ޗާލްސް ރަސްކަމުގެ ތަހުތުގައި ވެޑުވުން މެއި 6 ގައި

އިނގިރޭސި ރަސްކަމަށް އިސްވެވަޑައިގެންނެވި ރަސްގެފާނު ޗާލްސް ތިނެއް، ރަސްމީ ގޮތުން ތަހުތުގައި ވެޑުވުމުގެ ރަސްމިއްޔާތު އަންނަ އަހަރުގެ މެއި 6 ވަނަ ދުވަހު ބާއްވަން ހަމަޖެހިފައިވާ ކަމަށް، ލަންޑަންގައި ހުންނަ ބަކިންހަމް ގަނޑުވަރުން އިއްޔެ ބުނެފި އެވެ.

ރަސްގެފާނު ތަހުތުގައި ވަޑުވާ ރަސްމިއްޔާތުގައި އަނބިކަނބަލުން ރާނީ ކެމީލާ ވެސް ތަހުތުގައި ވެޑުވުން އޮންނާނެ އެވެ. ޝާހީ ކުލަ ގަދަ ރަސްމިއްޔާތެއްގެ ގޮތުގައި އޮންނަ އެ ހަފުލާގައި، ރަސްގެފާނަށް ސިޔާދަތީ ބާރު ރަސްމީކޮށް ހަވާލުކުރުމާއި އިސްތަށިފުޅުގައި ތާޖު އެޅުވުން އޮންނާނެ އެވެ.

ރަސްގެފާނު ޗާލްސް ރަސްކަމުގައި ވެޑުވުމަށް އަންނަ މެއި މަހު އިނގިރޭސި ވިލާތުގައި ބާއްވަން ތާވަލުކުރި އެ ރަސްމިއްޔާތަކީ، ވޭތުވެ ދިޔަ 70 އަހަރުގެ ތެރޭގައި އެ ގައުމުގައި ބާއްވާ މިފަދަ ފުރަތަމަ ހަފުލާ އެވެ. ތަހުތުގައި ބޭފުޅަކު ވެޑުވުމަށް އެންމެ ފަހުން ރަސްމިއްޔާތެއް ބާއްވާފައިވަނީ ޖޫން 1953 ގަ އެވެ. އެއީ ޗާލްސްގެ މަންމާފުޅު ރާނީ އެލިޒަބަތު ރަނިކަމުގެ ތަހުތުގައި ވެޑުވުމަށެވެ.

ރަސްކަމުގެ ތަހުތުގައި ވަޑުވާ އިރު ޗާލްސްގެ އުމުރުފުޅުން ހުންނަވާނީ 74 އަހަރުވެފަ އެވެ. މިއީ މިހާ ދޮށީ އުމުރެއްގެ ބޭފުޅަކު އިނގިރޭސި ތަހުތުގައި ވަޑުވާ ފުރަތަމަ ފަހަރެވެ. ޗާލްސް ރަސްކަމުގެ ތަހުތުގައި ވެޑުވުމުގެ ރަސްމިއްޔާތު އޮންނާނީ ލަންޑަންގެ ވެސްޓްމިންސްޓާ އަބީގަ އެވެ. ތަހުތުގައި ވެޑުވުމުގެ ރަސްމިއްޔާތު ކުރިއަށް ދާނީ އެ ފައްޅީގެ އިސް ފާދިރީގެ ބެއްލެވުމުގެ ދަށުންނެވެ.

އިނގިރޭސި ރަސްކަން، ޗާލްސް އަށް ލިބިވަޑައިގަތީ، މަންމާފުޅު އަދި އިނގިރޭސި ރާނީ އެލިޒަބަތު ދޭއް، އުމުރުފުޅުން 96 އަހަރުގައި، މިދިޔަ ސެޕްޓެމްބަރު މަހުގެ 8 ވަނަ ދުވަހު އަވަހާރަވުމާ ގުޅިގެންނެވެ. ހަތްދިހަ އަހަރު ރަނިކަން ކުރެއްވުމަށް ފަހު އަވަހާރަވި ރާނީ އެލިޒަބަތު އިނގިރޭސި ތަހުތުގައި ވެޑުވުމަށް ބޭއްވި ރަސްމިއްޔާތު ތިން ގަޑިއިރަށް ދެމިގެން ދިޔަ އެވެ.

ނަމަވެސް ޗާލްސް ތަހުތުގައި ވެޑުވުމަށް އަންނަ އަހަރު ބާއްވާ ރަސްމިއްޔާތު އެ އަށް ވުރެ އަވަހަށް ނިމޭނެ ކަމަށް ބެލެވެ އެވެ. އެލިޒަބަތު ތަހުތުގައި ވެޑުވުމަށް ބޭއްވި ރަސްމިއްޔާތަށް ދައުވަތު އެރުވި 8،000 ބޭފުޅުންނަށް ހާއްސަކޮށް ވެސްޓްމިންސްޓާ އަބީގައި ވަގުތީ ޓެންޓެއް ޖަހައި ޖާގަ އިތުރުކުރި އެވެ. ނަމަވެސް މިހާރު އެ ފައްޅީގެ ޖާގަ ހުރި ގޮތުން 2،200 އަށް ވުރެ ގިނަ މީހުންނަށް އެ ރަސްމިއްޔާތުގައި ބައިވެރިއެއް ނުވެވޭނެ އެވެ.