އިިދިކޮޅު ކޯލިޝަނުން މާލޭގައި ރޭ ބޭއްވި މުޒާހަރާ ކަވަރުކުރަން އުޅުނު ނޫސްވެރިއަކު ހައްޔަރުކުރުމުން މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން އެކަން ކުށްވެރިކޮށް، ކަންބޮޑުވުންފާޅުކޮށްފި އެވެ.
އެ މުޒާހަރާ ރޫޅާލަން ނިކުތް އެސްއޯ ފުލުހުން، "އަވަސް" ނޫހުގެ އެ ނޫސްވެރިޔާ ހައްޔަރުކޮށްފައިވަނީ ނޫސްވެރިއެއްކަން އަންގައިދޭ ކާޑު ވެސް އަޅައިގެން ހުއްޓާ އެވެ. އެކަމަކު އޭނާ ހައްޔަރުކުރި ސަބަބު ފުލުހުން އަދި ހާމައެއް ނުކުރެ އެވެ.
އެ މައްސަލާގައި އެމްޖޭއޭ އިން ބުނީ މުޒާހަރާތައް ކަވަރުކުރުމުގައި ހަރަކާތްތެރިވަމުން އަންނަ ނޫސްވެރިންނަށް އާންމު ގޮތެއްގައި ފުލުހުންގެ ފަރާތުން އަނިޔާ އާއި ފުރައްސާރަ ލިބެމުންދިއުމަކީ އެ ޖަމިއްޔާ އިން ވަރަށް ބޮޑަށް ކަންބޮޑުވާ ކަމެއް ކަމަށެވެ.
އެހެންވެ، އެ ޖަމިއްޔާ އިން ވަނީ އެއްވުންތައް ކަވަރުކުރުމުގައި ހަރަކާތްތެރިވާ ނޫސްވެރިންނަށް ރައްކާތެރިކަން ކަށަވަރުކޮށްދިނުމަށް ފުލުހުންނާއި ސަރުކާރަށް ގޮވާލައިފަ އެވެ.
އެ ޖަމިއްޔާ އިން ކަންބޮޑުވުން ފާޅުކޮށްފައިވާ އަނެއް ކަމަކީ މީޑިއާގެ ހައްގުތައް ނިގުޅޭ ފަދަ މައްސަލަތައް މިއަހަރުގެ މިހާތަނަށް އިތުރުވެފައިވާތީ އެވެ. އެމްޖޭއޭ އިން ބުނި ގޮތުގައި މިހާތަނަށް އެ ފަދަ 8 މައްސަލައެއް ރިޕޯޓްކޮށްފައިވެ އެވެ.