޅި ގެސްޓް އޮޕަރޭޝަނަށް ބޭނުންވާ ތަޖުރިބާ ދިއްގަރުގައި އެބަހުރި. ދިއްގަރު ރައްޔިތުން އެބަ ބޭނުންވޭ މިކަން ކުރަން،" ރައްޒާން ވިދާޅުވި އެވެ.
ހޯމް ސްޓޭ ޓޫރިޒަމްގައި މުޅި ރާއްޖެ އަށް ނަމޫނާ ދައްކާނެ ރަށަކަށް ވާނެ ކަމުގެ ޔަގީންކަން އެ ރަށު ރައްޔިތުން ދޭ ކަމަށް ރައްޒާން ވިދާޅުވި އެވެ. އަދި ކައުންސިލްގެ ދައުރު ނިމުމުގެ ކުރިން އެ ރަށުން 200 އެނދު ނެރުމަށް އަމާޒު ހިފާފައިވާ ކަމަށް ވެސް އޭނާ ވިދާޅުވި އެވެ.
"ޖެނުއަރީ 1 ގައި އަޅުގަނޑުމެން ދިއްގަރުގައި މި މަސައްކަތް ފަށާއިރު ހަތަރު ގެއެއް ރެޖިސްޓާ ވާނެ،" އޭނާ ވިދާޅުވި އެވެ.
ހޯމް ސްޓޭ ޓޫރިޒަމް ހިންގޭނީ އެއް ކޮޓަރި އާއި ތިން ކޮޓަރި ދެމެދު ކޮޓަރި ހުރި ގެތަކަށެވެ. އަދި ގެސްޓްހައުސްތައް ވެސް އަމަލު ކުރާ ފަދަ ޝަރުތުތަކާއި ގަވައިދުތައް އެ ގެތަކުން ވެސް އަމަލު ކުރަން ޖެހެ އެވެ.
ރާއްޖޭގައި މި ވަގުތު ރަޖިސްޓާ ކޮށްފައި ވަނީ 56،996 އެނދެވެ. އޭގެ ތެރޭގައި 161 ރިސޯޓާއި 612 ގެސްޓްހައުސް އަދި 143 ސަފާރީ ހިމެނެ އެވެ. ހޯމް ސްޓޭ ޓޫރިޒަމް ފެށުމުން ގެސްޓްހައުސްތަކަށް ވުރެ ވެސް އަގު ހެޔޮކޮށް ޓޫރިޒަމް އިތުރަށް ފުޅާވާނެ ކަމަށް އެ މިނިސްޓްރީން ގަބޫލު ކުރެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ރިހާކުރު
31 December 2021
ދެން ދިއްގަރު ރައްޔިތުންވެސް ދޮން ކުދިން ބޭނުންވާނެއްނުދޯ.
ބެރީ
30 December 2021
ދިއްގަރު ރިހާކުރަށް ދެންވާނީ ކިހިނެތް؟
އެރީ
31 December 2021
މާ ބާރަށް ވިކި ހުސްވާނީ.
މުލޭ
30 December 2021
ޓޫރިސްޓުން އައުމަކީ އޭގެ އިގްތިސާދީ ފައިދާ އޮތްކަމެއް. ހޯމްސްޓޭއިން ވެސް މި ފައިދާ ލިބޭނެ. މައްސަލައަކަށްވަނީ ގެސްޓުމީހާ އުޅޭގޮތް. އޭނަގެ އަޚްލާގް. ގަވާއިދުތައް ތަންފީޒުކުރަން ތިބި މީހުން. ފޮތެއްގައި އެއްޗެއް ލިޔެގެން ލޯކަލް ޓޫރިޒްމަ ވެސް ފެށީ. ގެސްޓުމީހާ ހިތަށްއަރައިފިއްޔާ "އޮރިޔާމުން" ވެސް ރަށުތެރޭގައި އުޅެނީ. ހުއްޓުވާނެ މީހަކުނެތް. ކ.މާފުށި، ތުލުސްދޫ ފަދަ ރަށްރަށުން ފެންނަ ނަމޫނާ މިއީ. ހުއްޓުވާނެ މީހަކު ނުުހުރޭ. ޑޮލަރު އެކަނި ލިބިގެން ނުުފުދޭ.
