މާލޭގައި ގެއެއްގެ ލިފްޓް ތެރޭގައި އަންހެނަކަށް ޖިންސީ ގޯނާކުރި ކަމަށް ބުނާ މައްސަލައެއް ބަލަމުން އަންނަ ކަމަށް ފުލުހުން މިއަދު ބުނެފި އެވެ.
ފުލުހުން ބުނީ ހެންވޭރު ގެއެއްގައި ދިރިއުޅޭ އަންހެނަކު އެ ގޭގެ ލިފްޓަށް އެރި ވަގުތު، ލިފްޓަށް އެރި ފިރިހެނަކު އޭނާ އަށް ޖިންސީ ގޯނާކުރި ކަމަށް ބުނާ އެ މައްސަލަ ރިޕޯޓްކޮށްފައި ވަނީ މިދިޔަ އަންގާރަ ދުވަހު ކަމަށެވެ.
އެ މައްސަލައާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށް ފިޔަވައި، އިތުރު ތަފުސީލެއް ފުލުހުން ނުދެ އެވެ.
ރާއްޖޭގައި ޖިންސީ ގޯނާކުރުމުގެ މައްސަލަތައް ރިޕޯޓްކުރާ އަދަދު މިފަހުން ވަނީ ވަރަށް ބޮޑަށް އިތުރުވެފަ އެވެ. ހާއްސަކޮށް ކުޑަކުދިންނަށް ޖިންސީ ގޯނާކޮށްގެން ރިޕޯޓްކުރާ މައްސަލަތައް ވަނީ ވަރަށް ގިނަ އެވެ.