ހައި ކޯޓް: އަލިދޫ ރިސޯޓްގެ ކުއްޔާއި ޖޫރިމަނާއަށް 29 މިލިއަން ޑޮލަރު ދައްކަން ކުރި ހުކުމް ވަނީ ދަމަހައްޓާފައި --- ފޮޓޯ/މިހާރު
17 ފެބުރުއަރީ 2022 - 20:59
15 comments
ހއ. އަލިދޫ ރިސޯޓްގެ ކުއްޔާއި ޖޫރިމަނާގެ ގޮތުގައި 29 މިލިއަން ޑޮލަރު (447 މިލިއަން ރުފިޔާ) ދައްކަން ޔޮޓް ޓުއާސްގެ މައްޗަށް ކުރި ހުކުމް ހައި ކޯޓުން ވެސް ދަމަހައްޓައިފި އެވެ.
ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރުގެ މަސްލަހަތު އޮންނަ ޔޮޓް ޓުއާސް ކުންފުނިން ކުރިން ހިންގި އަލިދޫ ރިސޯޓްގެ ކުއްޔާއި އެ ފައިސާ ނުދެއްކުމުން އަރާފައިވާ ޖޫރިމަނާ ހޯދަން މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ދައުވާ ކުރުމުން ސިވިލް ކޯޓުން 2018 ވަނަ އަހަރު ހުކުމްކުރީ އެ ފައިސާ އެއް އަހަރުގެ ތެރޭގައި ދެއްކުމަށެވެ. އެއީ ކުއްޔަށް 5.6 މިލިއަން ޑޮލަރާއި ޖޫރިމަނާއަށް 23.4 މިލިއަން ޑޮލަރެވެ.
އެ މައްސަލަ ޔޮޓް ޓުއާސް ކުންފުނިން އިސްތިއުނާފް ކުރުމުން ހައި ކޯޓުން އިއްޔެ ކުރި ހުކުމުގައިވަނީ ރިސޯޓްގެ ކުލީގެ ގޮތުގައި ޖޫރިމަނާގެ ގޮތުގައި ދަށު ކޯޓުން ނަގައިދިން މިންވަރަކީ މާ ބޮޑު އަދަދެއް ކަމަށް ކަމަށް ޔޮޓް ޓުއާސްއިން ބުންޏަސް، އެއީ ގަވާއިދު އޮތް ގޮތުން ޖޫރިމަނާއަށް ނެގޭ މިންވަރު ކަމަށެވެ. ރިސޯޓްތަކުގެ ކުލި ނެގުމުގެ ގަވާއިދު އޮތްގޮތުން ކުލި ނުދައްކާ ކޮންމެ ދުވަހަކަށް 0.5 ޕަސެންޓްގެ ރޭޓުން ޖޫރިމަނާ ނެގޭނެ ކަމަށް އެ ހުކުމުގައިވެ އެވެ.
މީގެ އިތުރުން އަލިދޫ ރިސޯޓް ކުއްޔަށް ދިނުމުގެެ އެއްބަސްވުމުގައި ވެސް ޖޫރިމަނާ އޮތީ އެ މިންވަރަށް ކަމަށާއި އަދި އެއީ އެހެން ރިސޯޓްތަކުގެ ކުލި ނުދެއްކުމުން ވެސް ޖޫރިމަނާގެ ގޮތުގައި ނަގަމުންދާ މިންވަރު ކަމަށް އެ ހުކުމުގައިވެ އެވެ. އަދި ރިސޯޓް ކުލި ނެގުމުގެ ގަވާއިދުގެ އެ މާއްދާ ބާތިލް ނުކުރާހާ ހިނދަކު، އެއީ ޖޫރިމަނާގެ ގޮތުގައި ނަގަން އެކަށީގެންނުވާ އަދަދެއް ކަމަށް އެ މައްސަލާގެ ތެރެއިން ހައި ކޯޓަށް ނުނިންމޭނެ ކަމަށް އެ ހުކުމުގައިވެ އެވެ.
