ރައްޔިތުންގެ މަޖިލީހުގެ އަމީން އާންމު ފާތިމަތު ނިއުޝާ ނޫސްވެރިންނާ ވާހަކަ ދައްކަވަނީ-- ފައިލް ފޮޓޯ: ނިޝާން އަލީ | މިހާރު
10 ޖޫން 2023 - 23:29
44 comments
ރައްޔިތުންގެ މަޖިލީހުގެ ދާއިމީ ކޮމިޓީތައް އެކުލަވާ ނުލައި އޮތް މައްސަލާގައި އެމްޑީޕީގެ ވިސްނުމާއި މަޖިލީހުގެ އިދާރާ އިން ދެކޮޅު ކަން ހާމަ ކުރައްވައި އެ ޕާޓީގެ ޕާލިމެންޓަރީ ގްރޫޕަށް އެ އިދާރާ އިން ސިޓީއެއް ފޮނުވައިފި އެވެ.
އެމްޑީޕީގައި ތިއްބެވި 13 މެންބަރަކު އެ ޕާޓީން ވަކިވުމާ ގުޅިގެން މަޖިލީހުގެ ކޮމިޓީތަކަށް އަންނަ ބަދަލުތައް ގެނައުމަށްޓަކައި ކޮމިޓީތަކުގެ މަސައްކަތް މަޑުޖައްސާލީ މިދިޔަ މަހުގެ 22 އިގަ އެވެ. އެ ދުވަހު ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު އިއުލާން ކުރެއްވީ ޕާޓީތަކުގެ ލީޑަރުންނާ މަޝްވަރާ ކުރެއްވުމަށް ފަހު އަލުން ކޮމިޓީތައް އެކުލަވާލާނެ ކަމަށެވެ.
ނަމަވެސް މިދިޔަ ތިން ހަފްތާއެއްހާ ދުވަސް ދިޔައީ ޕާޓީތަކުގެ މެދުގައި އެއްބަސްވުމަކަށް ނާދެވި މަޖިލީހުގެ އެއްވެސް ކޮމިޓީއެއް އެކުލަވައި ނުލަ އެވެ. އޭގެ ސަބަބުން މަޖިލީހަށް ހުށަހެޅިފައިވާ ބިލުތަކާއި އިތުބާރު ނެތް ކަމުގެ މައްސަލަތައް ވެސް ވަނީ ހުއްޓުމަކަށް އައިސްފަ އެވެ.
އެ މައްސަލާގައި އެންމެ ފަހުން އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަހުމަދު އަސްލަމް ވަނީ މަޖިލީހުގެ ގަވައިދުގެ 106 ވަނަ މާއްދާ އަށް ރިއާޔަތް ކުރައްވައި ކޮމިޓީތައް އަބަދުވެސް ދެމިއޮންނަން ވާނެ ކަމަށް މަޖިލީހުގެ އަމީން އާންމު ފާތިމަތު ނިއުޝާ އަށް ސިޓީއަަކުން ދަންނަވައިފަ އެވެ.
އެ މާއްދާގައި ބުނެފައި ވަނީ ދާއިމީ ކޮމިޓީތަކަކީ އަބަދުވެސް ދެމި އޮންނަ ކޮމިޓީތަކެއް ކަމަށެވެ.
އެހެންވެ މަޖިލީހުގެ އިދާރާ އިން ކޮމިޓީއަށް ގޮވާލައި މަސައްކަތްތައް ކުރިޔަށް ގެންދަން ޖެހޭނެ ކަމަށް އެކަމާ ގުޅޭ ގޮތުން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި އަސްލަމް ވިދާޅުވި އެވެ.
އަމީން އާންމުގެ ރައުޔަކީ ކޮމިޓީތައް އަލުން އެކުލަވާލަން ޖެހޭ ކަަމަށް
ގާނޫނީ ބޮޑު ބަހުސަކަށް ވެފައިވާ މި މައްސަލަ އާ ގުޅިގެން ނިއުޝާ ސޮއި ކުރައްވައި މިއަދު އަސްލަމަށް ފޮނުއްވި ސިޓީއެއްގައި ވިދާޅުވީ 106 ވަނަ މާއްދާގައި އެހެން ބަޔާން ކުރި ނަމަވެސް މަޖިލިހުގެ ގަވައިދުގެ 131 ވަނަ މާއްދާގެ ދަށުން މަޖިލީހުގައި ޕާޓީތައް ނިސްބަތްވާ ގޮތް އެއީ ހަމައެއް ކަމުގައި ބަލައި އެ ހަމައިން ކޮމިޓީތަކުގައި ވެސް ޕާޓިތައް ތަމްސީލު ވާ ގޮތަށް އަމަލުކުރަން ޖެހޭ ކަމަށެވެ.
