ކުޑަކުދިންގެ މެދުގައި އާންމު ހޭންޑް، ފުޓް އެންޑް މައުތު ބަލި ވަރަށް ބާރަށް ފެތުރެނީ!

ރާއްޖޭގައި ހޭންޑް، ފުޓް އެންޑް މައުތު ބަލި ވަރަށް ބާރަށް ފެތުރެމުން ދާތީ ސަމާލުވުމަށް އެޗްޕީއޭ އިން މިއަދު އިލްތިމާސް ކޮށްފި އެވެ.

އެ އިދާރާ އިން ނެރުނު ބަޔާނެއްގައި ބުނީ، ރާއްޖޭގައި ހޭންޑް، ފުޓް އެންޑް މައުތު ބަލި ވަރަށް ހަލުވިކަމާ އެކު މި ދުވަސްވަރު ފެތުރެމުން ދާތީ އެ ބަލީގެ އަލާމަތްތައް ދެނެގަނެ ރައްކާތެރިކަމުގެ ފިޔަވަޅު އެޅުން ވަރަށް މުހިންމު ކަމަށެވެ.

ހޭންޑް، ފުޓް އެންޑް މައުތު އަކީ ކުޑަކުދިންގެ މެދުގައި ވަރަށް ބާރަށް ފެތުރޭ މޫސުމީ ބައްޔެކެވެ. ވައިރަސްއަކުން ޖެހޭ، ގައިންގަޔަށް އަރާ މި ބަލި ބައެއް ފަހަރު ބޮޑެތި މީހުންނަށް ވެސް ޖެހެ އެވެ. ބަލި ޖެހުމުން ނަގާ ބިހިތައް ބައެއް ފަހަރު މުޅި ގަޔަށް ފެތުރުމުގެ ފުރުސަތު އޮވެ އެވެ.

ބަލީގެ އަލާމަތްތައް

• ހުން އައިސްް ބޮލުގައި ރިއްސުން.

• އަތްތިލަ އާއި ފައިތިލާގައި ރަތްކުލައިގެ ބިހިތަކެއް ނެގުމަށް ފަހު ފެން ފޮޅަކަށް ބަދަލުވުން.

• ކަރުތެރެ ފާރުވުން.

• ވަރުދެރަވުން.

• ކާ ހިތްނުވުން.

މި ބައްޔަށް ވަކި ފަރުވާއެއް ނޯވެ އެވެ. އެކަމަކު ބަލިން ފަސޭހަވުމަށް ކުރެވިދާނެ ބައެއް ކަންކަން އެބަހުއްޓެވެ. އޭގެ ތެރޭގައި؛

• ގިނައިން ދިޔާ ތަކެތި ބޭނުންކުރުން.

• ހުން އައުމުން ހުމަށް ބޭސް ކެއުން.

• ބިހިތަކުގައި ކެލަމިން ލޯޝަން ނުވަތަ ޑޮކްޓަރުގެ އިރުޝާދުގެ މަތިން ބޭހެއް ހޭކުން.

• ތިން ދުވަސް ތެރޭގައި ހުން ރަނގަޅު ނުވާ ނަމަ ޑޮކްޓަރަށް ދެއްކުން.

މިދިޔަ ޖުލައި މަހުން ފެށިގެން ރާއްޖޭގައި އާންމު ބަލިތައް ވަރަށް ބޮޑަށް އިތުރުވެފައިވާ ކަމަށް އެޗްޕީއޭގެ ތަފާސްހިސާބުތަކުން ދައްކަ އެވެ. އޭގެ ތެރޭގައި ޑެންގީ އާއި ބޭރަށް ހިންގުމާއި އަރިދަފުސް ރޯގާ ފަދަ ބަލިތައް ހިމެނެ އެވެ.