ނުކުޅެދުންތެރިކަން ހުންނަ ކުދިންނަށް ފަރުވާ ދިނުމަށް ހާއްސަ ސެންޓަރެއް، ހުޅުމާލެ ހޮސްޕިޓަލްގައި މިއަދު ހުޅުވައިފި އެވެ. އެތަން ހުޅުއްވައިދެއްވީ ރައީސް އިބްރާހިމް މުހަންމަދު ސޯލިހެވެ.
އަށާރަ އަހަރުން ދަށުގެ ކުދިންނަށް ހާއްސަ ސެންޓަރުން ޖިސްމާނީ، ވިސްނުމުގައި އުނިކަމާއި އުނގެނުމުގައި ދަތިކަން ހުންނަ ކުދިން އަދި ސިކުނޑިއާ ނާރުތަކުގެ ބަލިތައް ތަހައްމަލް ކުރަމުންދާ ކުދިންނާއި ވާހަކަދެއްކުމުގައި ދަތިތައް ހުންނަ ކުދިންނަށް ފަރުވާދޭނެ އެވެ.
އެ ސެންޓަރުގައި 67 ކުއްޖަކު ރެޖިސްޓްރީވެ، މިހާރު އަންނަނީ ހިދުމަތް ހޯދަމުންނެވެ.
އެ ރަސްމިއްޔާތުގައި ނައިބު ރައީސް ފައިސަލް ނަސީމް ވިދާޅުވީ ޗައިލްޑް ޑިވެލޮޕްމަންޓް ސެންޓަރުން ލިބޭ ހިދުމަތްތަކަކީ މީގެ ކުރިން ރާއްޖޭގައި ހޯދަން އުނދަގޫ ހިދުމަތްތަކެއް ކަމަށެވެ. އެހެންވެ، ކުޑަކުދިންނަށް ހާއްސަ ސެންޓަރެއް ހުޅުވުމުން އެ ހިދުމަތް ހޯދާ އާއިލާތަކަށް ވަރަށް ބޮޑު ލުއި ފަސޭހަތަކެއް ލިބޭނެ ކަމަށް އެ މަނިކުފާނު ވިދާޅުވި އެވެ.
އެ ސެންޓަރުގެ ހިދުމަތް ފުޅާކޮށް، ކުރިއަށް އޮތް ތަނުގައި ރާއްޖޭގެ އުތުރާއި ދެކުނުގައި އެފަދަ ސެންޓަރުތަކެއް ގާއިމްކުރެވިގެންދާނެ ކަމަށް ނައިބު ރައީސް ވިދާޅުވި އެވެ.