ވަކި ސިޔާސީ ޕާޓީއަކަށް ނިސްބަތް ނުވާ މެންބަރުންނަށް ވެސް އެކަށީގެންވާ ވަޒަން ހަމަ ފުރުސަތެއް ދޭން ޖެހޭނެ ކަމަށް ގަވައިދު ބުނާ ކަމަށް ނިއުޝާ ވިދާޅުވި އެވެ.
ގަވައިދުގެ 130 ވަނަ މާއްދާގެ ދަށުން ދާއިމީ ކޮމިޓީތަކުގެ މެންބަރުން އެ މަޖިލީހުގެ އުމުރު ނިމެންދެން ތިބޭނެ ކަމަށް ބަޔާން ކޮށްފައިވީ ނަމަވެސް ޕާޓީއަކުން މެންބަރަކު ވަކި ވެއްޖެ ނަމަ އެ ހާލަތު ބަދަލު ވާނެ ކަމަށް ވެސް އެ މާއްދާގައި ބުނާ ކަމަށް ނިއުޝާ ވިދާޅުވި އެވެ.
މަޖިލީހުގެ ރައީސް އަދި އަމީން އާންމު
"މަޖިލީހުގެ ދަފްތަރުގައި މެންބަރުން ހިމެނިވަޑައިގަންނަވާ ނިސްބަތަށް މިހާރު މި ވަނީ ބޮޑު ބަދަލެއް އައިސްފައި. މަޖިލީހުގެ ގަަވައިދުގެ 130 ވަނަ މާއްދާގެ ށ ގެ އެއް ވަނަ ނަމްބަރުގެ ދަށުން މަޖިލީހުގެ ދާއިމީ ކޮމިޓީތަކުގައި އިސްވެދެންނެވި 13 މެންބަރުން ތަމްސީލު ކުރައްވަމުން ގެންދެވި ހައިސިއްޔަތު ވެސް ވަނީ އެ މެންބަރުންނަށް ގެއްލިފައި،" އޭނާ ވިދާޅުވި އެވެ.
ނިއުޝާ ވިދާޅުވި ގޮތުގައި ގަވައިދު ބުނާ ގޮތުން ވަކި ޕާޓީއަކަށް ނިސްބަތް ނުވާ މެންބަރުންގެ މަސްލަހަތު ހިމާޔަތް ކުރާނީ މެޖޯރިޓީ ލީޑަރާއި މައިނޯރިޓީ ލީޑަރުގެ މަޝްވަރާގެ މަތިން މަޖިލީހުގެ ރައީސެވެ. އަދި އެ މެންބަރުން ކޮމިޓީތަކުގައި ހިމެނިވަޑައިގަންނަވާ ނިސްބަތަށް އަންނަ ބަދަލު މަޖިލީހުން ފާސް ކުރަން ޖެހޭނެ އެވެ. މިހާރު ކުރިޔަށް ދަނީ އެ މަރުހަލާ ކަމަށް އަމީން އާންމު ވިދާޅުވި އެވެ.
ނިއުޝާ ވިދާޅުވީ ދާއިމީ ކޮމިޓީތަކަށް މެންބަރުން ކަނޑައެޅުމަށްޓަކައި ވޯޓަށް އެހުން ވޯޓު ގަޑީގައި އޮންނާނެ ކަމަށް މިދިޔަ މަހު 23 ވަނަ ދުވަހު ބޭއްވި ޖަލްސާގައި ރިޔާސަތުން އިއުލާން ކޮށްފައި ވަނިކޮށް މެންބަރުން ތަމްސީލް ކުރައްވާނެ ހަމައަށް ބަދަލު ގެންނެވުމަށް އަސްލަމް އެދިވަޑައިގެންނެވުމުން އެ ޖަލްސާގައި މައްސަލަ އަށް ވޯޓަށް އެހުން ފަސް ކުރެއްވި ކަމަށް ނިއުޝާ ވިދާޅުވި އެވެ.
