"ޒީރޯ" ފްލޮޕްވިޔަސް އާނަންދު އަދިވެސް ޝާހު ބޭނުން

ޝާހްރުކާއި އާނަންދު.

އަހުމަދު އަދްޝަން، މިހާރު

15 ޖެނުއަރީ 2022 - 07:19

ޝާހްރުކް ޚާނާ އެކު ޑައިރެކްޓަރު އާނަންދު އެލް ރާއީ މިހާތަނަށް މަސައްކަތްކުރި ފުރަތަމަ ފިލްމު "ޒީރޯ" ބޮކްސް އޮފީހުގައި ބޮޑުތަނުން ސުމަކުން ދިޔަޔަސް އަދިވެސް ދެ މީހުން އެކީގައި މަސައްކަތްކުރަން ވަރަށް ބޭނުންވާ ކަމަށް އާނަންދު ބުނެފި އެވެ.

މިދިޔަ މަހު ޑިޒްނީ ޕްލަސް ހޮޓްސްޓާ އިން ޕްރީމިއާކުރި ކާމިޔާބު ފިލްމު "އަތުރަންގީ ރޭ" ގެ ޑައިރެކްޓަރު އިންޑިއާ ޓުޑޭ އަށް ދިން އިންޓަވިއުއްގައި ބުނީ 2018 ގައި ގެނެސްދިން "ޒީރޯ" އަކީ މުޅި ޓީމު ހިތާއި ރޫހުން މަސައްކަތްކުރި ފިލްމެއް ކަމަށެވެ. އެކަމަކު އެފިލްމު ބެލުންތެރިންނަށް ކަމުނުދިޔުމަކީ ދެން އަލުން މަސައްކަތް ނުކުރަން ޖެހޭ ސަބަބެއް ވެސް ނޫން ކަމަށެވެ.

ޝާހު ޑްވާފެއްގެ ރޯލު ކުޅުނު އެ ފިލްމަކީ އޭނާ އެންމެ ފަހުން ފެނުނު ފިލްމު ވެސް މެ އެވެ. އުންމީދުކުރި ގޮތާ ހިލާފަށް ފްލޮޕް ބޯޑު ފިލްމުގައި އަޅުވަން ޖެހުމުން ލިބުނު ހިތްދަތިކަމަށް ފަހު، ޝާހު ހުރީ ތިން އަހަރެއްހާ ދުވަސްވަންދެން އެއްވެސް ފިލްމަކަށް ސޮއި ވެސް ނުކޮށް އެކްޓިންއާ ދުރުގަ އެވެ. އަދި އޭގެ ފަހުން އޭނާ ސޮއިކުރި ފުރަތަމަ ފިލްމަކީ 2020 ގެ ފަހުކޮޅު ޝޫޓިން ފެށި "ޕަތާން" އެވެ.

އަނުޝްކާ ޝަރުމާ އާއި ކެޓްރީނާ ކައިފް ބަތަލާގެ ރޯލު ކުޅުނު "ޒީރޯ" އިން ހިތްދަތި ތަޖުރިބާތަކެއް ކުރަން ޖެހުނަސް އާނަންދު ބުނީ ޝާހުއާ އެކީ ކުރި ތަޖުރިބާ ވަރަށް ވެސް ހާއްސަ ކަމަށެވެ. އެހެންވެ އަދިވެސް އޭނާއާ އެކީ ފިލްމު ހަދަން ބޭނުންވާ ކަމަށާއި ޝާހުގެ ފަރާތުން އިޝާރާތެއް ލިބޭ އިރަށް މިހާރު ވެސް އެފަދަ ކަމަކަށް ތައްޔާރަށް ހުރި ކަމަށް ބުންޏެވެ.

"އެކަމަކު އަހަންނަށް ހީވަނީ އަހަރެމެން ދެ މީހުން އެކީގައި މަސައްކަތްކުރަން އަދި ވަގުތުތަކެއް ނަގާނެހެން. އެހެން ވިޔަސް ޝާހުއާ އެކީ ފިލްމެއް ހަދަން އަހަންނަށް ކަމުދާ ކަހަލަ ވާހަކައާ އެކު އަހަރެން މިހާރު ވެސް އޭނަ ގާތަށް ދިޔަޔަސް އެކަމަކަށް އޭނަ ހުންނާނީ ތައްޔާރަށް،" އާނަންދު ބުންޏެވެ.

އޭނާ ބުނީ ފިލްމެއް ފެއިލުވުމަކީ މާ ބޮޑަށް އެކަމާ ފިކުރުކުރަން ޖެހޭ ކަމެއް ނޫން ކަމަށެވެ. އަދި ޝާހަކީ އަބަދު ވެސް ކާމިޔާބީ އާއި ނާކާމިޔާބީ ވަޒަންކުރަން އެނގޭ ތަރިއެއް ކަމަށް ބުންޏެވެ.

"ޒީރޯ ޕްލޮޕްވީމަ އަހަންނަށް ވެސް އެންމެ ބޮޑު ހިތްވަރެއް ދިން މީހަކީ އޭނަ. އެހެންވީމަ ޝާހަކީ ހަމަ ޖާދޫއެއް ކަހަލަ މީހެއް،" އާނަންދު ބުންޏެވެ. "އެ ޖާދުލަކަށް ނިމުމެއް ވެސް ނާންނާނެ."

Shah Rukh Khan ge Zero ge screenplay ah sumeh

The most trusted news source in the Maldives

Mihaaru

އަކްޝޭ ކުމާރާއި ސާރާ އަލީ ޚާނާއި ދަނޫޝްއާ އެކު ގެނެސްދިން "އަތުރަންގީ ރޭ" އަށް ފަހު، ރިލީޒްކުރަން އޮތް އާނަންދުގެ އާ ފިލްމަކީ އަކްޝޭ ކުޅެފައިވާ "ރަކްޝާ ބަންދަން" އެވެ. މި އަހަރު އެ ފިލްމު ރިލީޒްކުރާނެ އެވެ.

އާނަންދަކީ ވަރަށް ކާމިޔާބު ފިލްމުތަކެއް ގެނެސްދީފައިވާ އިންޑިއާގެ އެންމެ ހުނަރުވެރި އެއް ޑައިރެކްޓަރެވެ. އޭނާގެ އެންމެ ކާމިޔާބު ފިލްމުތަކަކީ ކަންގަނާ ރަނާވަތު ކުޅުނު "ތަނޫ ވެޑްސް މަނޫ" ގެ ދެ ފިލްމާއި ސޯނަމް ކަޕޫރާއި ދަނޫޝްގެ "ރާންޖަނާ" އެވެ.