އޭދަފުށީގައި ހުންނަ އަތޮޅު ތައުލީމީ މަރުކަޒުން މި އަހަރު ގްރޭޑު 10 ނިންމި ދަރިވަރުންގެ ދަސްވެނިވުމުގެ ރަސްމިއްޔާތު: އެ ސްކޫލްގެ އަށް ދަރިވަރަކު ގައުމީ ގަދަ 10ގައި ހިމެނިފައިވޭ.-- ފޮޓޯ: ބ. އަތޮޅު ތައުލީމީ މަރުކަޒު
21 އޯގަސްޓް 2022 - 14:14
25 comments
އޯ ލެވެލްގެ ނަތީޖާ މިދިޔަ ބުރާސްފަތި ދުވަހު ދޫކުރަން ފެށުމާއެކު ސޯޝަލް މީޑިއާ ފުރާލީ ދަރިވަރުންނަށް ކި ހޫނު މަރުހަބާތަކުންނެވެ. މިދިޔަ މެއި/ޖޫން މަހުގެ އިމްތިހާނުގައި 5،900 ދަރިވަރުން ބައިވެރިވިއިރު، މި ފަހަރު ޖުމްލަކޮށް ރަށްރަށުގެ ސްކޫލުތަކުން ހޯދި ނަތީޖާ ރަނގަޅުކަމަށް "މިހާރު" އާ ވާހަކަދެއްކި ބައެއް ޕްރިންސިޕަލުން ބުންޏެވެ.
އޭގެ ތެރެއިން އެއް ސްކޫލަކީ ތ. ދިޔަމިގިއްޔެވެ.
އެ ސްކޫލްގެ ޕްރިންސިޕަލް ޔޫސުފް ޒަކަރިއްޔާ މިއަދު ވިދާޅުވީ ދިޔަމިގިލީގައި ފާއިތުވި ދެ އަހަރުގެ ނަތީޖާ ވެސް ރަނގަޅު ކަމަށެވެ. އެކަމަކު، ޕްރީ ސްކޫލުން ފެށިގެން ގްރޭޑު 10 އަށް 200 އެއްހާ ދަރިވަރުން ކިޔަވަމުން އަންނަ ސްކޫލްގެ ފަރާތުން އޯ ލެވެލްގައި ބައިވެރިވި 12 ކުދިންގެ ތެރެއިން ހަ ކުދިން ރާއްޖޭގެ ގަދަ 10 ގައި ހިމެނުމަކީ ރަނގަޅު ކުރިއެރުމެއް ކަމަށް އޭނާ ވިދާޅުވި އެވެ.
އެ ސްކޫލުން އެންމެ ރަނގަޅު ނަތީޖާއެއް ހޯދީ، ހަތް މާއްދާއިން އޭ ސްޓާ އަދި އެއް މާއްދާއިން އޭ ހޯދައިގެން ރާއްޖެއިން ދެ ވަނަ ހޯދި ޝައިބާން ޝަފީގެވެ. ތިން ވަނަ އައިޝަތު އައިނީ، ފަސް ވަނައިގައި ދެ ކުއްޖަކު، ހަތް ވަނަ އަދި ނުވަ ވަނައިގައި ވެސް ދިޔަމިގިލީ ސްކޫލްގެ ކުއްޖަކު ހިމެނިފައިވެ އެވެ.
ޔޫސުފް ވިދާޅުވީ ދިޔަމިގިލީގެ ދަރިވަރުން ދައްކައިދިނީ އާދައިގެ ވަސީލަތްތައް ހުރި ނަމަވެސް ރަނގަޅު ނަތީޖާއަށް ދެވިދާނެ ކަމުގެ ހެއްކެއް ކަމަށެވެ.
"އެންމެ ރަނގަޅު ނަތީޖާ ހޯދަން މޮޅެތި ވަސީލަތްތަކެއް ބޭނުންނުވާނެކަން އެ ކުދިން ދައްކައިދިނީ،" ޔޫސުފް ވިދާޅުވި އެވެ.
އޭގެ އެއް ހެއްކަކީ ލެބޯޓްރީގެ ފުރިހަމަ ވަސީލަތްތައް ނެތް ނަމަވެސް ކެމިސްޓްރީން ހަ ދަރިވަރުން އޭ ސްޓާ ހޯދުމެވެ. އޭގެ އިތުރުން ލައިބްރަރީ އާއި ކޮމްޕިއުޓާ ލެބާއި ބީޓެކް ދަރިވަރުން ކިޔެވުމަށް ބޭނުންކުރަނީ ވެސް އެއް ކްލާސް ރޫމްކަން އޭނާ ފާހަގަކުރެއްވި އެވެ.
