ޕާކިސްތާނުގެ މޮޑެލް ގަންދީލް ބެލޮޗް އާއި އޭނާ މަރާލި ކަމަށް އެއްބަސްވި އޭނާގެ ބޭބެ ވަސީމް އަޒީމް.
17 ފެބުރުއަރީ 2022 - 06:32
3 comments
ޕާކިސްތާނުގެ މަޝްހޫރު މޮޑެލްއެއް ކަމަށްވާ ފައުޒިއާ އަޒީމް ނުވަތަ އާންމު ނަމުން ނަމަ، ގަންދީލް ބެލޮޗް މަރާލި ކަމަށް އެއްބަސްވެ، އުމުރު ދުވަހުގެ ޖަލު ހުކުމް އިއްވާފައިވާ އޭނާގެ ބޭބެ ކޯޓުން މިދިޔަ އަންގާރަ ދުވަހު މިނިވަންކޮށްފި އެވެ.
ޕާކިސްތާނުގެ ނޫސްތަކުގައި ބުނެފައިވާ ގޮތުގައި ގަންދީލްގެ ބޭބެ، ވަސީމް އަޒީމް މިނިވަންވީ އޭނާގެ މައިންބަފައިން އޭނާގެ އެ ކުށަށް މާފުދިނުމުންނެވެ.
"އަހަރެންގެ ފިރިހެން ދަރި މިނިވަންވީމަ ވަރަށް އުފާވޭ. އެކަމަކު އަހަރެންގެ އަންހެން ދަރިފުޅު ވަކިވުމުން އެކަމުގެ ހިތާމަ ވެސް އެބަ އޮތް،" އެ ދެބެއިންގެ މަންމަ އަންވަރު ބިބީ ކޯޓުގެ ނިންމުމަށް މަރުހަބާ ކިޔާ ނޫހަށް ދިން އިންޓަވިއުއެއްގައި ބުނެފައިވެ އެވެ.
ޕާކިސްތާނުގެ މޮޑެލް ގަންދީލް ބެލޮޗް.
ގަސްތުގައި މީހަކު މާރާލި ކަމުގެ ކުށް ސާބިތުވެ، ވަސީމް އުމުރު ދުވަހަށް ޖަލަށްލީ 2019 ވަނަ އަހަރު އެވެ. ވަސީމް އޭނާގެ ކޮއްކޮ، ގަންދީލް 2016 ވަނަ އަހަރު މަރާލީ ދަންޖައްސައިގެންނެވެ.
ސޯޝަލް މީޑިއާއިން ގިނަ ބައެއްގެ މަގުބޫލުކަން ހޯދައި، ގަންދީލް ފާހަގަކުރެވުނީ ޕާކިސްތާނުގެ ޒަމާންވީ ބޯދާ ވިސްނުންތަކާ ވަރަށް ފާޅުގައި ދެކޮޅު ހެދި މީހެއްގެ ގޮތުގަ އެވެ. އެ ގައުމުގައި މީހުން ވާހަކަދައްކަން ވެސް ނުކެެރޭ ބައެއް މައްސަލަތަކަށް އޭނާ ވަރަށް ފާޅުގައި ފާޑުކިޔެވެ. އަދި އޭނާ ސޯޝަލް މީޑިއާގައި އާންމުކުރާ މޮޑެލިން ފޮޓޯތަކުގެ ސަބަބުން ވެސް ބައެއް މީހުން ވަރަށް ނުރުހުނެވެ.
ގަންދީލް މަރާލީ އޭނާ ފޭސްބުކްގައި އާންމުކުރި ފޮޓޯއެއްގެ ސަބަބުން ކަމަށް ވަސީމް އޭނާގެ ކުށުގެ އިއުތިރާފުގައި ބުނެފައިވެ އެވެ. އެއީ ޕާކިސްތާނުގެ މުފްތީ އަބްދުލް ގާވީއާ އެކު ގަންދީލް ނެގި ސެލްފީއެއްގެ ސަބަބުންނެވެ. ވަސީމް ބުނީ އެއީ "ލަދު ހަޔާތް ކެނޑިގެން" އޭނާގެ ކޮއްކޮ އާންމުކުރި ފޮޓޯތަކެކެވެ.
