ރާޖަޕަކްސާ އާއި ނަމަލް އާއި އިތުރު ބަޔަކު ފުރުން މަނާކޮށްފި

ލަންކާގެ ކުރީގެ ބޮޑުވަޒީރު މަހިންދަ އާއި އޭނާގެ ދަރިފުޅު ނަމާލް އަދި މަހިންދަގެ އަނބިކަނބަލުން -- އޭއެފްޕީ ފައިލް ފޮޓޯ

12 މެއި 2022 - 13:51

ލަންކާގައި އިސްތިއުފާ ދެއްވި ބޮޑުވަޒީރު މަހިންދާ ރާޖަޕަކްސާ އާއި އޭނާގެ ދަރިފުޅު އަދި ކެބިނެޓްގައި ބާރުގަދަ ވަޒީރު ނަމާލް ރާޖަޕަކްސާގެ އިތުރުން 13 މީހަކު ގައުމުން ފުރުން މަނާކޮށްފި އެވެ.

ލަންކާގެ މީޑިއާތަކުން މިއަދު ބުނީ، އެ ދެ ބޭފުޅުންގެ އިތުރުން ކުރީގެ ރާޖަޕަކްސާގެ ވަޒީރު ޖޯންސްޓަން ފެނާންޑޯ އާއި ސަނާތު ނިޝާންތާ ވެސް ފުރުން މަނާކޮށްފައިވާ ކަމަށެވެ.

ކަމާ ބެހޭ ފަރާތްތަކުން އެ އަމުރު މިއަދު ނެރުނީ، ލަންކާގައި މިދިޔަ ހޯމަ ދުވަހު ހިނގި ހަމަނުޖެހުންތަކާ ގުޅިގެންނެވެ. އެކަމަކު އެ ބޭފުޅުން ފުރުން މަނާކޮށްފައި ވަނީ ކޮން ތުހުމަތެއްގައި ކަމެއް އަދި ނޭނގެ އެވެ.

ހަމަނުޖެހުންތަކާ ގުޅިގެން ލަންކާގެ ބޮޑުވަޒީރު ކަމުގެ މަގާމުން ރާޖަޕަކްސާ އިސްތިއުފާ ދެއްވި ފަހުން، އާންމުން ވެސް ނުކުމެ ރާޖަޕަކްސާ ހުންނެވި ތަނެއް ހޯދަން ވަނީ މަސައްކަތްކޮށްފަ އެވެ. ރާޖަޕަކްސާ ހުންނެވީ ސިފައިންގެ ހިމާޔަތުގައި ރައްކާތެރި ތަނެއްގައި ކަމަށް އޮފިޝަލުން ވިދާޅުވެ އެވެ.

I personally will extend my fullest cooporation to any investigation that is taking place with regard to the unfortunate events that took place on Monday. Neither my father nor myself have any intention to leave #LKA & will continue to remain here.
— Namal Rajapaksa (@RajapaksaNamal) May 12, 2022

ލަންކާގައި ހިނގި ހަމަނުޖެހުންތައް މިހާރު ވަނީ ކޮންޓްރޯލްވެފަ އެވެ. ވޭތުވެދިޔަ ދެ ދުވަހުގެ ތެރޭގައި ލަންކާގެ އެކި ހިސާބުތަކުގައި އަލިފާނުގެ ހާދިސާތައް ހިންގައި، ގެދޮރު ރޯކޮށް މުދަލަށް ގެއްލުން ދީފައި ވެ އެވެ.

އެކަމަކު ނަމާލް މިއަދު ކުރެއްވި ޓްވީޓެއްގައި ވިދާޅުވި ގޮތުގައި އޭނާ ވެސް އަދި ބައްޕަ ރާޖަޕަކްސާ ވެސް ގައުމު ދޫކުރައްވައި ވަޑައެއްނުގަންނަވާނެ އެވެ. އަދި ވިދާޅުވީ، ފުރާ ވަޑައިގަތުމުގެ އެއްވެސް ނިޔަތެއް ވެސް ނެތް ކަމަށާއި ހޯމަ ދުވަހު ހިނގައިދިޔަ ކަންތައްތައް ތަހުގީގު ކުރުމަށް އެއްބާރުލުން ދެއްވާނެ ކަމަށެވެ.