ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގައި އެމްޑީޕީގެ ފަރާތުން ވާދަކުރައްވާ ކެންޑިޑޭޓުގެ ކެމްޕެއިންގެ އިފުތިތާހީ ޖަލްސާ އަށް ރައީސް އިބްރާހިމް މުހައްމަދު ސޯލިހު އެ ރަށަށް މިއަދު ފުރާވަޑައިގެންފި އެވެ.
ސަރުކާރު ހިންގާ ކޯލިޝަންގެ މައި ޕާޓީ އެމްޑީޕީގެ ކެންޑިޑޭޓް މުހައްމަދު ރާޝިދުގެ ކެމްޕެއިން އިފުތިތާހު ކުރުމުގެ ޖަލްސާ އޮންނާނީ މިރޭ 8:30 ގައި ކޮމަންޑޫގެ އެމްޑީޕީ ހަރުގެ ކުރިމަތީގަ އެވެ. އެ ޖަލްސާގައި އެމްޑީޕީގެ އިސް ލީޑަރު އަދި ރައީސް އިބްރާހިމް މުހައްމަދު ސޯލިހުގެ އިތުރުން ބައެއް މިނިސްޓަރުންނާއި ސަރުކާރުގެ ބައެއް ކުންފުނިތަކުގެ ވެރިންނާއި ރައްޔިތުންގެ މަޖިލީހުގެ އެމްޑީޕީގެ މެމްބަރުން ވެސް ބައިވެރިވެވަޑައިގަންނަވާނެ އެވެ.
އެމްޑީޕީގެ ކެންޑިޑޭޓަށް ތާއިދު ހޯއްދެވުމަށް ރައީސް ކޮމަންޑު އަށް ވަޑައިގެންނެވިއިރު، އިދިކޮޅު ޕީޕީއެމްގެ ކެންޑިޑޭޓަށް ތާއިދު ހޯއްދެވުމަށް އެ ޕާޓީގެ އިސްވެރިން ވެސް ވަނީ ރޭ އެ ރަށަށް ވަޑައިގެންފަ އެވެ. އަދި އެމްއެންޕީގެ ކެންޑިޑޭޓު އަބްދުލް ހަންނާންގެ ކެމްޕެއިން ޖަލްސާއެއް ވެސް ރޭ ކޮމަންޑޫގައި ބޭއްވި އެވެ.
އެމްޑީޕީ އާއި އިދިކޮޅު ޕީއެންސީން ވާދަކޮށް 2019 ގައި އެމްޑީޕީން ކާމިޔާބުކުރި ކޮމަންޑޫ ދާއިރާގެ ގޮނޑި ހުސްވީ، އެ ގޮނޑި ކާމިޔާބު ކުރެއްވި ހުސެއިން ވަހީދު ކެންސަރު ބަލީގައި މިދިޔަ ޑިސެމްބަރު މަހު އަވަހާރަވުމާ ގުޅިގެންނެވެ.
ކޮމަންޑޫ ދާއިރާގެ ބައި އިލެކްޝަން އަންނަ މަހުގެ 5 ގައި ބާއްވަން އިއުލާންކުރުމާ އެކު، އެމްޑީޕީ އާއި އިދިކޮޅު ޕީޕީއެމް އަދި އެމްއެންޕީން ވަނީ ކެންޑިޑޭޓުން ނެރެފަ އެވެ.
މި އިންތިހާބަށް ޕީޕީއެމުން ނެރެނީ އެ ޕާޓީގެ ހަރަކާތްތަކުގެ އިސް ސަފުން ފެންނަ ކޮމަންޑު އަށް އުފަން މޫސާ ފަތުހީ އެވެ. އެ ޕާޓީން ގަބޫލުކުރާ ގޮތުގައި، އޭނާ އަކީ ޕީޕީއެމާއި ޕީއެންސީގެ ފިކުރުގެ ތާއީދު އެ ދާއިރާގައި ބޮޑު، އެހެން ކެންޑިޑޭޓުންގެ މައްޗަށް ކުރި ހޯއްދެވޭނެ ބޭފުޅެކެވެ.
އެމްއެންޕީން ވާދަކުރާ ފުރަތަމަ ގައުމީ އިންތިހާބު ކާމިޔާބު ކުރުމުގެ ވާދަވެރިކަން ޕާޓީގެ ތެރޭގައި ބޮޑުއިރު އެ ޕާޓީން ނެރެނީ ކޮމަންޑޫގެ ބޭފުޅެއް ކަމަށްވާ އަބްދުލް ހަންނާން އިދުރީސް އެވެ.
ތިން ޕާޓީން ވެސް ވަރަށް ފޯރީގައި ކޮމަންޑޫ ގޮނޑި ކާމިޔާބުކުރުމަށް ކެމްޕެއިން ކުރަމުން އަންނައިރު އިލެކްޝަންސް ކޮމިޝަނުން އާއްމު ކޮށްފައިވާ ވަގުތީ ލިސްޓުގައިވާ ގޮތުން ފޯކައިދު އާއި މަރޮށި އަދި ކޮމަންޑޫން 3،316 މީހުންނަށް މި ދާއިރާ އަށް ވޯޓުލުމުގެ ހައްގު ލިބިފައި ވެ އެވެ.