ސަނީ ހޯލްޑިން އަށް ދީފައިވަނީ ކ.މާފުށީ ކައިރީ އޮތް ފަޅެއް--ފޮޓޯ:ގޫގުލް
18 މެއި 2022 - 15:28
5 comments
އެމްއެމްޕީއާރުސީގެ ހިޔާނާތުގައި ހިމެނޭ ފަޅެއްގެ އޯނާޝިޕް ބަދަލުކުރުމަށްޓަކައި، އެ ފަޅާ ގުޅޭ ދަރަންޏެއް އޮތްތޯ ބެލުމަށް ޓޫރިޒަމް މިނިސްޓްރީން އިއުލާނުކޮށްފި އެވެ.
އެ އިއުލާނުގައި ބުނީ، ރިސޯޓެއް ހެދުމަށް ކ. މާފުށި ކައިރިން ދޫކޮށްފައިވާ ފަޅެއް ކުއްޔަށް ދިނުމާ ބެހޭ ލީސް އެގްރީމަންޓްގެ ދަށުން، އެ ފަޅު ކުއްޔަށް ހިފާފައިވާ ފަރާތަށް ލިބިދީފައިވާ އެންމެހައި ހައްގުތައް، އެހެން ފަރާތަކަށް ބަދަލު ކުރަން ހުށަހެޅުމެއް ލިބިފައިވާ ކަމަށެވެ. އެކަން ކުރިޔަށް ގެންދިއުމަށްޓަކައި، އެ ފަޅާ ގުޅިގެން އެއްވެސް ދަރަންޏެއް ނުވަތަ މައްސަލައެއް އޮތް ފަރާތެއް ނަމަ އެކަން އެންގުމަށް ޓޫރިޒަމް މިނިސްޓްރީން އެދެ އެވެ. އެ ކަމަށް 14 ދުވަހުގެ މުއްދަތެއް ވަނީ ދީފަ އެވެ.
"މިހާރު" އަށް އެނގިފައިވާ ގޮތުގައި ލީޒް އެގްރީމެންޓް ބަދަލުކުރަން އެދިފައި ވަނީ އެމްއެމްޕީއާރުސީގެ ހިޔާނާތުގައި ހިމެނޭ ސިންގަޕޫރުގެ ކުންފުންޏެއް ކަމުގައިވާ ސަނީ ހޯލްޑިންސް އެވެ. އެ ކުންފުނީގެ ދަށުގައި އޮތް މި ފަޅު ބަދަލުކުރަނީ ކޮން ބަޔަކަށް ކަމެއް އަދި ސާފެއް ނުވެ އެވެ.
ޓޫރިޒަަމް މިނިސްޓްރީން ކުރިން ބުނެފައިވާ ގޮތުގައި ސަނީ ހޯލްޑިންސް އަށް ފަޅު ދިނީ އެ ކުންފުނި އުފެއްދުމުގެ ކުރިންނެވެ. ނަމަވެސް އޭރުގެ ބަންޑާރަ ނައިބު ވަނީ އެކަން އެހެންވި ނަމަ އެ ލީޒް އެގްރީމެންޓް ކުރިއަށް ގެންދަން އެދިވަޑައިގެންފަ އެވެ.
ކުރީގެ ރައީސް އަބްދުﷲ ޔާމީންގެ ސަރުކާރުން ރިސޯޓު ހެދުމަށް ރާއްޖޭގެ 30 އަށް ވުރެ ގިނަ ފަޅު އެކި ފަރާތްތަކަށް ދޫކޮށްފައިވެ އެވެ. އޭގެ ތެރޭގައި އެމްއެމްޕީއާރުސީގެ ތިން ބިލިއަން ރުފިޔާގެ ހިޔާނާތާ ގުޅޭ ފަޅުތައް ވެސް ހިމެނެ އެވެ.
