މިއަދު ބޭއްވި ވާދަވެރި ރިޔާސީ ޕްރައިމަރީގެ ނަތީޖާއަށް ފަހު، ތަފާތު ހިޔާލުތައް އެއް ފަރާތްކޮށް، މި އަހަރުގެ ރިޔާސީ އިންތިޚާބު ކާމިޔާބުކުރަން އެންމެން އެކުގައި މަސައްކަތް ކުރުމަށް އެ ޕްރައިމަރީ ބޮޑު ތަފާތަކުން ކާމިޔާބު ކުރެއްވި ރައީސް އިބްރާހިމް މުހައްމަދު ސޯލިހު މިރޭ ގޮވާލައްވައިފި އެވެ.
އެމްޑީޕީގެ ޕްރައިމަރީގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދާ ވާދަކުރައްވައި، ދެވަނަ ދައުރަކަށް ވާދަކުރައްވަން އެ ޕާޓީގެ ރިޔާސީ ޓިކެޓް ކާމިޔާބު ކުރެއްވުމަށް ފަހު، އެކަން ފާހަގަކުރުމަށް އެމްޑީޕީގެ މައި ހަރުގޭގައި ސަޕޯޓަރުންނާ ވާހަކަފުޅު ދައްކަވަމުން ރައީސް ވިދާޅުވީ މި ހިސާބުން ޕާޓީގެ އެތެރޭގެ ވާދަވެރިކަން ނިމުނީ ކަމަށެވެ. ދެން ނުކުންނަންވީ އެއްބައެއްގެ ގޮތުގައި ރިޔާސީ އިންތިހާބު ކާމިޔާބު ކުރަން ކަމަށް އެ މަނިކުފާނު ވިދާޅުވި އެވެ.
"މިހާރު އަޅުގަނޑުމެންގެ ވާދަވެރިކަން ނިމުނީ. އެކަން މި ނިމުނީ. ދެން ނިކުންނަންވީ އަނެއްކާވެސް އެކަތިގަނޑެއްގެ ގޮތުގައި ރިޔާސީ އިންތިހާބު އެމްޑީޕީ އަށް ކާމިޔާބު ކުރަން،" ނަޝީދަށް އިޝާރާތް ކުރައްވައި، ރައީސް އިބްރާހިމް މުހައްމަދު ސޯލިހު ވިދާޅުވި އެވެ.
އެ މަނިކުފާނު އެހެން ވިދާޅުވިއިރު، މި ޕްރައިމަރީގައި ނަޝީދާ ދެ ބޭފުޅުންގެ ގުޅުން އިތުރަށް ގޯސްވެ، އެއްބޭފުޅަކު އަނެއް ބޭފުޅަކަށް އަދި އެއް ފެކްޝަނުން އަނެއް ފެކްޝަނަށް ވެސް ވަނީ ޒާތީ ގޮތުން އެތައް ކަމެއް ކޮށްފަ އެވެ.
ރައީސް މިރޭ ވިދާޅުވީ، ވާދަވެރި އިންތިހާބެއްގެ ތެރޭގައި ފެންނަން ނުޖެހޭ ބައެއް މަންޒަރުތައް މި ފަހަރު ފެނުނަސް، އެކަމުގެ ހިތް ބުރަކަމެއް ނުގެންގުޅުއްވާ ކަމަށެވެ. އަދި އެމްޑީޕީ ކުރިއަށް ގެންދަން ކުރާ މަސައްކަތުގައި ބައިވެރިވެވޭނެ ކަމަށް އެ މަނިކުފާނު ވިދާޅުވި އެވެ.
"އަޅުގަނޑު މި ގޮވާލަނީ ހުރިހާ ބޭފުޅުން ވަޑައިގެން، އަޅުގަނޑުމެންނާ އެކު ނިކުމެވަޑައިގެން އެމްޑީޕީ ކުރިއަށް ގެންދިއުމަށް މި ކުރާ މަސައްކަތުގައި ބައިވެރިވުމަށް،" ރައީސް ވިދާޅުވި އެވެ.
އެމްޑީޕީގެ އިސް ލީޑަރުގެ މަގާމު ވެސް ފުރުއްވާ ރައީސް އިބްރާހިމް މުހައްމަދު ސޯލިހު ވިދާޅުވި ގޮތުގައި ޕްރައިމަރީ އަށް ވުރެ ފަސޭހައިން ރިޔާސީ އިންތިހާބު އެމަނިކުފާނަށް ފަސޭހައިން ކާމިޔާބު ކުރެއްވޭނެ އެވެ. ސަބަބަކީ އެމްޑީޕީއަކީ ހައްގުތައް ހޯދައި ދިނުމާއި ތަރައްގީ ގެނައުމުގައި އަބަދުވެސް އެއް ވިސްނުމެއްގައި މަސައްކަތްކުރާ ޕާޓީއަކަށް ވާތީ ކަމަށް ވިދާޅުވި އެވެ.
"މި އަކީ އެއް ނުކުރެވޭނެ ދެ ބައެއް ނޫން. ތި ހުރިހާ ބޭފުޅުން ވެސް މި ރެއިން ފެށިގެން މަސައްކަތް ކުރައްވަން ވީ އަޅުގަނޑުމެން އެކަތިގަނޑެއްގެ ގޮތުގައި އަޅުގަނޑުމެންގެ އިދިކޮޅު ޕާޓީ، އަޅުގަނޑުމެން މި ދިޔައީ ވާދަވެރި އިންތިހާބެއް، އަޅުގަނޑުމެން އެ ޕާޓީއާ ވާދަކޮށް ކާމިޔާބުކުރަން،" އިދިކޮޅު ޕީޕީއެމަށް އިޝާރާތް ކުރައްވަމުން ރައީސް ވިދާޅުވި އެވެ.
އެމްޑީޕީއަކީ ސިޔާސީ ވާދަވެރިކަން ރާއްޖެ އަށް ގެނައި ޕާޓީ ކަން ފާހަގަ ކުރައްވައި، ރައީސް ވިދާޅުވީ އެ މަނިކުފާނު ހުންނެވީ އެމްޑީޕީއާ އެކު ކުރިއަށް ވަޑައިގަންނަވަން ތައްޔާރަށް ކަމަށެވެ. ދެން އޮތީ ކުޑަކޮށް އުފާ ފާޅުކޮށްލުމަށް ފަހު އަނެއްކާވެސް މަސައްކަތުގައި ކުރިއަށް ދިއުން ކަމަށް ވިދާޅުވި އެވެ.
ނަޝީދާ ވާދަ ކުރައްވައި، ރައީސް އިބްރާހިމް މުހައްމަދު ސޯލިހު ޕްރައިމަރީ ކާމިޔާބު ކުރެއްވީ 62 ޕަސެންޓު ވޯޓު ހޯއްދަވައިގެންނެވެ. ނަމަވެސް ނަޝީދުގެ ކެމްޕެއިން ޓީމުން ގެންދަނީ އިންތިހާބުގައި މައްސަލަތަކެއް ހުރި ކަމަށް ބުނެ، ބަލި ގަބޫލުކުރަން ދެކޮޅު ހަދަމުންނެވެ.