ޕާކިސްތާނުގެ މޮޑެލް ގަންދީލް ބެލޮޗް މަރާލި ކަމަށް އެއްބަސްވި އޭނާގެ ބޭބެ ވަސީމް އަޒީމް.
"އަހަރެން ފުރަތަމަ އޭނާ އަށް ބޭސް ދީގެން ހޭ ނައްތާލީ. އެއަށް ފަހު މަރާލީ،" ވަސީމްގެ އިއުތިރާފުގައި ބުނެފައިވެ އެވެ. "އަންހެން ކުދިން އުފަންވަނީ ގޭގައި ތިބެ، ސަގާފަތާ އެއްގޮތަށް ދިރިއުޅެން. އަހަރެންގެ ކޮއްކޮ އުޅުނީ އެގޮތަށް ނޫން."
ގަންދީލް މަރާލި މައްސަލައިގައި ޕާކިސްތާނުގެ މަޝްރަހު އެ ދުވަސްވަރު ވަރަށް ބޮޑަށް ހޫނުވެ، އެ ގައުމުގެ ގާނޫނު ހަދާ މަޖިލީހުން ވަނީ އޭނާގެ މަރުގެ ތިން މަސް ފަހުން އާއިލާގެ ނަން ހަރާބުވިޔަނުދިނުމުގެ ނަމުގައި އަންހެން ކުދިންނާއި އަންހެނުން މެރުން ބޮޑު ކުށަކަށް ހަދައި ގާނޫނެއް ފާސްކޮށްފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އިޙްސާސް
17 February 2022
މީހެއްގެ ފުރާނަ އަނެކާ ދުއްވާލުމަކީ ފާފައެއް ގިޞާޞް ހިފޭ ކަމެއް. އަދި ހަމައެހެންމެ ހެދުންލައިގެން ވެސް އޮރިޔާމުން އުޅުމަކީ އަންހެނަކަސް ފިރިހެނަކަސް ކޮށްގެންވާނެ ކަމެއްނޫންކަން އިސްލާމްދީން އެއޮތީ އަހަރެމެންނަށް އުނގަންނައިދީފަ. އަންހެނުންނަށް އެކަނބަލުންގެ ޙައްގުތައް ފުރިހަމައަށް އިސްލާމްދީން ކަށަވަރުކޮށްދޭ. އެއަށް ޝުކުރުވެރިނުވެ ހަޖޫޖަހާ ހަދަނީ ފިތުނަ އުފައްދަންއުޅޭ ޝައިތާނާ އާއި އޭނާގެ ބައިވެރިން. ތިޔަ ދެމީހުންގެ ފާފަ ފުއްސަވާފާންދޭވެ.
ށަވިޔަނި
17 February 2022
ތިފަދަ ނާތަހުޒީބު ކަންތައް ފެށިގެން އަންނަނީ އަފްޣާނިސްތާނުން. ތިރިއަށް ޕާކިސްތާނު އޭގެ ތިރިއަށް ނުވަތަ އަރިމަތިން އިންޑިއާ. ދީނާ ގުޅުންހުރިކަމެއްނޫން. އަންހެނުން ފިއްތައި ފިރިހެނުންގެ އަޅުވެތކަމުގެ ދަށުގައި ބޭތިއްބުމުގެ ސަގާފަތެއްގެ ދަށުން ކުރާކަމެއް. އޭނަވެސް އެބުނީ އެހެން.
މުޙައްމަދު123
17 February 2022
އެކަން ފެށިގެން އައީ އިންޑިޔާއިން. ޕާކިސްތާނާއި އަފުޣާނިސްތާނަށް ވެސް އެ ސަގާފަތް ދިޔައީ އިންޑިޔާއިން. އަންހެނުން ނިކަމެތިކޮށް ފިރިމީހާ މަރުވުމުން އަނބިމީހާވެސް އަންދައި، ނުވަތަ ފިރިމީހާގެ ބޭބެއިން ކޮއްކޮއިންނާ އިންނަން އެ އަންހެނާއަށް މަޖުބޫރުކޮށް، އަންހެންދަރިން މަރައި، އެސިޑުޖަހައި ހަދަނީ އެމީހުން. ކީއްވެގެންތަ ހަގީގަތް ހާމަކުރަން ނުކެރެނީ. ކޮންމެ ކަމެއް މުސްލިމުންގެ ބޮލަށް ކަނޑާލާކަށް ނުޖެހޭ.