ފަނޑިޔާރު ހަސަން ސައީދު: އޭނާގެ ސަސްޕެންޑްކުރަން ނިންމީ ގޯސްކޮށް ކަމަށް އިސްތިއުނާފް މަޖިލީހުން ވަނީ ނިންމާފައި --- ފޮޓޯ/މިހާރު
20 އެޕްރީލް 2023 - 14:06
12 comments
ގާނޫނާ ހިލާފަށް ކައިވެންޏެއް ކޮށްދޭން މަގުފަހިކޮށްދިން ކަމަށް ބުނެ ކްރިމިނަލް ކޯޓުގެ ގާޒީ ހަސަން ސައީދު 14 ދުވަހަށް ސަސްޕެންޑްކުރީ ގޯސްކޮށް ކަމަށާއި އެކަމުގައި ސުލޫކާ ހިލާފު ކަމެއް ނެތް ކަމަށް ފަނޑިޔާރުންގެ އިސްތިއުނާފް މަޖިލީހުން މިއަދު ނިންމައިފި އެވެ.
ގާޒީ ހަސަން ދެ ހަފުތާ އަށް ސަސްޕެންޑް ކުރަން ޖުޑީޝަލް ސާވިސް ކޮމިޝަން (ޖޭއެސްސީ) އިން މިދިޔަ ފެބްރުއަރީ މަހު ނިންމީ އޭނާ ފެމިލީ ކޯޓުގެ އިސްގާޒީއަކަށް 2018 ވަނަ އަހަރު ހުންނެވިއިރު، އެ ކޯޓުގެ މުވައްޒަފުންތަކެއް ރާއްޖެ އިން ބޭރަށް ފޮނުވައިގެން ކައިވެންޏެއް ކޮށްދޭން މަގުފަހި ކޮށްދިން ކަމަށް ބުނެ އެވެ.
އެ ނިންމުން ގާޒީ ހަސަންގެ ފަރާތުން އިސްތިއުނާފް ކުރުމުން އިސްތިއުނާފް ފަނޑިޔާރުންގެ މަޖިލީހުން ނިންމި ނިންމުމުގައި ވަނީ ސިންގަޕޫރަށް ގޮސްގެން ކައިވެނި ކޮށްދޭން އޭނާ ލަފާ ދެއްވީ ކައިވެނީގެ ރަޖިސްޓްރާ އެކަމުގައި އޭނާގެ ލަފައަކަށް އެދުމުން ކަމަށެވެ. އެއީ ސިންގަޕޫރުގެ ގާނޫނާއި ރާއްޖޭގެ ގާނޫނު ވެސް ކަނޑައެޅިގެން މަނާކުރާ ކަމެއް ނޫން ކަމަށާއި އެހެންވެ، އެކަމުގައި ގާނޫނާ ކަނޑައެޅިގެން ހިލާފު ނުވާ ކަމަށް އެ ނިންމުމުގައިވެ އެވެ.
"މި މައްސަލާގައި ގާޒީ ހަސަން ސައީދުގެ މި އަމަލަކީ ޣައިރު ސުލޫކީ އަމަލެއް ނޫން ކަމަށް ފަނޑިޔާރުންގެ އިސްތިއުނާފް މަޖިލީހުގެ އިއްތިފާގުން ކަނޑައަޅައިފީމެވެ،" ތިން ފަނޑިޔާރުންގެ އިއްތިފާގުން ނިންމެވި އެ ނިންމުމުގައިވެ އެވެ.
ޖޭއެސްސީގެ ގާނޫނުގެ ދަށުން އުފެދިފައިވާ ފަނޑިޔާރުންގެ އިސްތިއުނާފްގެ މަޖިލީހުގައި މިހާރު ތިއްބަވަނީ ސުޕްރީމް ކޯޓުގެ ފަނޑިޔާރު އަލީ ރަޝީދު ހުސައިނާއި ހައި ކޯޓުގެ ފަނޑިޔާރު މުހައްމަދު ފައިސަލް އަދި ޖުވެނައިލް ކޯޓުގެ ގާޒީ އަހުމަދު ޝަރީފެވެ.
ފަނޑިޔާރުންގެ އިސްތިއުނާފް މަޖިލީހަކީ ޖޭއެސްސީން ފަނޑިޔާރުންނާ މެދު އަޅާ ސުލޫކީ ފިޔަވަޅުތައް އިސްތިއުނާފް ކުރެވޭ މަޖިލީހެވެ. ނަމަވެސް ފަނޑިޔާރުކަމުން ވަކިކުރަން ނިންމާ ނިންމުންތައް އެ މަޖިލީހުގައި އިސްތިއުނާފެއް ނުކުރެވޭނެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މަބުނީ
21 April 2023
ސުލޫކީ މައްސަލައަކަށް ވީ ކޮން އުސޫލަކުންތަ؟ ލައްކަ ނުރުހޭ ކޮމެންޓްވެސް ހުރީމަ އަހާލީ. ތަހުޒީބު އިލްމީ ސާފު ސީދާ މެސެޖަށް އަހަރެމެން އާދަވާން ފެނޭ.