2021
30 December 2021
ހޯމް ސްޓޭއޭކިޔައިގެން ބީޗްގަ މިމީހުންއުޅޭގޮތްތައް ދައްކަންވެގެންތިއުޅެނީ.... ބޮއިހަލާކު
ސަސަސސި
30 December 2021
ތި ދާ ރޭޓުން ދިއްގަރު މީހުން ނިދާނެ ބެޑު ހުންނާނެ ބާ
އަދި ނުވޭ
30 December 2021
އަދި ނުވޭ ރާއްޖެއަށް ހޯމް ސްޓޭ ތައާރާފް ކުރާކަށް، މިއުޅެނީ ގެސްޓް ހައުސްތަކަށާ ސަފާރީތަކަށް ރަންގަޅު އޮކިޔުޕެންސީ އެއް ނުލިބިގެން، ދެން ކޮން ހޯމް ސްޓޭއެކޭ؟ ރާއްޖޭގެ ގެތަކުގަ ޕާޓޭން އުޅޭއިރު ގެސްޓުން އަތުން ވައްކަން ވެސް ކުރާނެ، އަދި އެނޫންވެސް ދެރަ ކަންތައް ދިމާވާނެ، ތި ކަމުގެ ސަބަބުން ރާއްޖޭގެ ޓޫރިޒަމްގެ އަގު ވެއްޓިގެން ދާނެ
ހަސަންފުޅުބެ
29 December 2021
ގެސްޓުންވެސް ގެންނަންޖެހޭ. އެކަންނުކޮށެއް ފަރަކު ނުޖެއްސޭނެ. އާހިރަށް ބާއްޖަވެރިކުރަން މަސައްކަތްކޮށް އެމީހެއްގެހިއްސާއިން ދުނިޔެވެސް އާރާސްތުކޮށް އުފާފަގަތިކަންވެސް ހޯދަންޖެހޭ. އެކަމަކު އެކަށީގެންވާ ހަރުދަނާ ގަވާއިދުތަކެއް އުސޫލުތަކެއް ހުންނަށްޖެހޭ. މީހުންދިރިއުޅޭ ރަށެއްނަމަ ގެސްޓުފެސިލިޓީސްހުންނަޖެހޭނީ ކަނޑައެޅޭވަކި ސަރަހައްދެއްގަ. ހޯމްސްޓޭއޭ ކިޔައިގެން ނިދާއެނދު ޝެއާ ކުރަޖެހުނީމަ ދެންދާނީނަސްލު އޮޅިގެން.
ޔޫސުއްބެ
29 December 2021
މިޖީލު ވާވައްދާ ހަލާކު ކޮށްލުމަށް ރާވައިގެން ހިންގާ ޖަރީމާއެއް, ކޮބާތަ ޝޭހުންތައް.. ދޮލަނގުބޮލައްލައިގެން ހިގަނީ ދެއްތޯ?
ބަކުރުބޭ
29 December 2021
އަމާޒަކީ ގައުމު ސުންނާފަތިކުރުން ،،، ތިޔަހޯމްސްޓޭ އިން ނިކުންނާނެ ހިތި ނަތީޖާ ފެނިގެންދާނެ
އައްޔުބެ
29 December 2021
ގައުމު ސުންނާފަތި ވަނީ ބޭރު މީހުން މިތަނަށް ޗުއްޓީއަށް އަންނާތީތަ؟ ނޫނީ އަހަރުމެން ކުރާ ކަންކަމުންތަ؟
ބޭބޭ
29 December 2021
ތިޔަ ވާހަކަ މިހާރަކު ގަބޫލެއް ނުކުރާނެ ގިނަ ބަޔަކު. މާ ފަހުން އެކަމުގެ ގެއްލުން ފެންނާނީ. އޭރުން އޮންނާނީ މާ ލަސްވެފައި. މިހާރު ފެންނާނީ ހަމައެކަނި ޖީބަށް ވަންނަން އުޅޭ ޑޮލަރާ ޕައުންޑުތައް.
ހިލަބެ
29 December 2021
ހޯމްސްޓޭއިން ހަމައެކަނި ލިބޭނީޑޮލަރު ދަރީންގެއަޚްލާޤާއި އަހަރެމެންގެ އަގީދާފާސިދުވެ އާޚިރަތްގެއްލި ގެންދާނެ.
ޕިސްޕިސް
29 December 2021
ކޮބައިތަ ތިޔަބުނާ ހިތި ނަތީޖާއަކީި؟ ޜަށުގެ ކޮންމެވެސް ބަޔަކަށް މިހާރުނުވާ ފައިދާއެއްވެ ކޮންމެވެސް އެއްޗެއް ލިބުންތަ؟
ނަތީޖާ
30 December 2021
ހޯމް ސްޓޭ އިން ދިވެހިން ނަށް ދަސްވާނީ ސިވިލައިޒް މީހުން ހުޅޭ ރީތި ގޮތް. މެނަރސް، ޕޮލައިޓްނަސް، ކެތްތެރިކަން، އެކަކު އަނެކަކަށް ދޫދޭތަން. ތިމާ ނޫން އެހެން މީހުން ވެސް އުޅޭ ކަން ދަނެގެން އެހެން މީހުންނަށް އުނދަގޫ ނުވާ ގޮތަށް އުޅޭތަން. އެހެން މީހުން ޝަޤާފަތާ ފިކުރަށް ރެސްްޕެކްޓްކޮށް، އެކި އެކި ހަފްލާތަކުގައި ހިނިތުން ވުމާއެކު ބައިވެރިވާތަން. މިހާރު ދިވެހިންގެ އުޅުން އެއީ މުޅިން ގޯސް އުޅުމެއް ކަން.