49 ޕަސެންޓު މަސައްކަތް ނިންމައި މަޖިލިސް ޗުއްޓީ އަށް!

މޫސާ ރަޝީދު، މިހާރު

26 އެޕްރީލް 2022 - 12:36

ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރު ނިންމައި މެމްބަރުން ޗުއްޓީ އަށް ވަޑައިގެންފި އެވެ.

މަޖިލީހުގެ ގަވައިދުގައިވާ ގޮތުން ފުރަތަމަ ދައުރުގެ ޖަލްސާތައް ކުރިޔަށް ގެންދާނީ ފެބްރުއަރީ މަހުން ފެށިގެން އޭޕްރިލް މަހުގެ ނިޔަލަށެވެ. އެ އަށް ފަހު އެއް މަސް ދުވަހުގެ ޗުއްޓީއެއް މެމްބަރުންނަށް ލިބޭނެ އެވެ.

ފުރަތަމަ ދައުރުގެ ޖަލްސާތައް އިއްޔެ ނިންމައިލިއިރު، މަޖިލީހުން އާންމު ކުރި ތަފާސްހިސާބުތައް ދައްކާ ގޮތުން ސަރުކާރުން މަޖިލީހަށް ފޮނުވި 28 ބިލުގެ ތެރެއިން ނިންމީ އަށް ބިލެއްގެ މަސައްކަތެވެ. އަދި ހުށަހެޅި 10 ގަރާރުގެ ތެރެއިން ދެ ގަރާރެއްގެ މައްސަލަ ނިންމި އެވެ. ސަރުކާރުން ހުށަހެޅި އެހެން އަށް މައްސަލައެއްގެ ތެރެއިން ހަތް މައްސަލައެއް މަޖިލީހުން ވަނީ ނިންމައިފަ އެވެ.

މި އަހަރުގެ ފުރަތަމަ ދައުރުގައި ވަނީ އެކި މައްސަލަތަކާ ގުޅޭ 49 ސުވާލު ސަރުކާރަށް ފޮނުވައިފަ އެވެ. އޭގެ ތެރެއިން ނިމުނީ 26 ސުވާލަކާ ގުޅޭ ކަންތައްތަކެވެ. އަދި 170 ކޮމިޓީ ބައްދަލުވުން ކުރިޔަށް ގެންދިޔަ ކަމަށް މަޖިލީހުގެ އިދާރާ އިން ބުންނެވެ.

މިދިޔަ ދައުރުގައި މަޖިލީހަށް ޖުމުލަ ހުށަހަޅާފައި ވަނީ 131 މައްސަލަ އެވެ. އޭގެ ތެރެއިން ނިމިފައި ވަނީ 65 މައްސަލަ އެވެ. ޖުމުލަ މަސައްކަތުން ހާސިލް ކުރެވުނީ 49.6 ޕަސެންޓު ކަމަށް ވެސް ތަފާސްހިސާބުތަކުން ދައްކަ އެވެ.