ހުކުމުގައިވަނީ މޫސުން ގޯސްވެ، ލިބުނު ގެއްލުންތަކަކާ ގުޅިގެން އަލިދޫ ރިސޯޓް 2014 ވަނަ އަހަރު ބަންދުކުރި މުއްދަތަށް ކުއްޔާއި ޖޫރިމަނާ ނެގުން ހުއްޓުވެން ނެތް ކަމަށް ސިވިލް ކޯޓުން ކޮށްފައިވާ ހުކުމަށް ހައި ކޯޓުން ކުރިން ތާއީދު ކޮށްފައިވާ ކަމަށެވެ. އަދި ޔޮޓް ޓުއާސްއިން ދަށު ކޯޓަށް ހާޒިރުކުރަން އެދުނު ހެކިން ހާޒިރު ނުކޮށް އޮތަސް، އެއީ ދަށު ކޯޓުގެ ނިންމުމަށް ބަދަލު ގެންނަންޖެހޭ ސަބަބެއް ނޫން ކަމަށް ވެސް ހައި ކޯޓުގެ ތިން ފަނޑިޔާރުންގެ އިއްތިފާގުން ކުރެއްވި އެ ހުކުމުގައިވެ އެވެ.
ހައި ކޯޓުން އެ މައްސަލަ ބެއްލެވީ ފަނޑިޔާރު އަލީ ސަމީރާއި ފަނޑިޔާރު ހަސަން ޝަފީއުގެ އިތުރުން ފަނޑިޔާރު ފާތިމަތު ފަރުހީޒާ އެވެ. އެ ބެންޗުގެ ރިޔާސަތު ބެލެހެއްޓެވީ ފަނޑިޔާރު ސަމީރެވެ.
އަލިދޫ ރިސޯޓުގެ ކުއްޔަށް 29 މިލިއަން ޑޮލަރު ދައްކަން ކުރި ހުކުމް ދެމެހެއްޓިއިރު، އެ ރިސޯޓަށް ލިބުނު ގެއްލުންތަކުގެ އިންޝުއަރެންސްގެ ގޮތުގައި 22 މިލިއަން ޑޮލަރު އެ ކުންފުންޏަށް ދޭން އެލައިޑްގެ މައްޗަށް ސިވިލް ކޯޓުން އޮތީ ހުކުމްކޮށްފަ އެވެ. އެ މައްސަލާގެ އިސްތިއުނާފް ހައި ކޯޓުގައި މިހާރު ދަނީ ހިނގަމުންނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ނަޓީ
18 February 2022
ޔޮޓްޓުއަރސް ސަލާމަތްނުވިއަސް ޖާބިރު އަބަދުވެސް ހުންނާނީ ސަލާމަތުން މިވެރިކަން އޮތްހާ ދުވަހަކު.
މާ ބިރު
18 February 2022
29 އިން 22 ކެނޑީމަ ޖާ ބިރު ޖައްކަން ޖެހޭނީ 7 މިލިއަންތާ! އެ ލޯނަކުން ހަމަޖައްސަދޭނެ. އަހަރެމެން ނިކަމެތިން ސަރުކާރުން ފުނޑާލާނީ
އެމީލް
18 February 2022
ސުޕްރީމްކޯޓުން މިދޭތެރެއިން ހުކުމްނުކުރޭތަ މީރާއަށް ރިޒޯޓުކުލިހޯދަން ދައުވާނުކުރެވޭނެކަމަށް. މީރާގެ މެންޑޭޓަކީ ހަމައެކަނި ޓެކްސްކަން؟ އަދި ޖޫރިމަނާވެސް ވަކިހުދޫދެއް ކަނޑައެޅިނޫންތަ؟ ހަމަ އަރަމުން އަރަމުން ދާވަރަކަށް ނަގައިނުދެވޭނެކަމަށް ހުކުމްކުރިޔޭ ކިޔާފައި ޚަބަރުގައި އޮއްވާ ފެނުނުހަނދާނެއްވޭ.
ޖާބިރް ބިން ހެވަން
18 February 2022
މިކަމައް މިވަގުތު ދެން ބޭނުންވާނީ ދެބޯގެރިދުއްވާ ވާހަކައެއް ހަދަން، ނޫނީ ސްކްރިޕްޓް އެއް ކުޅެލަން. ކާކުބާ މިފަހަރު ސްޓޯރީގައި ވިކްޓިމް އަކައް ވާނީ؟ މަށައް ޔަގީން ކަމަކީ ތި ފައިސާއެއް ނުލިބޭނެ، ނުވެސް އަތުލެވޭނެ، އަދި ނުވީތާކައް ތިކަމުގެ ސަބަބުން އެބޭފުޅާއައް ލިބޭނެ ނަފްސާނީ ބަލި ތަކައް، ދައުވާވެސް ކުރާނެ.
