ޕީޕީއެމް ގަބޫލުކުރާ އަސާސްތަކުގެ މައްޗަށް ކޯލިޝަން ހަދަން ތައްޔާރު: ޝިޔާމް

ޖުމްހޫރީ ޕާޓީ (ޖޭޕީ) ނުވަތަ އެހެން ޕާޓީއާއެކު ވިޔަސް ޕީޕީއެމުން ގަބޫލުކުރާ އަސާސްތަކުގެ މައްޗަށް ކޯލިޝަން ހެދުމަށް އެ ޕާޓީގެ ދޮރުތައް ހުޅުވާލައިފައިވާ ކަމަށް ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް މިއަދު ވިދާޅުވެއްޖެ އެވެ.

ސެޕްޓެމްބަރު 9 ގައި ބާއްވާ މި އަހަރުގެ ރިޔާސީ އިންތިހާބުގައި ޖޭޕީގެ ކެންޑިޑޭޓަކު ނެރެ، އެ ޕާޓީން އިސްވެ އޮވެ ޕާޓީތަކާއެކު ކޯލިޝަނަކުން ވާދަކުރަން ޖޭޕީގެ ކައުންސިލްގެ އިއްތިފާގުން ރޭ ވަނީ ފާސްކޮށްފަ އެވެ. ބައިބައި ވެފައިވާ އެމްޑީޕީގެ ރައީސް މުހައްމަދު ނަޝީދުގެ ފެކްޝަނާއި ޖޭޕީގެ މަޖިލިސް މެމްބަރުން ގުޅިގެން ޖޮއިންޓް ޕާލިމަންޓްރީ ގްރޫޕެއް އުފެއްދުމުގެ ވާހަކަތައް ވެސް ޖޭޕީގެ އެ ނިންމުމާއެކު މިހާރު ދެއްކެވެން ފަށައިފަ އެވެ.

މި ސަރުކާރުގެ ކޯލިޝަންގެ އެންމެ މުހިންމު އެއް ބައިވެރިޔާ ޖޭޕީގެ ރޭގެ ނިންމުމާއެކު ރާއްޖޭގެ ސިޔާސީ މަސްރަހު ހޫނުވެފައި ވަނިކޮށް، އިދިކޮޅު ޕީޕީއެމުން މިއަދު ބޭއްވި ނޫސްވެރިންގެ ބައްދަލުވުމެއްގައި، ޖޭޕީއާއެކު ކޯލިޝަން ހެދުމުގެ ވިސްނުން ގެންގުޅުއްވަންތޯ "މިހާރު" އިން ކުރި ސުވާލަށް ޖަވާބު ދެއްވަމުން ޝިޔާމް ވިދާޅުވީ، ކޮންމެ ކަމެއްގައި ވެސް އެ ޕާޓީން ގަބޫލުކުރާ އުސޫލުތަކަކާއި އަސާސްތަކެއް ހުންނަ ކަމަށެވެ.

BREAKING: Riyaasee inthihab gai vakin vaadha kuran JP in nimmaifi

The most trusted news source in the Maldives

Mihaaru

މި އަހަރުގެ ރިޔާސީ އިންތިހާބަށް ޖޭޕީގެ ކެންޑިޑޭޓަކު ނެރެން ނުވަތަ އެ ޕާޓީ އިސްވެ ކޯލިޝަން ހަދަން ޖެހިއްޖެ ނަމަ އެ ކަން ކުރަން ފާސްކުރުމުން އެނގެނީ ރައީސް އިބްރާހިމް މުހައްމަދު ސޯލިހް ނިކަމެތިވަމުންދާ ކަން ކަމަށް ވެސް ޝިޔާމް ވިދާޅުވި އެވެ.