ނަމަވެސް ސަރުކާރުން ވަނީ އަށް ކްލާސްރޫމްގައި ކިޔަވައިދޭ ސްކޫލަށް 12 ކްލާސްރޫމްގެ އާ އިމާރާތެއް އަޅައިދޭން ނިންމައިފަ އެވެ. މި އަހަރުގެ ތެރޭގައި މަސައްކަތް ފަށާނެ އެވެ.
އެ ރަށުގައި އަންނަ އަހަރު 10 ކުދިން އޯ ލެވެލް ހަދާނެ އެވެ. ރަނގަޅު ނަތީޖާއެއް ލިބޭނެ ކަމަށް އުއްމީދުކުރެވޭ ކަމަށް ޔޫސުފް ވިދާޅުވި އެވެ.
A tremendous achievement, well deserved to be celebrated. The batch of 2021-2022 has shown that hardwork and determination leads to success.
— Keyodhoo School ކެޔޮދޫ ސްކޫލް (@keyodhuschool) August 21, 2022
This batch has achieved new milestones in the history of Keyodhoo School.
Thank you all the teachers and parents. @MoEdumv @aisthly pic.twitter.com/BFS74VFFCj
"ހުރި ވަސީލަތްތައް ފުރިހަމައަށް ބޭނުންކޮށްގެން ކިޔަވައިދިނުމަށް އަޅުގަނޑުމެން ބޮޑަށް އިސްކަންދެނީ. ނަތީޖާއާ ދޭތެރޭގައި ހިތްހަމަޖެހޭ،" އޭނާ ވިދާޅުވި އެވެ.
ބާކީ ތިބި ހަ ދަރިވަރުން ވެސް އިމްތިހާނުގައި ބައިވެރިވި ހުރިހާ މާއްދާއަކުން ފާސްވި ކަމަށް ދިޔަމިގިލި ސްކޫލުން ބުންޏެވެ.
މި އަހަރު ގަދަ 10 ގައި ހިމެނުނު ދަރިވަރުންގެ އަދަދު ގިނަ ނަމަވެސް، އިސްލާމާއި ދިވެހި މާއްދާއިން ދަރިވަރުންގެ ނަތީޖާ ދަށްކަމަށް ބައެއް ޕްރިންސިޕަލުން ވިދާޅުވެ އެވެ. އެހެންވެ، މާލޭގެ ބައެއް ސްކޫލުތަކުން އެއް ވަނައިގައި އެއްވެސް ކުއްޖަކު ހިމެނިފައިނުވެ އެވެ.
ހއ. ހޯރަފުށީގައި ހުންނަ އެ އަތޮޅު މަދަރުސާގެ ފާތިމަތު ސުޒާ މުހައްމަދު ވަނީ އޯ ލެވެލް ހެދި އަށް މާއްދާއިން ވެސް އޭ ސްޓާ ހޯދައި ރާއްޖެއިން އެއްވަނަ ހޯދައިފަ އެވެ.
އެ އިމްތިހާނުގައި އެ ސްކޫލުން 19 ކުދިން ބައިވެރިވިއިރު، 63 ޕަސެންޓް ދަރިވަރުން ފަސް މާއްދާއިން ފާސްވި ކަމަށް އަތޮޅު މަދަރުސާގެ ޕްރިންސިޕް ހުސެއިން ނައީމް ވިދާޅުވި އެވެ.
"ސުޒާއަށް ވަރަށް ރަނގަޅު ނަތީޖާއެއް ލިބޭނެ ކަމަށް ގަބޫލުކުރެވުނު. އެކަމަކު އެއްވަނަ ލިބޭނެ ކަމަށް އުއްމީދެއް ނުކުރަން. އެންމެ ކުރީއްސުރެ ވެސް އަމިއްލައަށް ކިޔެވުމުގައި އުޅުނު، މޮޅު ދަރިވަރެއް އެއީ،" އޭނާ ވިދާޅުވި އެވެ.
