މި ފަހަރުގެ ބޯޓިން އެވޯޑްސް ގިނަ އިނާމުތަކެއް އެމްޓީސީސީގެ ބައެއް މުވައްޒަފުން އަދި ވަރަށް ގިނަ ކެޓަގަރީތަކުގެ އެވޯޑުތައް އެ ކުންފުނިން ރޭ ހޯދައިފި އެވެ.
ނެޝަނަލް ބޯޓިން އެސޯސިއޭޝަން އޮފް މޯލްޑިވްސް (އެންބީއޭއެމް) އިން ދޭ އެވޯޑް ހަފުލާގައި، އެންމެ މޮޅު ކެޕްޓަންގެ އެވޯޑް ހޯދީ އެމްޓީސީސީގެ ކެޕްޓަން އަހުމަދު ޒަކީ އެވެ. އެންމެ މޮޅު އިންޖިނިއަރުގެ އެވޯޑް ވެސް ލިބުނީ އެމްޓީސީސީގެ އިންޖިނިއަރެއް ކަމަށްވާ މުހައްމަދު ރަޝީދަށެވެ. އެންމެ މޮޅު ކްރޫގެ މަގާމު ލިބުނީ އެމްޓީސީސީގައި މަސައްކަތްކުރާ އިބްރާހިމް އަބްދުލް ހާދީ އަށެވެ.
ވަކިވަކި މީހުންގެ އެވޯޑްގެ އިތުރުން ވެސް އެމްޓީސީސީ އަށް ގިނަ ކެޓަގަރީތަކަކުން އެވޯޑު ލިބުނެވެ. އޭގެ ތެރޭގައި ޔަންމާ މެރިން އިންޖީނުގެ އެވޯޑާއި އެންމެ މަގުބޫލް ޑޮކްޔާޑް އެވޯޑް އަދި އެންމެ މަގުބޫލް ލޯކަލް ފެރީ އެވޯޑް ހިމެނެ އެވެ.
ބޯޓިން އެވޯޑްސް އަކީ 2016 ވަނަ އަހަރު ފެށި، ރާއްޖޭގެ ޓޫރިޒަމް ދާއިރާގެ ބޯޓުފަހަރާ ގުޅުން ހުރި އެކި ދާއިރާތަކުން ފާހަގަކޮށްލެވޭ ފަރާތްތަކުގެ އަގުވަޒަންކޮށް، އެ ދާއިރާ ކުރިއެރުވުމަށް އެންބީއޭއެމް އިން ދޭ އެވޯޑެކެވެ.
ބޯޓިން ދާއިރާގައި ހިއްސާވާ ގިނަ ކުންފުނިތަކާއި އަމިއްލަ ފަރާތްތަކާއެކު ރޭ ދަރުބާރުގޭގައި ބޭއްވި މި އަހަރުގެ ހަފުލާގައި 34 ކެޓަގަރީއަކުން އެވޯޑް ދިނެވެ.
އެންމެ ރީތި ސަފާރީ/ ޔޮޓް ނުވަތަ ލިވަބޯޑަށް ދޭ އެވޯޑާއި ދޯނިފަހަރުގެ ޑިޒައިނަށާއި އެންމެ މަގުބޫލު އިންޖީނު ފޯރުކޮށްދޭ ކުންފުނިތަކާއި މަގުބޫލް ބްްރޭންޑުތަކުގެ އިތުރުން އެންމެ މަގުބޫލް ޑައިވް ސަފާރީ އާއި ސާފް ސަފާރީ އާއި އެންމެ މަގުބޫލް އިންޖީނު ސަޕްލަޔަރުން ފަދަ ބޯޓުފަރާ ގުޅުން ހުރި ކެޓަގަރީތައް އޭގެ ތެރޭގައި ހިމެނެ އެވެ.
މި އަހަރުގެ އެންމެ މޮޅު ޑައިވް ގައިޑް އެވޯޑް ހޯދީ ޓޮޕްކްލާސް ކްރޫސިންގެ އަލީ ޝަރީފެވެ. އެންމެ މޮޅު ސާފް ގައިޑްގެ އެވޯޑް ކާމިޔާބުކުރީ މޯލްޑިވްސް ބޮޑީބޯޑިން އެސޯސިއޭޝަންގެ މޫޝަން އަދުނާން މޫސާ އެވެ.