އޮޑިޓަ ޖެނެރަލްގެ އޮފީހުން 2015 ވަނަ އަހަރު ނެރުނު ރިޕޯޓެއްގައިވާ ގޮތުން، އެމްއެމްޕީއާރުސީން އެކި ފަރާތްތަކަށް ދައްކަން ޖެހޭ ފައިސާގެ ތެރޭގައި ޓޫރިޒަމް މިނިސްޓްރީ އަށް ދޭން ޖެހޭ 1.5 ބިލިއަން ރުފިޔާ ވެސް ހިމެނެ އެވެ. އެކަމަކު، އެ ރިޕޯޓުގައި ފާހަގަކޮށްފައިވާ އަދަދުތަކުގެ ސައްހަކަން ކަށަވަރެއް ނުކުރެވެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އޮނަރަބްލް އަފީފު ދީދީ
19 May 2022
ވައްކަމުގެ މައްސަލައަކަށް ހިތްވަރުލިބޭ ޤާނޫނީ ބާރުވެރިކަންދީގެން ތިކަންނިންމައިފިނަމަ ރާއްޖޭގެ ކޮންޓްރެކް ޤާނޫނާއިޙިލާފަށް އަދި ވުޖޫދުގައިނެތް ކުންފުންޏަކަށް ދައުލަތުގެމުދާ ލިބޭފަދައެއްބަސްވުމެއް އެކުލަވާލާ އަދި މިކަން ފަޅާއެރުމުންވެސް އެންމެހާ ޤާނޫނުތަކާއި ޙިލާފަށް "ވައްކަމަށް ބާރު ދިނުމަށް" ސަރުކާރުން ކަޑައަޅައިފިނަމަ މިމައްސަލަ ޕްރޮސިކިއުޓަރ އިން ޝަރީއަތަށް ފޮނުވުމަކީ ޕީޖީގެ ޒިންމާއެއް. އޭނާވެސް މިކަން ނުކޮށްފިނަމަ ފަރުދުން މިކަން ކުރަންޖެހޭ.
އޮނަރަބްލް އަފީފު ދީދީ
19 May 2022
ޓްއަރިޒަމް މިނިސްޓްރީގެ އިއުލާނުގައި ފަޅުގެ އޯނަރޝިޕް މިހާރު އޮތް މީހުންގެ މައުލޫމާތު އާންމުކޮށްފައި ނެތުމަކީވެސް ސޯލިޙްގެ ސަރުކާރުން "ވައްކަން ފޮރުވަން" މަސައްކަތް ކުރާ ކަމުގެ ފުރިހަމަ ހެއްކެއް. # މިފަދަ ލީޒް އެގްރީމަންޓްތައް ބަދަލު ކުރުމުގެ މަރުޙަލާގައި ސަރުކާރުން ދެފަރާތުގެ މައުލޫމާތު ސާފުކޮށް ހާމަކޮށް ނުދިނުމުގެ ސަބަބުން މިފަދަ ކުންފުނިތަކާއިއެކު ވިޔަފާރީގެ މުއާމަލާތްތައް ހިންގާފައިވާ އެހެން ފަރާތްތަކަށް އިއާދަނުކުރެވޭނެ ގެއްލުން ލިބިދާނެ.
ޢަމީނާ3
19 May 2022
ވަގު ވަގަށް ނަގައިގެން ވިއްކަނީ ރައޔިތހުންގެ މުދާ ފާޅުގަ !! މީނޫންބާ ލޯންޑަރް ކުރުމަކީ / ހަގީގީ ވައްކަމަކީ !! ވަގު ފޯނެއް/ފަޅެއް ވަގައް ނެގީ -މިހާ ފާޅުގަ މިކަން ކުރެވޭ. ހެހެހެހެެ ކީކޭ ބުނާނީ
ހަސަނު
18 May 2022
ސިންގަޕޫރު ކުންފުނި ހުރެ ރާއްޖޭ މަހުޖަނުން ފަހަތުގަ ތިބެ ހަދާފަ ވެސް.. ހުސް މަކަރަ ހީލަތް.. ތިޔަ ލީސް ބާތިލު ކޮށް އަލުން ބިޑަށް ލާން ޖެހޭނީ...
އަފްރާސިޔާބު
18 May 2022
ކުންފުންޏެއް އުފެދުމުގެ ކުރީގައި އެކުންފުނީގެ ނަމުގައި ލީޒް އެގްރިމެންޓެއް ހެދުނީ ކިހިނަކުންބާ؟ ޕްރޮޕޯސަލެއް ހަދައިގެން ނެތް ކުންފުންޏެއް އޮތްކަމަށް ދައްކައިގެންބާ؟ ދެން އެއްބަސްވުން ހެދިއިރު ކުންފުނީގެ ރަޖިސްޓަރީ ގެންނަން ބުނިބާ؟ އެއްބަސްވުމުގައި ކުންފުނީގެ ރަޖިސްޓަރީ ނަންބަރު ޖެހިބާ؟ ޞައްޙަކަން ކަށަވަރު ކުރިބާ؟ ކުންފުނީގެ ނަމުގައި އެކައުންޓެއް އޮތްބާ؟ ބަންޑާރަ ނައިބަކަށް ހުރި ކަލޭގެ ލަފައެއްނެތްބާ؟ އެޑްވާންސްޕޭމަންޓް ވަނީ ކޮންތާކަށްބާ؟