ތ. ވިލުފުށީ ސްކޫލްގެ އަބްދުﷲ ނައިސަމް އުސްމާން ވެސް އަށް މާއްދާއިން އޭ ސްޓާ ހޯދައިގެން އެއް ވަނަ އަދި މަރިޔަމް ޔޫހާ ރާއްޖެއިން ދެ ވަނަ ހޯދާފައިވެ އެވެ. އެ ސްކޫލުގެ އައިޝަތު އަނާމް މުހައްމަދު ވަނީ އަށް ވަނަ ހޯދައިފަ އެވެ.
އޯ ލެވެލްގައި އަބަދު ވެސް މޮޅު ނަތީޖާތަކެއް ހޯދާ ބ. އަތޮޅު ތައުލީމީ މަރުކަޒުގެ އަށް ކުއްޖަކު ރާއްޖޭގެ ގަދަ 10 އަށް އަރާފައިވެ އެވެ. އެ ތަނުން، ހަތް މާއްދާއިން އޭ ސްޓާ އަދި އެއް މާއްދާއިން އޭ ހޯދައިގެން ރާއްޖޭގެ ދެ ވަނައަށް، އެ ސްކޫލްގެ މުހައްމަދު މަނޫން ފާއިޒް ހިމެނިފައިވެ އެވެ. އޭގެ އިތުރުން ހދ. ކުޅުދުއްފުށީގެ ތިން ސްކޫލު، ހދ. އަތޮޅު ތައުލީމީ މަރުކަޒާއި ޖަލާލުއްދީން ސްކޫލު އަދި އަފީފުއްދީން ސްކޫލުން ޖުމްލަ 33 ދަރިވަރުން ގައުމީ ގަދަ 10 ގައި ހިމެނިފައިވެ އެވެ.
އއ. ތޮއްޑޫ ސްކޫލުގެ ހަ ދަރިވަރަކު ރާއްޖޭގެ ގަދަ 10ގައި ހިމެނިފައިވެ އެވެ.
އެ ސްކޫލްގެ އެޑްމިނިސްޓްރޭޓަރު އާދަމް އިބްރާހިމް ވިދާޅުވި ގޮތުގައި އެހެން އަހަރުތަކަށް ވުރެ މި އަހަރު، 422 ދަރިވަރުން ކިޔަވާ ސްކޫލުން ހޯދީ ރަނގަޅު ނަތީޖާއެއް ކަމަށެވެ. ރާއްޖޭގެ ގަދަ ދެ ވަނައިގައި ދަރިވަރެއް އަދި ތިން ވަނައިގައި އެ ސްކޫލްގެ ދެ ދަރިވަރަކު، އަށް ވަނައިގައި ދެ ދަރިވަރަކު އަދި 10 ވަނައިގައި ވެސް ތޮއްޑޫގެ ދަރިވަރަކު ވަނީ ހިމެނިފަ އެވެ.
އޭނާ ވިދާޅުވީ އެ އިމްތިހާނުގައި ބައިވެރިވި 32 ދަރިވަރުންގެ ތެރެއިން، ބީޓެކް ދަރިވަރުން ނުހިމަނައި އޭ ލެވެލްއަށް 17 ކުދިން ފާސްވި ކަމަށެވެ.
ދިވެހި މާއްދާއިން އެ ސްކޫލްގެ 11 ދަރިވަރަކު އޭ ހޯދިއިރު، އިސްލާމް މާއްދާއިން ވެސް ތިން ދަރިވަރަކު އޭ ސްޓާ އަދި ހަތަރު އޭ ހޯދާފައިވާ ކަމަށް އާދަމް ވިދާޅުވި އެވެ.
