އޮސްކާ ބޮއިކޮޓްކުރި އީރާނުގެ ޑައިރެކްޓަރު އެ އެވޯޑަށް ތައްޔާރުވަނީ

އީރާނުގެ ޑައިރެކްޓަރު އަސްގަރު ފަރުހާދީ.-- ފޮޓޯ: ރޮއިޓާސް

06 ފެބުރުއަރީ 2022 - 06:02

އޮސްކާ އެވޯޑަށް ނޮމިނޭޓް ވިޔަސް، ކުރިން އެ އެވޯޑް ބޮއިކޮޓްކުރި އީރާނުގެ ޑައިރެކްޓަރު އަސްގަރު ފަރުހާދީ މި އަހަރުގެ އޮސްކާ އަށް ތައްޔާރުވާން ފަށައިފި އެވެ.

ފަރުހަދީ 2017 ގެ އޮސްކާ ބޮއިކޮޓް ކުރީ، އެމެރިކާގެ ކުރީގެ ރައީސް ޑޮނާލްޑް ޓްރަމްޕް، އީރާން ހިމެނޭ ގޮތަށް، މުސްލިމު ހަތް ގައުމަކުން އެ ގައުމަށް ދަތުރު ނުކުރެވޭނެ ގޮތް ހެދުމުން، އެކަމާ ހިތްހަމަނުޖެހިގެންނެވެ.

އޮސްކާގެ ފޮރިން ލޭންޖުއޭޖް ކެޓަގަރީ އަށް ފަރުހަދީ ޑައިރެކްޓްކުރި "ދަ ސޭލްސްމަން" އެ އަހަރު ނޮމިނޭޓްވެ، އެ އެވޯޑް ކާމިޔާބު ވެސް ކުރި އެވެ.

އޭނާ މިދިޔަ އަހަރު ގެނެސްދިން އާ ފިލްމު "އަ ހީރޯ" ވަނީ މި އަހަރުގެ އޮސްކާ އަށް ވާދަކުރަން ހުށަހަޅައިފަ އެވެ. އެ ފިލްމު ނޮމިނޭޓް ވެއްޖެ ނަމަ، އެއީ ވަރަށް ތަފާތު ތަޖުރިބާއަކަށް ވާނެ ކަމަށާއި އެ އެވޯޑަށް ތައްޔާރުވަމުން އަންނަ ކަމަށް އޭނާ ބުންޏެވެ.

"އަ ހީރޯ" އަށް ވަނީ އެންމެފަހުން ބޭއްވި ކާންސް ފިލްމު ފެސްޓިވަލްގައި ވެސް ވަނައެއް ލިބިފަ އެވެ. އެ ފިލްމުގައި ދައްކަނީ ރަހިމް ކިޔާ ގައިދީއަކު ޖަލު ބަންދުން ސަލަމާތްކުރުމަށް، އޭނާ އިންނަން އުޅޭ އަންހެން މީހާ ހޯދާ ރަން ފައިސާ ފޮތިތަކެއް ވިއްކާލަން އުޅުމުގެ ތެރޭގައި ދިމާވާ ތަފާތު ކަންތައްތަކެކެވެ.

އެ ފިލްމު މިހާރު އެމެޒަން ޕްރައިމް ވީޑިއޯއިން ސްޓްރީމް ކުރެވެ އެވެ.

ފަރުހަދީގެ އެންމެ މަޝްހޫރުވި އެއް ފިލްމަކީ 2011 ގައި ގެނެސްދިން "އަ ސެޕަރޭޝަން" އެވެ. އެ ފިލްމަށް އެ އަހަރުގެ ބާލިން ފިލްމު ފެސްޓިވަލްގައި ޝަރަފުވެރި އެވޯޑެއް ކަމަށްވާ ގޯލްޑެން ބިއާ އެވޯޑް ލިބުނެވެ.