ބިޖަންދަރު ކުނބުޅުވާދީ
21 April 2023
މިހާރު ތި މައްސަލަ އިންޓަރނެޝަނަލް ކޯޓް އޮފް ޖަސްޓިސް ގައި އިސްތިއުނާފް ކުރެވެމުންދާ ވާހަކަ ދަންނަވަމެވެ.
އެސް
20 April 2023
ހައްގަށް ނަސްރު ލިބޭނެ!
ސުއްލަމް މިޔާ
20 April 2023
ހުވަ ފެނުން ކުރެވުނު ކާވެނި ރަޖިސްޓްރީ ކުރެވޭނެއުތަ؟
އަސްލު...
20 April 2023
ހާދަގަދަ ބާރެއް ލިބިގެންވާ ބޭފުޅެކޭ، ހައިރާންވޭ އަލީ ގެ މައްސަލަ ހިންގިގޮތުންވެސް ހިތަންއެރި...
ޙަސަން ސައީދު
20 April 2023
އިސްތިއުނާފް މަޖްލީހަށް ލިބޭ ބާރެއް ނޫން ޖޭ އެސް ސީން ނިންމި ނިންމުން ރަނގަޅުތޯ ބެލުމަކީ . ކުރެވޭނެ ކަމަކީ އިޖްރާއަތު ރަނގަޅުތޯ ބެލުން
ޓޫޓޫ
20 April 2023
ޖޭއެސްސީއަށް ބެލެނީ ސުލޫކީ މައްސަލަ ސުލޫކީ މައްސަލައެއް ނޫންކަމަށްވާނަމަ އެއީ އިޖުރާއީ ކަމެކެވެ.
ޖުޑީޝަލް ޖުހާ
20 April 2023
ޣައިރު ސުލޫކީ އަމަލެއް ނޫނިއްޔާ އެވާނީ ސުލޫކީ އަމަލަކަށް. ލޮލް މޮޅު ލަފްޒެއް ލައިގެން ހަސަނު ހައްދަނީ.
ކެރެފާސުލޫކު
20 April 2023
ޣައިރު އެއީ ނަފީކުރާ އެއްޗެކެވެ. ސުލޫކު ކިޔަނީ މީހެއްގެ ކިބައިގާ ހުންނަ ރަނގަޅު އަދި ނުރަނގަޅު ސިފައެވެ. އެހެންނަމަވެސް ސުލޫކު އެހެން ސިފަޔަކާ އެކުނުވާނަމަ ރަނަގަޅު އެއްޗެއްގެ ގޮތުގަ ބޭނުންކުރެއެވެ. މިސާލި. މީނަގެ ކިބައިގަ ސުލޫކެއް ނެތެވެ. މިގޮތަށް ބަލާނަމަ ޣައިރު ދުސްތޫރީ މައްސަލައެކޭ އެއްގޮތަށް ޣައިރު ސުލޫކީ ބޭނުން ކުރެވިދާނެއެވެ.
އަސްލީ
20 April 2023
ތި ކާވެނިކުރަން ސިންގަޕޫރަށް ދިޔައީ މާއްދީ ފައިދާތަކެއް ލިބޭތީ. ރާއްޖޭގެ އިޚްތިސާސް އިން ބޭރަށް މީހުިން ފޮނުވައިގެން ކައިވެި ކޮށްދެވެންޏާ، ގާޒީން ރާއްޖެއިން ބޭރަށް ފޮނުވައިގެން ޝަރީއަތް ވެސް ކުރެވެންޖެހޭނެ. މި ގައުމަކީ އިންސާފް ލިބޭ ގައުމެއް ނޫން.
ހަގީގީ
20 April 2023
ދެން ކަލޭ ތިގޮތަށް ނިންމީމާ ހުރިހާކަމެއް ނިމުނީތާދޯ؟ ލޮލް
ޥަކީލް
20 April 2023
އެ ކާވެނި ކޮށްދިނުމަށް އެދުނީ ވަކީލެއްގެ ގޮތުން އަޅުގަނޑު ލިޔެދިން ސިޓީއަކުން.. މައުޒޫނާއި ކޯޓުގެ 2 އިދާރީ މުވައްޒަފުން ބޭރަށް ގެންގޮސްދިނުމާއި ތިބުމާއި ކެއުމާއި ގެނެސްދިނުމަށް ޚަރަދު ދޭނެކަމަށް ބަޔާން ކުރިން.. އަންޑަރ ގްރައުންޑް އިތުރު ކަމެއް ނުހިންގަން..