މި އަހަރުގެ ބައިނަލްއަގްވާމީ ކުޑަކުދިންގެ ދުވަސް ފާހަގަކުރުމުގެ ގޮތުން އެސްޓީއޯގެ މުވައްޒަފުން، މިއަދު އޮފީހަށް ނުކުތީ އެ މީހުންގެ ދަރިން ވެސް ގޮވައިގެންނެވެ.
ދުވަހުގެ އެންމެ ހާއްސަ ކަމަކީ އެ ކުންފުނީގެ މުވައްޒަފުން މަސައްކަތު މާހައުލުގައި ވެސް ދަރިންނާ އެކު ވަގުތު ހޭދަކުރުން ކަމަށް ވާތީ، ހެޑް އޮފީހުގެ އެކު ފްލޯތަކުގައި ކުޑަކުދިންނަށް ކުޅެވޭނެ ގޭމްތައް ތައްޔާރުކޮށްފައި ހުއްޓެވެ. އެ އޮފީސްތެރެ ވެސް އޮތީ ކުޑަކުދިންގެ ދުވަހާ ގުޅުވައިގެން ވަރަށް ބޮޑަށް ޒީނަތްތެރި ކޮށްފަ އެވެ.
އެސްޓީއޯ އިން ބުނީ، މިފަދަ ކަމެއް ކުރީ، ކުޑަކުދިންގެ ދުވަހާ ގުޅުވައިގެން އެ ކުދިންނަށް މަންމަ ނުވަތަ ބައްޕަގެ މަސައްކަތު މާހައުލު ދައްކާލައި އުފާވެރިކަމާ އެކު ކުޑަކުދިންގެ ދުވަސް ހޭދަކުރަން ފަހިކޮށްދިނުމަށް ކަމަށެވެ.
ރާއްޖޭގައި ކުޑަކުދިންގެ ދުވަސް ފާހަގަކުރުމަށް ކޮންމެ އަހަރެއްގެ މޭ 10 ކަނޑައެޅީ 1979 ވަނަ އަހަރު އެވެ. އޭގެ ފަހުން ކޮންމެ އަހަރަކު ވެސް މި ދުވަސް އަންނަނީ ފާހަގަ ކުރަމުންނެވެ.
މޭ 10 ރާއްޖޭގައި ކުޑަކުދިންގެ ދުވަހުގެ ގޮތުގައި ކަނޑައެޅީ، ތުއްތު ކުދިންނަށް ތައުލީމު ދިނުމަށް ހާއްސަ ކޮށްފައިވާ ސްކޫލް ހުޅުވީ އެ ދުވަހު ކަމަށް ވާތީ އެވެ.