މަޖިލީހުގެ ގަަވައިދުގެ 130 ވަނަ މާއްދާގެ ށ ގެ އެއް ވަނަ ނަމްބަރުގެ ދަށުން މަޖިލީހުގެ ދާއިމީ ކޮމިޓީތަކުގައި އިސްވެދެންނެވި 13 މެންބަރުން ތަމްސީލު ކުރައްވަމުން ގެންދެވި ހައިސިއްޔަތު ވެސް ވަނީ އެ މެންބަރުންނަށް ގެއްލިފައި -- ނިއުޝާ
އެއާއެކު ޕާލިމެންޓަރީ ގްރޫޕްތަކުގެ ލީޑަރުންނާ މަޝްވަރާ ކުރައްވައިގެން އަލުން ނިސްބަތް ކަނޑައެޅުމަށް މަޖިލީހުގެ ރައީސް ނިންމެވި ކަމަށް ނިއުޝާ ވިދާޅުވި އެވެ.
އީވާގެ މައްސަލާގައި ވެސް އަމީން އާންމު އެމްޑީޕީ އާ ހިޔާލު ތަފާތު!
މަޖިލީހުގެ ނައިބު ރައީސްގެ މަގާމުން އީވާ ވަކި ކުރުމަށް އެމްޑީޕީން ހުށަހަޅާފައިވާ އިތުބާރު ނެތް މައްސަލައިގެ މުއްދަތު ހަމަވުމުން އެ މައްސަލަ ކުރިޔަށް ނުގެންގޮސް އިތުރު މަސައްކަތެއް ނުކުރެވޭނެ ކަމަށް އެ ޕާޓީން ވަނީ ބުނެފަ އެވެ.
އެހެން ނަމަވެސް ނިއުޝަ ވިދާޅުވީ އެ ގަރާރު އޮއްވައި މަޖިލީހުގެ އެހެން އެއްވެސް ކަމަކާ މެދު ބަހުސް ކުރުން ނުވަތަ ވޯޓަށް އެހުން މަނާ ވާނީ އެ ގަރާރު މަޖިލީހަށް ހުށަހެޅުމަށް ފަހުގައި ކަމަށެވެ.
މަޖިލީހުގެ 50 މެންބަރުން ސޮއި ކުރައްވައި ހުށަހެޅި އެ ގަރާރުގެ ނޯޓިސް މުއްދަތު ހަމަވެފައިވީ ނަމަވެސް އަދި އެ މައްސަލަ މަޖިލީހަށް ހުށަހަޅާފައި ނުވާ ކަމަށް ވެސް ނިއުޝާ ވިދާޅުވި އެވެ.
އީވާ ވަކި ކުރުމަށް ދީފައިވާ 14 ދުވަހުގެ ނޯޓިސް މުއްދަތު މާދަމާ އަށް ހަމަވެ އެވެ. އެހެންވެ މަޖިލީހުން ވަނީ އެ ދުވަހު ޖަލްސާއެއް ބާއްވަން ވެސް އެޖެންޑާ ކޮށްފަ އެވެ.
ނަމަވެސް އިތުބާރު ނެތް މައްސަލަ ވެސް ކުރިޔަށް ގެންދެވޭނީ މަޖިލީހުގެ އާންމު ކޮމިޓީން އެކަމަށްޓަކައި ވަގުތު ކަނޑައެޅުމުންނެވެ. ކޮމިޓީތައް އެކުލަވައި ނުލެވޭތީ ވަގުތު ކަނޑައެޅުމުގެ މަސައްކަތް ވެސް ކުރިޔަށް ނުގޮސް އޮތުމުން އަމީން އާންމު ވަނީ އެ ޖަލްސާ ވެސް ފަސް ކޮށްލާފައިވާ ކަން އެމްޑީޕީ އަށް އަންގައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މަބުނީ
11 June 2023
ގަންނާނެ ގަނޑެއް ގަންނަމުން ހަދާނެ އެއްޗެއް ހަދަން ދޫކުރެވިގެން ނުވާނެ.
ޏަންރީތި އާމިނާ
11 June 2023
އެމަނިކުފާނުގެ 13 އެއީ ވަރަށް ނާޒުކު އެއްޗަކަށްވެދާނެ. ބޮނޑިޔަކަށް ބަނދެފައި އިސްތިއުފާ ދނީވެސް 13 ވަޒީރުން. މިހަރު ފަހަތުގައި އެތިބި 13 މެމްބަރުންވެސް އިސްތިޢުފާ ދެއްވަންވީއެއްނު.