"އަޅުގަނޑުމެންގެ އެބަހުރި އުސޫލުތަކެއް، އަސާސްތަކެއް، ރައީސް ޔާމީން އެބަ ޕްރޮމޯޓް ކުރައްވާ ކަންތައްތަކެއް، ގައުމީ/ ވަތަނީ ކަންތައްތަކެއް. އަޅުގަނޑުމެންނާއެކު މަސައްކަތް ކުރައްވަންޏާ އެ ކަންތަކުގައި ހިފަން ޖެހޭނެ. އެއީ ކޮންމެ ބޭފުޅަކަށް ވިޔަސް ކޮންމެ ޕާޓީއަކަށް ވިޔަސް،" މި ސަރުކާރަށް ޕީޕީއެމްގެ ތެރެއިން އެންމެ ބޮޑަށް ފިއްތުންތައް ކުރިމަތި ކުރައްވާ އެއް ބޭފުޅާ ޝިޔާމް ވިދާޅުވި އެވެ.

އޭނާ ވިދާޅުވިގޮތުގައި، ރާއްޖޭގެ މިނިވަންކަމާއި އިސްލާމް ދީނަށް ކުރިމަތިވާ ގޮންޖެހުންތަކާއި ކޮރަޕްޝަނާއި އިންޑިއާގެ ނުފޫޒު އޮތް ވަރާއި އިންޑިއާގެ ސިފައިން ރާއްޖޭގައި ތިބި ވާހަކަ އެ ޕާޓީއަކާއެކު ޕީޕީއެމަށް ދެއްކެން ޖެހޭނެ އެވެ.

Nasheed ge fikureh ge dhirun aai JP ge PG group gulhumuge visnun

The most trusted news source in the Maldives

Mihaaru

"އެހެން ނޫނީ އަޅުގަނޑުމެންނަށް، އަޅުގަނޑުމެންގެ ސަޕޯޓަރުންނަށް ވެސް ވަރަށް އުނދަގޫވާނެ ގަބޫލުކުރަން. އަޅުގަނޑުމެންގެ، ރައީސް ޔާމީންގެ ޕާޓީގެ ދޮރުތައް ވަނީ ހުޅުވާލެވިފައި،" ޝިޔާމް ވިދާޅުވި އެވެ.

އޭނާ ވިދާޅުވީ ކުރީގެ ރައީސް އަބްދުﷲ ޔާމީނަށް ރާއްޖޭގެ ގިނަ ބަޔަކު ސަޕޯޓު ކުރަނީ ވެސް ޕީޕީއެމް ގަބޫލުކުރާ ކަންތައްތަކެއްގެ މަތީގަ ތިބޭތީ ކަމަށެވެ.

ޕީޕީއެމުން މިހާރު ނިންމާފައި ވަނީ އެ ޕާޓީން ވަކިން އިންތިހާބަށް ނިުކުތުމަަށެވެ. ނަމަވެސް އެ ޕާޓީގެ ކެނޑިޑޭޓް، ޔާމީން ޖަލަށް ލާފައި ވާތީ އެ ޕާޓިން ގަބޫލު ކުރަނީ މި މަސް ތެރޭގައި އެ މަނިކުފާނު މިނިވަން ވާނެ ކަމަށެވެ. އެއާއެކު ރިޔާސީ އިންތިހާބުން ޖާގަ ހޯއްދަވާނެ ކަމަށް ޕީޕީއެމުން ދެކެ އެވެ.

ރައީސް އިބްރާހިމް މުހައްމަދު ސޯލިހްގެ ދެ ވަނަ ދައުރަކަށް، ކޯލިޝަން ހަދަން ދައުވަތު ދެއްވި ޕާޓީތަކުގެ ތެރެއިން އަދާލަތު ޕާޓީ އާއި އެމްޑީއޭގެ ނިންމުން އިއުލާންކޮށްފައި ވިޔަސް ކޯލިޝަންގައި ހިމެނޭ އެމްއާރުއެމުން އަދި ގޮތެއް ނުނިންމަ އެވެ.