ރާނީއާ އެކު ފިލިޕް ވެސް ފަސްދާނުލާނެ

މިމަހުގެ 8 ވަނަ ދުވަހު އަވަހާރަވި އިނގިރޭސި ރާނީ އެލިޒަބަތު ދޭއް، މި މަހުގެ 19 ވަނަ ދުވަހު ފަސްދާނުލާއިރު، މިދިޔަ އަހަރު އަވަހާރަވި އެކަމަނާގެ ފިރިކަލުން އަމީރު ފިލިޕް ވެސް، ވިންޑްސާ ކިއްލާއާ މާދުރު ނޫން ހިސާބެއްގައި ހުންނަ، ރަސްގެފާނު ޖޯޖް ހަ ވަނަގެ ހަނދާނީ ފައްޅީގެ ގޯތިތެރޭގައި ފަސްދާނުލާނެ އެވެ.

އުމުރުފުޅުން 100 އަހަރު ފުރެން ދެ މަހަށްވެފައި ވަނިކޮށް، އޭޕްރީލް 9، 2021 ގައި އަވަހާރަވި އަމީރް ފިލިޕްގެ ހަށިކޮޅު މިހާރު އޮތީ، ވިންޑްސާ ކިއްލާގެ ގޯތިތެރޭގައި ހުންނަ، ރަސްގެފާނު ޖޯޖް ހައެއްގެ ހަނދާނީ ފައްޅީގެ ބިންގަރާހުގައި ހުންނަ ޝާހީ ގަބުރު ކޮށާރުގަ އެވެ. ރާނީ އެލިޒަބަތުގެ ހަށިކޮޅު އެ ފައްޅިގެ ގޯތިތެރޭގައި ފަސްދާނުލާއިރު، އަމީރް ފިލިޕްގެ ހަށިކޮޅު ވެސް އެ ކޮށާރުން ނަގައިގެން ގެންގޮސް، ރާނީގެ މަހާނައާ ކައިރީގައި ފަސްދާނުލާނެ އެވެ.

އިނގިރޭސި ޝާހީ އާއިލާގެ 25 ބޭފުޅެއްގެ ގަބުރު މިހާރު ވެސް އެ ކޮށާރުގައި އޮތް އިރު، އަމީރް ފިލިޕްގެ ހަށިކޮޅު ޝާހީ ގަބުރު ކޮށާރުގައި ބާއްވާފައި އޮތީ، ރާނީ އަވަހާރަވުމުން ރާނީގެ އަރިހުގައި ފަސްދާނުލުމަށް އެދިވަޑައިގެން، އަމީރް ފިލިޕް ކުރެއްވި ވަސިއްޔަތްޕުޅަކާ ގުޅިގެންނެވެ.

ޝާހީ އާއިލާގެ ކަންތައް ދިރާސާކުރައްވާ ބައެއް ބޭފުޅުން ވިދާޅުވާ ގޮތުގައި އަމީރް ފިލިޕްގެ އެ ވަސިއްޔަތްޕުޅަކީ، ފިލިޕްގެ ހިތްޕުޅުގައި ރާނީ އެލިޒަބަތަށް އޮތް ވަފާތެރިކަމާއި ލޯބި ރަމްޒުކޮށްދޭ ކަމެކެވެ.

އަމީރް ފިލިޕް 2021 ވަނަ އަހަރު އަވަހާރަވި އިރު، ދެ ބޭފުޅުންގެ ކާވެންޏަށް 73 އަހަރު ފުރިއްޖެ އެވެ. ފިލިޕް އާއި އެލިޒަބަތު 1939 ވަނަ އަހަރު ބައްދަލުވެވަޑައިގެން، ލޯބީގެ ގޮތުން ގުޅިވަޑައިގެން އިރު، އެލިޒަބަތުގެ އުމުރުފުޅުން އެންމެ 13، އަދި އަމީރް ފިލިޕްގެ އުމުރުފުޅުން އޭރު 18 އަހަރެވެ. އެއަށް ފަހު ދެ ބޭފުޅުންގެ މެދުގައި ލޯބީގެ އެތައް ސިޓީތަކެއް ބަދަލުކުރެއްވި އެވެ.