ރޭގެ ހަފުލާގައި އެވޯޑު ލިބުނު ބައެއް އެހެން ކުންފުނިތަކުގެ ތެރޭގައި ބޯޓުފަހަރު އުފައްދާ އަލްޝާލީ މެރިން އާއި ގަލްފްކްރާފްޓާއި ތެޔޮ ފޯރުކޮށްދޭ ކުންފުނި ދަ ހޯކްސް އާއި އެލިއާ އިންވެސްޓްމެންޓްސް އާއި ވޮޔޭޖަސް މޯލްޑިވްސް އާއި އެލައިޑް އިންޝުއަރެންސާއި ޕާމް ޓްރީ މެރިން އާއި މޯލްޑިވްސް ހޮލިޑޭ ކަލެކްޝަން އަދި ޖަލްބޫތު ފަދަ ކުންފުނިތައް ހިމެނެ އެވެ.
ބޯޓުފަހަރުގެ ދާއިރާގައި ގިނަ ދުވަސްތަކެއް ވަންދެން ހިދުމަތް ކޮށްދިން ފަރާތްތަކުގެ އަގުވަޒަން ކުރުމުގެ ގޮތުން އެ ފަރާތްތަކަށް އެންބީއޭއެމްގެ ހަނދާނީ ފިލަ އާއި ޓޫރިޒަމް މިނިސްޓްރީގެ ޓޯކަން ވެސް ރޭގައި ދިނެވެ.
އެ ހަފުލާ ޝަރަފުވެރި ކޮށްދެއްވަމުން ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވީ، ވިދިވިދިގެން ތިން އަހަރު އެންމެ މަގުބޫލް މަންޒިލްގެ ލަގަބު ރާއްޖެ ހޯދުމުގައި ބޯޓިން ދާއިރާގެ ހިއްސާ ބޮޑު ކަމަށެވެ.
އެންބީއޭއެމްގެ ރައީސް އިސްމާއިލް ހަމީދު (ހައި ރައިޒް އިއްސެ) ވިދާޅުވި ގޮތުގައި، މި އަހަރުގެ އެވޯޑަށް 100 އަށް ވުރެ ގިނަ ފަރާތްތައް ނޮމިނޭޓް ވެފައިވާއިރު، އެވޯޑު ހައްގުވާ ފަރާތްތައް ހޮވީ ނޮމިނޭޓުވި ފަރާތްތަކާ ފަނޑިޔާރުންގެ ޕެނަލުން ކުރި ވަކިވަކި އިންޓަވިއުތަކާއި ބޯޓުފަހަރުތަކަށް ގޮސް، އެ ބަލައި، އިވެލުއޭޓްކޮށްގެންނެވެ.
ފަނޑިޔާރުންގެ ފަރާތުން ވާހަކަ ދައްކަވަމުން ކެޕްޓަން އާދިލް ރަޝީދު ވިދާޅުވީ، ރާއްޖޭގެ ބޯޓިން އިންޑަސްޓްރީ މިހާރު ވަރަށް ބޮޑަށް ކުރިއަރާފައިވާ ކަމަށެވެ. އެކަމަކު، އަދިވެސް ބައިވަރު ކަންކަން ރަނގަޅު ކުރަން ޖެހިފައިވާ ކަން ފާހަގަކުރައްވަމުން އާދިލް ވިދާޅުވީ، އެންމެ މުހިންމު އެއް ކަމަކީ ދިވެހިން އެ ދާއިރާ އަށް ޝައުގުވެރިކުރުވައި، މަސައްކަތައް ނެރުން ކަމަށެވެ.
"ގިނަ ސަފާރީ ފަދަ ތަންތަނުގައި ދިވެހި މުވައްޒަފުން މަދުވުމުން އެންމެ އެކަށީގެންވާ 'މޯލްޑިވިއަން އެކްސްޕީރިއެންސް' އެއް ޓޫރިސްޓުންނަކަށް ނުލިބޭ،" އޭނާ ވިދާޅުވި އެވެ.