އަލިބޭ
18 February 2022
މިމީހުންގެފެންވަރު. އަދިވެސް ރައްޔިތުންނަށް މާރަގަޅުމީހަކަށް ވެގެންއަޅޭތި. ވަރަށްރަގަޅު ހުކުމެއް. ކޮބާބާ އަލީޝިޔާމު ދައްކަންޖެހޭ ކުއްޔާޖުރިމަނާގެ ލާރިގަނޑު.
ޚުރުސީ
17 February 2022
އަވަހަށް މައުމޫނާއި އަނެއްކާ ދިމާކޮށްލާ!! ސަރުކާރު ބަދަލު ކުރަން ލާރި ތެޅިޔަސް ވީ ފައިދާއެއްނެތް!!
ރައްދު
17 February 2022
މަޖްލީހުގަ ބޮޑެތި ދަރަނިވެރިން ތިބިޔަ ދީގެން ނުވާނެ... ޖާބިރު މަޖްލީހުން ވަކިކުރަން ޖެހޭ... އަމިއްލަ ފަރުދަކު ވެއްޖެއްޔާ ކިރިޔާ ޕެއިމަންޓެއް ލަސްވިޔަސް ފިޔަވަޅު އަޅާ، މިތިބަ ސިޔާސީ މީހުން މިތިބެނީ ދަރާ ވިކިފަ، މަޖްލީހުގަ މިކަހަލަ މީހުން ބެއިތިއްބުމަކީ ކޮރަޕްޝަންގެ މިސާލެއް
އަސްތާ
18 February 2022
މަޖްލިހުން ބޭރުވާއިރަށް ރައީސް އޮފީހުން ބޮޑެތި މަގާމު ދޭން ޖެހޭ މީހުން އެއީ.
ކުޗީ
17 February 2022
ކޮންމެ ދުވަހަކަށް 0.5 ޕަސެންޓް ގެ މާނައަކީ މަހަކު %15. ގާނޫނު ތަކާއި ގަވާއިދު ހަދާ މީހުން މިތިބެނީ ހަމާހޭގަތަ. އާމު ގޮތަކެއްގަައި ޓެކްސް ޖޫރިމަނާ ރޭޓް އުޅޭނީ %5 ގައި އަދި މިއީ ވަކި މުއްދަތަކަށް ނެގޭ ޖޫރިމަނާއެއް. މިގައުމުގައި މުޅި އުމުރަށް ދަނީ އިތުރުވަމުން. ހީހީ ހަލާކު.
ބެނީ
18 February 2022
މިއީ ޤާނޫނަކުން/ގަވާއިދަކުން ދައްކަންޖެހޭ އެއްޗެއްނޫން. މިނކސްޓްރީއާއި ރިޒޯޓު ކުއްޔަށްހިފާފަރާތުން ވެފައިވާ އެއްބަސްވުމުގެ ދަށުން ނަގާ ޖޫރިމަނާއެއް.
ސުވާލު
17 February 2022
އެދުވަހު އެހައިވަރުއަރުވާލައި، މިހާރު ހައްޕުކިއުއްވައިގެން އެއުޅުއްވަނީ މިކަމާހެދިބާ؟ ކިހާވަރަކުން ދާނެބާ؟
ހަސަން ކުރުސިއްޔު
17 February 2022
މިވަރުމީހަކު ކާށިދޫއަށް ބިލިޔަން ޑޮލަރު އިންވެސްޓުމެންޓުކުރާނަމޭ ބުނީ.
ކުރުސޭ
18 February 2022
ބުނެގެން އެހުރީ ހޮވިފަ..
އަނެއްކާ
18 February 2022
އެވަރުގެ މީހެއް ނޫންތަ ރައީސުލްޖުމްހޫރިއްޔާގެ އެޑްވައިޒަރަކަށްވެސް ހަމަޖައްސާފަ ހުރީ. ވެރިކަމުގެ އަސްލު ކުލަ ފެންނާނީ އެހެރަ އެހެރަ ކަހަލަ ކަންކަމުން.