އޭގެ ފަހުން އަމީރް ފިލިޕް، އެލިޒަބަތުގެ ކާވެންޏަށް އެދިވަޑައިގެން އެލިޒަބަތުގެ ބައްޕާފުޅު އަދި އޭރުގެ ރަސްގެފާނު ޖޯޖް ހައެއްގެ އަރިހަށް ހުށަހެޅުއްވީ، 1946 ވަނަ އަހަރު އެވެ. ރަސްގެފާނުގެ ރުހުމާއެކު ދެ ބޭފުޅުންގެ އެންގޭޖްމެންޓް ރަސްމީކޮށް އިއުލާންކުރެއްވީ ޖުލައި 9، 1947ގަ އެވެ. ރަސްމީ އިއްޒަތުގައި ދެ ބޭފުޅުންގެ ކާވެނިކުރެވުނީ ނޮވެމްބަރު 20، 1947ގަ އެވެ.

އެލިޒަބަތު އާއި ފިލިޕްގެ އެންމެ ދޮށީ ދެ ބޭފުޅުން ކަމަށްވާ އަމީރް ޗާލްސް (މިހާރުގެ ރަސްގެފާނު) އާއި އަމީރާ އޭން ލިބިވަޑައިގަތީ، 1952 ވަނަ އަހަރު އެލިޒަބަތު އިނގިރޭސި ރަނިކަމަށް އިސްކުރުމުގެ ކުރިންނެވެ. އަމީރް އެންޑްރޫ އާއި އަމީރް އެޑްވަޑް ލިބިވަޑައިގަތީ، ރަނިކަން ލިބިވަޑައިގެން ފަހުންނެވެ.

އަމީރް ފިލިޕް އަވަހާރަވި އިރު ދެ ބޭފުޅުންގެ ކާވެންޏަށް 73 އަހަރު ފުރިއްޖެ އެވެ. ޝާހީ އާއިލާގެ މަސްދަރުތަކާ ހަވާލާދީ ބައެއް ނޫސްތަކުން ރިޕޯޓްކޮށްފައިވާ ގޮތުން، އަމީރް ފިލިޕް އަވަހާރަވުމާ ގުޅިގެން ރާނީ އެލިޒަބަތު އަށް ވަރަށް ފުން ހިތާމައެއް ލިބިވަޑައިގެންނެވި އެވެ.

ރަސްގެފާނު ޖޯޖް ހައެއްގެ ހަނދާނީ ފައްޅީގެ ގޯތިތެރެއަކީ، މީލާދީން 15 ވަނަ ގަރުނުން ފެށިގެން އިނގިރޭސި ޝާހީ އާއިލާގެ ބޭފުޅުން ފަސްދާނުލަމުން އައި ތަނެވެ. އެ ފައްޅީގެ އަޑީގައި ޝާހީ ގަބުރު ކޮށާރެއް ތައްޔާރުކުރީ، އިނގިރޭސި ވިލާތުގެ ކުރީގެ ރަދުން ޖޯޖް ތިނެއްގެ އަމުރުފުޅަށް، 1804 ވަނަ އަހަރުން ފެށިގެން 1810 ވަނަ އަހަރާ ދެމެދުގަ އެވެ.

އެކޮށާރު ބިނާކޮށް ނިންމައި 1810 ވަނަ އަހަރު ބޭނުންކުރަން ފެށިފަހުން، އެންމެ ފުރަތަމަ އެ ކޮށާރުގައި ފަސްދާނުލީ ޖޯޖް ތިނެއްގެ ދަރިކަނބަލުން އަމީރާ އެމީލިއާ އެވެ.

އެ ކޮށާރުގެ ތެރެއަށް، ޝާހީ އާއިލާގެ ބޭފުޅުންގެ ހަށިކޮޅުތައް ސަންދޯކާ އެކުގައި ބާލަނީ، ފައްޅީގެ ތަޅުންގަނޑުން ކަނޑާފައި ހުންނަ ޖާގައަކުންނެވެ. އަމީރް ފިލިޕްގެ ހަށިކޮޅު ވެސް ވަގުތީ ގޮތުން އެ ކޮށާރަށް ބޭލީ އެ ޖާގައިންނެވެ.