އޯ ލެވެލްގެ ނަތީޖާއާ ގުޅޭގޮތުން އެޑިއުކޭޝަން މިނިސްޓަރު ޑރ. އައިޝަތު އަލީ ކުރެއްވި ޓްވީޓުގައި ވިދާޅުވީ ގިނަ ސްކޫލުތަކުން އާދަޔާ ހިލާފު ރަނގަޅު ނަތީޖާއެއް ހޯދާފައިވާ ކަމަށެވެ. އެކަމަށް މިނިސްޓަރު ވަނީ މަރުހަބާ ދަންނަވައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ސާރުދާ
22 August 2022
ސަރުކާރުން ރާއްޖެތެރޭ ސުކޫލުތަކަށް އަޅާލާނަމަ މިއަށްވުރެންވެސް ރަނގަޅުވާނެ.ރާއްޖެތެރޭ ސްކޫލްތަކުގެ ލެބޯޓަރީގަ ކެމިކަލެއްނުހުރޭ.ޓީކަރުންގެ ފެންވަރު އެހާދަށް.ގިނައިން ތިބެނީ ވަގުތީ ޓިޗަރުން.އެކަމަކު އެޑިއުކޭޝަން މިނިސްޓަރު އަނގަ ފުޅާކޮށްފަ ވާހަކަ ދައްކާއިރު ހީވަނީ އެހެން ކަމެންހެން.ކަމަކަށް ތެދެއް ނަހަދާ.މުޅިންވެސް އޮޅުވާލުން.އެއީ ވެސް ރާއްޖެތެރޭމީހުން މާލެ ގެންދިއުމަށް މަޖުބޫރު ކުރުވުމަށް ކުރާ ކަމެއް.
އަބްޑޫޅް
22 August 2022
ދިވެހިރާއްޖޭގަ "ރަށް ރަށް" ނޫން ރަށެއްއޮވޭތަ؟ ލަނޑަޔަށް ލަނޑަޔޭ ކިޔާބަލަ! ތިޔަ ބުނަނީ "ބީރަށްޓެހި" ރަށްރަށުގެ ވާހަކަ. އެހެން ލިޔެބަލަ.
މާލެއިން މަރްޙަބާ
21 August 2022
ماشاءالله، ވަރަށް މޮޅު ކުދިންކޮޅެކެވެ! ވ. މޮޅު ނަތީޖާ ހޯދި ހިތްވަރުގަދަ ދަރިވަރުންނަށް ވަރަށް ހޫނު މަރުޙަބާއެއް ކިޔަމެވެ. ކުރިޔަށް އޮތްތަނުގައިވެސް ތިފަދަ ނަތީޖާއެއް ހޯދާނެކަމާއިމެދު ޝައްކެއް ނުކުރަމެވެ.
ވޯލް
21 August 2022
އެކަމަކު އެންމެ މާލެއަށް ރަށުގައި ތައުލީމު ދެވެން ނެތިގެން؟ މީ އަޅެ ކޮން ކަހަލަ އަރަތެއްތަ؟
ބޮޑުމީހާ
21 August 2022
ދަރިނަނަށް އޯލެވެލް ކިޔަވައިދިނުމުގެ ބޭނުމުގަ މާލެ ހިޖުރަކުރާނީ މޮޔައެއް. 35 ކުދިން ކްލާހެއްގަ. ޓީޗަރަށް ކުދިންނަށް ދޭންޖެހޭ ސަމާލުކަން ނުދެވޭ. އިތުުރު ހަރަކާތެއް ނޯވޭ. އޮތަސް އެންމެ ކަމެއްގަ ބައިވެރިވެވެނީ. ރަށުގަ މަދުކުދިން ތިބީމަ ފުރުސަތު ލިބޭ، ޓީޗަރުންނަށް ވަގުތުދެވޭ، ކުލި، ޓްރާންސްޕޯޓް ކޯސްޓް އަދި ވަގުތު ސަލާމަތްކުރެވޭ
ހެޑްލައިން
21 August 2022
މާލޭ މީހުންވެސް ދަރިން ގޮވާގެން ރާއްޖެތެރެއަށް ހިޖްރަވޭ ކުރިން މޮޅުކުރަން މާލެއަކު މިކަނެއް ނުވާނެ!
މަށެއްނުފަތާނަން****
21 August 2022
ޓޮޕްޓެން ފާހަގަކޮށް ކުދިންނަށް އިނާމު ދޭން ވެސް ބުރަކަމަކަށް ވެގެން ބަޔެއް ސިޔާސީ މީހުން އުޅެނީ ކޮންމެސް ސަފާރީއެއްގައި ސިޔާސީ ރަނބަތަޅުވަން ބައިސާކަނޑަން އަބަދު ތިބެން ބޭނުންވަނީ ޓޮޕްޓެންގައި ވީ ކުދިންނަށް މަރުހަބާ ތި ކުދިން ހިދުމަތްތެރި ކާމިޔާބު ބަޔަށް ވާނެ ކަމަަށް އުންމީދުކުރަން
މަރުތަބާން
21 August 2022
ނޫނޭ ރަށްރަށުގަ ތައުލީމެއް ނުލިބެ އޭކިޔާފަ މާލެއަށް އެންމެންގަނޑު އާދޭ އަދިވެސް. ފުލެޓުހޯދަން.