އަލީ ބަނޑާރާ
11 June 2023
ހަގީގަތުގައި ގައުމު ހިންގަން ނޭގޭ ގުރޫޕެއް އަރާ މިތިބީ. ދެން ކޮސް ހަދަނީ.
މިއް ގެ ސުގާޑެޑީ
11 June 2023
އެހެންވީމާ މިއުސަ މިބުނަނީ އީވާ އާ އައްނިބެ ވަކި ނުކުރެވޭނެ އޭ އެހެން ނޫނީ ަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަަ އައިފޯނު އަނބުރާ ދޭންޖެހިދާނެ
އާބިދާގެ ބަޔާން
11 June 2023
ދެން ކީއްވެގެންތޯ ޑެޑްލޮކްވެފަ އޮއްވާ، ގައުމަށް ހެޔޮއެދިގެން މަޖިލިސް ރައީސްއާއި ނައިބު ރައީސް އިސްތިއުފާ ނުދެއްވަން އެއުޅުއްވަނީ؟ ވޯޓެއް ނަގައިފިއްޔާ ބަލިވާނެކަން އެނގޭ އިރުވެސް، ހަމަ އެހާ މަގާމަށް ދަހިވެތިވަނީތޯ؟؟
އިއްޒަތާއި ، ޝާނާއި ، ޝައުކަތު
11 June 2023
ނިއުޝާވެސް ނުވަންޏާ އިސްތިއުފާދީފަދާންވީ. ތިކަން ކުރެވޭނެ ބައިވަރު އިލްމާއި ޙިލްމު ހުރި ދިވެހިން އެބަތިބި. ދަށުވެ އަމިއްލަ އެދުން ބޮޑުވިޔަސް ތިވަރު ބޮޑު. ކޮބާ އެއުޅޭ ކައުންސެލަރ ޖެނެރަލް. ބޮޑުމުސާރަ ރައްޔަތުންގެ ފައިސާއިން ނަގައިގެން މަސްއޫލީއްޔަތު އަދާނުކޮށް. ގައުމުގެ ހުރިހާކަމެއް ސްޕްރީމް ކޯޓުން ނިންމަން ޖެހެންޏާ ތީކީއްކުރާބައެއް.
ދޮންބެ ގެ ސިޓީ އުރަ
11 June 2023
ނަޝީދަކީ އޭނާ ދާންޖެހޭ ވަގުތު ކާރީގަ ތިބޭމީހުންނަށްވެސް ހަމައެގޮތްވާން އެދޭ މީހެއް. އެލަޑު ތި ދެ އަންހެނުންވެސް ތިލިބިގަންނަނީ. ވަރަށް ސަލާމް
ބޮޑުމީހާ
11 June 2023
ދައުލަތުން ގާތް މީހުންނަށް މިވެރިކަމުގަ 1.7 ބިލިއަން ރުފިޔާގެ ބަދަލު ދިން އުސޫލުން މަޖްލީހުގައި ކަންކަންނިމިދާނެކަމަށް ބަލައިގެން ނުވާނެ. އިބޫ ކައިރީ ރޮޒޭމެން ޖަހާނެސަކަރާތެއްޖެހިޔަސް އަންނިއާއި ޖެހުނީމާ ތިހާ ފަސޭހައިން ކަންކަމެއް ނުވާނެ.
ޖުއްބަ
11 June 2023
ކަނބުލޭގެ ތަހުރިބާ ތުއްޕުޅުކަމުން މަޖިލިސްތެރޭ ހިނގާނުހިނގާ ފަހުމްނުވަނީ ތޯއްޗެއް. ބަލަގަ ތިތަނުތެރޭ އޮންނާނީ މަޖިލިސް ރައީސް ބުނިގޮތެއް. ތިތަނަކީ އެއްވެސް ފޮތެއް ގޮތެއްގަ ލިޔެފައޮންނަ އެއްޗަކައް ބަލައިގެން ހިނގާތަނެއް ނޫން.
ޙިނި
11 June 2023
އެމްޑީޕީ މިހާރު ހިންގަނީ ކާޓެލް އަކުން، މި މީހުން ވެރިކަމުން ބޭރުކުރަންޖެހޭ