ސެރީނާގެ ނަމުގައި ނިއު ޔޯކް ޓައިމްސްގައި ޖެހީ އޭނާގެ ދައްތަގެ ފޮޓޯއެއް

ސެރީނީ ވިލިއަމްސްއާ އެކު އޭނާގެ ދައްތަ ވީނަސް ވިލިއަމްސް.

04 މާޗް 2022 - 06:56

މަޝްހޫރު ޓެނިސް ކުޅުންތެރިޔާ ސެރީނާ ވިލިއަމްސްގެ ނަމުގައި ނިއު ޔޯކް ޓައިމްސްގެ ޚަބަރެއްގައި އޭނާގެ ދައްތަ ވީނަސް ވިލިއަމްސްގެ ފޮޓޯއެއް ޖެހުމުން އޭނާ ހިތްހަމަނުޖެހިއްޖެ އެވެ.

އަލަށް ފަށާ ވިޔަފާރީތަކަށް ސަޕޯޓްކުރުމުގެ ގޮތުން ސެރީނާ އުފައްދާފައިވާ "ސެރީނާވެންޗާސް" ފަންޑަށް 111 މިލިއަން ޑޮލަރު އެއްކުރި ޚަބަރު ނިއު ޔޯކް ޓައިމްސް އިން އިއްޔެ ގެނެސްދިން އިރު، އެ ޚަބަރު ޕްރިންޓް ނޫހުގައި ޖެހި އިރު ބޭނުންކޮށްފައި ވަނީ ވީނަސްގެ ފޮޓޯއެކެވެ. އެކަމަކު އޮންލައިންގައި ފޮޓޯ އިނީ ރަނގަޅަށެވެ.

އެކަމާ ހިތްހަމަނުޖެހި ޕްރިންޓް ނޫހުގެ ފޮޓޯއަކާ އެކު ސެރީނާ ކުރި ޓުވީޓެއްގައި ބުނީ މީހާ ކިތައްމެ ކުރިއަރައިގެން ދިޔަސް ދައްކޮށްލުމުގެ ގޮތުން ތަފާތު ކަންކަން ކުރިމަތިކުރުވާ ކަމަށާއި އަދިވެސް މީހާ އަށް ކަމެއް ނުވާކަން ދެއްކުމަށް ބަޔަކު މަސައްކަތް ކުރާ ކަމަށެވެ.

No matter how far we come, we get reminded that it's not enough. This is why I raised $111M for @serenaventures. To support the founders who are overlooked by engrained systems woefully unaware of their biases. Because even I am overlooked. You can do better, @nytimes. pic.twitter.com/hvfCl5WUoz
— Serena Williams (@serenawilliams) March 2, 2022

ސެރީނާވެންޗާސް ފެށީ ސިސްޓަމްގެ ތެރޭގައި ހުރި އެ ކަހަލަ ތަފާތުކުރުންތަކުން އެކަހެރިކޮށްލާފައިވާ ފަރާތްތަކަށް އެހީވުމުގެ ގޮތުން ކަމަށާއި އެ ތަފާތުކުރުން އަދިވެސް އޭނާ އަށް އަމާޒުވާ ކަމަށް ބުނެ، ސެރީނާ ވަނީ ނިއު ޔޯކް ޓައިމްސް ޓެގުކޮށް ފާޑުކިޔައިފަ އެވެ.

އެ ޓުވީޓަށް ރިޕްލައިކޮށް، ނިއު ޔޯކް ޓައިމްސް އިން ވަނީ އެއީ އެމީހުންގެ "މިސްޓޭކެއް" ކަމަށް ބުނެފަ އެވެ. އެއީ އޮޅިގެން ކުރެވުނު ކަމެއް ކަމަށާއި އެކަން އިސްލާހުކޮށް މިއަދުގެ ނޫހުގައި ރަނގަޅު ފޮޓޯއާ އެކު އެ ޚަބަރު އަލުން ޖަހާނެ ކަމަށް ވެސް އެ ނޫހުން ބުންޏެވެ.

މީގެ ކުރިން އެހެން ބައެއް ނޫސްތަކުގައި ވެސް އެމެރިކާގެ ކަޅު ނަސްލުގެ މީހުންގެ ނުބައި ފޮޓޯތައް ނޫސްތަކުގެ ޖެހި މައްސަލަތައް ފެންމަތިވެފައިވެ އެވެ.