ދުއްޕާން
21 August 2022
މިހިރަ މީހާ! މޭކެރިޔަސް ތިދެން ބޮޑުވަރު. ރަށްރަށުގަ ރަނގަޅު ތައުލީމެއް އޮވެގެނެއް ނޫން ރަށްރަށު ކުދިން ވަނަތައް ހޯދަނީ. ކިލާ ފެންގަނޑުތެރޭގައާ އަރާހާ ހިރަފުހެއްގެ ތެރޭ ބާވެ ކުލަވެއްޓިފަ ހުންނަ ވަސީލަތެއް ނެތް ސްކޫލަކަށް ގޮސް އެގޮތް މިގޮތް ހަދައިގެން ނުނިދާ ކުދިން ކުރާ ގަދަ ހިތްވަރުން. ކަލޭގެ މުގައްދަސް މާލޭގެ ހާލަތު އޮތީ މިހެންތަ؟ ފުލެޓަކީ ރާއްޖެތެރޭ މީހުންގެ ވެސް ފައިސާއިން އަޅާފަހުރި ތަންތަން. ކީއްވެ ހައިސިއްޔަތު އޮޅިގެން ތިއުޅެނީ؟
ތިކިތަޅާ
21 August 2022
ތިޔަ މޮޅު މާލޭ ދުވާރު މަތިން ހިނގާ އިރު މަތިން ގަޔަށް ފެންތިކި ޖަހަނީ ކީއްވެ ނޭނގެ ފާހާނާ ޑުރެއިން ފެން ނޫން ކަމެއް ވެސް އަހަރެމެން އެބޮ އުޅެން ވިއްޔާ ތިޔާވަރު ތަނެއް ނެތިން
ރާއްޖެތެރޭމިނިސް
22 August 2022
މާލެ މީ އަޅެ ވަކިމީހެއްގެ ތަރިކަ މުދާގަޑެއްބާ. ހީވަނީ ރާއްޖެތެރޭމީހުން އައިސް މާލޭއަމިއްލަ މީހެއްގެ ގޭގެ ބަދިގެތެރޭ ގަދަކަމުން ބަގުޑިބައްދައި ނުނިކުމެ ތިބީހެން. މާލެއަކީ ދިވެހިންގެ ވެރިރަށް އެންމެންއަރާނެ ފުލެޓުވެސް ލިބެންޖެހޭނެ. އެހެންނޫނަސް ރާއްޖެތެރޭމީހުން މާލެ ނައަރާ މާލޭމީހުން ދެއަތްއުރާލާތިބެ ކައިބޮއެ އުޅޭނީކިހިނެތް.
ފައްތާހު
21 August 2022
ކެންދޫ ސްކޫލް އޮންނަނީ ސިޔާސީވެފަ. އެހެންވެގެން އެރަށުގަ ޓީޗަރުން ނޫޅޭ ކުދިން މޮޅު ކުދިންނަށް ހަދާކަށް. ސިޔާސީ ހައްދު ފަހަނައެޅުން އޮތީ
ގައުމެއްނެތް
21 August 2022
މޮޅު މިކަހަލަ ކޮންމެ ދަރިއަކަށް ކިތައް ޕާޓޭން، ކިތައް ވަގުން، ކިތައް ކަމެއްނެތި ވަޒީފާއަކަށް ނުގޮސް އުޅޭ ޒުވާނުން އެބަތިބި، ސައިކަލަކަށް ދެމިފަ ތުންފަތުގައި ސިގިރެއްޓެއްޖަހައިގެން. އެމީހުން ކަސިޔާރުމަގުން ދާއިރު އަހަރުމެން މިތިބެނީ ބަލަން. އަދާޔާ ޚިފާފަށް އެމީހުންގިނަ. ދެން ގައުމުގަ ކޮންމުސްތަގުބަލެއް އޮންނާނީމި މީހުންނަށް ދެވަނަ ފުރުސަތެއްދޭން ރާވަފައޮތް ސިސްޓަމެއް ގައުމަކުނެތް. ޖަލުގެ ނިޒާމު އޮތީ ކުއްވެރިން ރިހެބިލިޓޭޓް ކުރެވޭގޮތަކަށްނުން.