މާޒިޔާގެ ޑޮމިންގޭޒަ (ޓާނާ) ލަނޑު ޖެހުމަށް ފަހު އުފާފާޅު ކުރަނީ: މެޗުން މޮޅުވެ މާޒިޔާ ވަނީ ލީގު ހޯދުމާ ދެ މެޗާ ކަިއރިކޮށްފަ --- ފޮޓޯ: ފަޔާޒު މޫސާ | މިހާރު
12 ޖުލައި 2022 - 23:40
ސުޕަ ޔުނައިޓެޑް ސްޕޯޓްސް (ސަސް) ގެ މައްޗަށް 10-0 ގެ ނަތީޖާ އަކުން ކާމިޔާބު ހޯދައި، ލީގު ހޯދުމާ ދެ މެޗާ ކަިއިރިއަށް މާޒިޔާ ޖެހިލައިފި އެވެ.
ދިވެހި ޕްރިމިއަ ލީގުގެ ތާރީހްގައި އެންމެ ތަފާތު ބޮޑު ނަތީޖާ އަކުން މޮޅު ވުމުގެ ރެކޯޑް އޮތީ މާޒިޔާ އަތުގަ އެވެ. އެ ޓީމު ވަނީ ކްލަބް ވެލެންސިއާ އަދި ފަ. ނިލަންދޫ ސްޕޯޓްސް ކްލަބްގެ މައްޗަށް ކުޅުނު މެޗުތަކުގައި 13-0 ން މޮޅުވެފަ އެވެ. އެ ޓީމުން 13-0 ން މޮޅުވީ ލީގުގެ ދެވަނަ ބުރުގައި ވެލެންސިއާ އާ ދެކޮޅަށް ކުޅުނު މެޗުގަ އެވެ. އެ މެޗާއެކު މާޒިޔާއިން ވަނީ 2013 ގައި ނިއު ރޭޑިއަންޓުން ހަދައިފައިވާ ރެކޯޑެއް މުގުރާލައިފަ އެވެ.
ދިވެހި ލީގު ތާރީހުގައި، ލީގު ޗެމްޕިއަންކަން ހޯދި ޓީމެއް ކޮޅަށް ނެރުނު އެންމެ ތަފާތު ބޮޑު ނަތީޖާ އަކީ މާޒިޔާއިން ވެލެންސިއާ އާ ދެކޮޅަށް ނެރުނު 13-0 ގެ ނަތީޖާ އެވެ. އޭގެ ކުރިން އެ ރެކޯޑް އޮންނަނީ ނިއު ރޭޑިއަންޓްގެ އަތުގަ އެވެ. ދިވެހި ލީގު 2013 ގެ ސީޒަންގައި ނިއު ރޭޑިއަންޓުން ވަނީ، ކުރީގެ ޗެމްޕިއަން ވީބީ އައްޑޫ އެފްސީ މައްޗަށް 10-1 ގެ ނަތީޖާ އަކުން މޮޅުވެފަ އެވެ.
ދިވެހި ލީގު 2019-2020 ގެ ސީޒަންގައި މާޒިޔާއިން ވަނީ ފ. ނިލަންދޫ ސްޕޯޓްސް ކްލަބްގެ މައްޗަށް ވެސް 13-0 މޮޅުވެފަ އެވެ. ގައުމީ ފުޓްބޯޅަ ދަނޑުގައި މިރޭ ކުޅުނު މެޗުގައި ހަމްޒާ މުހައްމަދު (ހަމްޕް) ވަނީ ހެޓްރިކް ހަދައިފަ އެވެ. މެޗުން މޮޅުވެ މާޒިޔާ ވަނީ އެއްވަނައިގައި އަށް ޕޮއިންޓްގެ ލީޑެއް ނަގައިފަ އެވެ. އެ ޓީމު ދެން ކުޅޭ ދެ މެޗު ކާމިޔާބު ކޮށްގެން ވިދިވިދިގެން ތިންވަނަ ފަހަރަށް ލީގު ޗެމްޕިއަންކަން ހޯދާނެ އެވެ.
މެޗުގައި އެ ޓީމުގެ ފުރަތަމަ ލަނޑު ޖެހީ ކޯނޭލިއަސް ސްޓެވާޓް (ކޯނޭ) އެވެ. އޭނާ ލަނޑު ޖެހީ މެޗުގެ 14 ވަނަ މިނެޓްގަ އެވެ. އޭގެ ފަހުން ގާތްގަނޑަކަށް 25 މިނެޓް ތެރޭ މާޒިޔާއިން އިތުރު ތިން ލަނޑު ޖެހި އެވެ. އެ ލަނޑުތައް ޖެހީ ޕެޑްރޯ ޑޮމިންގޭޒް (ޓާނާ)، އަދި ހަމްޒާގެ ދެ ލަނޑެވެ.
ދެވަނަ ހާފުގެ ހަވަނަ މިނެޓްގައި އައިސަމް އިބްރާހިމް (ޓޯނީ) ވަނީ މާޒިޔާ އަށް މެޗުގެ ނަތީޖާ 5-0 ށް ބަދަލުކޮށް ދީފަ އެވެ. ޓާނާގެ ދެވަނަ ލަނޑު އޭނާ ޖެހީ މެޗުގެ 60 ވަނަ މިނެޓްގަ އެވެ. އޭގެ ހަތަރު މިނެޓް ފަހުން ހަމްޒާ ވަނީ އޭނާގެ ހެޓިކް ފުރިހަމަ ކޮށްފަ އެވެ. މާޒިޔާގެ ކެޕްޓަން އަސަދުﷲ އަބްދުﷲ ވެސް ދެ ލަނޑު ޖެހި އެވެ.
އަސަދުﷲގެ ފުރަތަމަ ލަނޑު އޭނާ ޖެހީ 76 ވަނަ މިނެޓްގަ އެވެ. އައިސަމް ވެސް ދެ ލަނޑު ޖެހި އެވެ. އޭނާގެ ދެވަނަ ލަނޑު ޖެހީ މެޗުގެ 81 ވަނަ މިނެޓްގަ އެވެ. އޭގެ ތިން މިނެޓް ފަހުން އަސަދުﷲ ވަނީ ދެވަނަ ލަނޑު ޖަހައި 10-0 އަށް ނަތީޖާގެ ފަރަގު ބޮޑުކޮށްފަ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ވައަތު ލީޤު.
13 July 2022
ކ.އަތޮޅު މާލޭ ކަންމަތީ ގުރޫޕު ތަކަށް ފައިސާ ދޭނެ ގޮތެއް ނޭގިގެން ހިގާނަމަ އެމީހުން އަތުން އެއްވެސް ޙަރަދެއް ނުދާ ގޮތަށް ތިކަން ކޮށްލަބަލަ. ތިޔަ ސުޕަރ ލީގުގައި ހިމެނޭ ޓީމް ތަކުގެ މެދުގައި ގުރުއަތު ލައިގެން ޗެމްޕިއަނާއި ރަނައަޕް ހޮވާފައި ހުރިހާ ޓީމް ތަކަށް ފައިސާ ގަނޑު ބަހާލާ.