ބީއެމްއެލް އަށް މިދިޔަ އަހަރު ރެކޯޑް އަދަދެއްގެ ފައިދާއެއް، އެއް ބިލިއަން ރުފިޔާ

ބޭންކް އޮފް މޯލްޑިވްސް (ބީއެމްއެލް) އަށް އެއް ބިލިއަން ރުފިޔާގެ ފައިދާއެއް ލިބި، މިދިޔަ އަހަރަކީ އެ ބޭންކުގެ ތާރީހުގައި ވެސް އެންމެ ބޮޑު ފައިދާއެއް ލިބުނު އަހަރަށް ވެއްޖެ އެވެ.

ރާއްޖޭގެ އެންމެ ބޮޑު ބޭންކުން މިއަދު އާއްމުކުރި މިދިޔަ އަހަރުގެ އެންމެ ފަހު ކުއާޓަރު (އޮކްޓޯބަރު މަހުން ޑިސެމްބަރު މަހުގެ ނިޔަލަށް ހޭދަވި މުއްދަތު)ގެ ތަފާސްހިސާބުތަކުގައިވާ ގޮތުން، އެ ކުއާޓަރުގައި އެ ބޭންކަށް ވަނީ 281.8 މިލިއަން ރުފިޔާގެ ފައިދާއެއް ލިބިފަ އެވެ. އެއާ އެކު، މިދިޔަ އަހަރު ލިބުނު ޖުމްލަ ފައިދާގެ މިންވަރު 1.03 ބިލިއަން ރުފިޔާ އަށް އަރާފައިވާއިރު، އެއީ އޭގެ ކުރީ އަހަރާ އަޅާބަލާއިރު 56 ޕަސެންޓުގެ ކުރިއެރުމެކެވެ.

މިދިޔަ އަހަރު ބީއެމްއެލް އަށް ވަނީ ވަރަށް ބޮޑު އަދަދެއްގެ އާމްދަނީއެއް ވެސް ލިބިފަ އެވެ. އެ ގޮތުން، މިދިޔަ ކުއާޓަރުގައި 528 މިލިއަން ރުފިޔާ އާމްދަނީގެ ގޮތުގައި ލިބި، މިދިޔަ އަހަރު ލިބުނު ޖުމްލަ އާމްދަނީ ވަނީ ދެ ބިލިއަން ރުފިޔާ އަށް ވުރެ މައްޗަށް ގޮސްފަ އެވެ.

"މިދިޔަ އަހަރަކީ ބުރަ އަހަރެއް ނަމަވެސް އަޅުގަނޑުމެންގެ ޓީމުން ވަނީ ވަރުބަލިކަމެއް ނެތި ކަސްޓަމަރުންނަށް ހިދުމަތް ފޯރުކޮށް ދީފައި،" ތަފާސްހިސާބުތަކާ އެކު އާއްމުކުރި ބަޔާނުގައި، ބީއެމްއެލްގެ ސީއީއޯ އަދި މެނޭޖިން ޑިރެކްޓަރު އެންޑްރޫ ހީލީ ވިދާޅުވި އެވެ.

މީގެ އިތުރުން، މިދިޔަ އަހަރުގެ ތެރޭގައި ބޭންކުގެ ރައުސުލްމާލާއި ލިކިއުޑިޓީ ރޭޝިއޯ ވަނީ ގާނޫނުން ލާޒިމުކުރާ ވަރަށް ވުރެ ރަނގަޅު މިންވަރެއްގައި ހިފެހެއްޓިފަ އެވެ. އަދި ލޯނު ދޫކުރި މިންވަރު އިތުރުވެ، އަމިއްލަ ފަރުދުންނާއި ވިޔަފާރިތަކަށް ދޫކުރި ލޯނުގެ އަދަދު 10 ބިލިއަން ރުފިޔާ އަށް އަރާފައި ވާއިރު، ދޫކޮށްފައިވާ ލޯނުތަކުގެ ތެރޭން ނުދައްކާ ހުރި އަދަދު ވެސް ވަނީ ވަރަށް ބޮޑަށް ދަށަށް ގޮސްފަ އެވެ.

ޓެކްސްގެ ގޮތުގައި 345 މިލިއަން

ބޭންކުތަކުގެ ފައިދާ އިން ދައުލަތަށް ދައްކަން ޖެހޭ 25 ޕަސެންޓުގެ ޓެކްސް ނުލާ ބަލައިފި ނަމަ، ބީއެމްއެލް އަށް މިދިޔަ އަހަރު 1.3 ބިލިއަން ރުފިޔާގެ ފައިދާއެއް ވަނީ ލިބިފަ އެވެ. އެކަމަކު، އެ ބޭންކުން ވަނީ ޖުމްލަ 345 މިލިއަން ރުފިޔާ ޓެކްސްގެ ގޮތުގައި މިދިޔަ އަހަރު ދައުލަތަށް ދައްކައިފަ އެވެ.

އެހެންވެ، އެންމެ ބޮޑު އަދަދެއްގެ ޓެކްސް ދައުލަތަށް ދައްކާ ކުންފުނިތަކުގެ ތެރޭގައި ބީއެމްއެލް ހިމެނެ އެވެ.

ހިދުމަތް ފުޅާކުރަން 300 މިލިއަން

މިދިޔަ އަހަރު ރެކޯޑް އަދަދެއްގެ ފައިދާ ލިބިފައިވާތީ ބީއެމްއެލް އިން ވަނީ އޭގެ ތެރޭން ބޮޑު ބައެއް، އެ ބޭންކުގެ ހިދުމަތްތައް އިތުރަށް ފުޅާކުރަން އިންވެސްޓް ކުރަން ނިންމައި އެކަން މިދިޔަ އަހަރުގެ ފަހުކޮޅު އިއުލާނުކޮށްފަ އެވެ. އެ ގޮތުން، މި އަހަރުގެ ތެރޭގައި ޖުމްލަ 300 މިލިއަން ރުފިޔާ އިންވެސްޓް ކުރަން ވަނީ ހަމަޖައްސައިފަ އެވެ.

- 150 އާ ވަޒީފާ (75 އަތޮޅުތެރޭގައި، ބާކީ މާލެ ސަރަހައްދުގައި)

- އާ ހަތް ބްރާންޗް

- ހަތަރު ވިޔަފާރި މަރުކަޒު

- 20 އޭޓީއެމް

- ކޯލް ސެންޓަރެއް (އައްޑޫގައި)

- ކަސްޓަމާ ސާވިސް ސެންޓަރެއް (މާލޭގައި)

- 10 އާ ސީއެސްއާރު ޕްރޮގްރާމް

މި މަޝްރޫއުގެ ދަށުން، 22 ރަށަކަށް ހިދުމަތް ފުޅާކުރަން ރަށްރަށުގައި އާ ހަތް ބްރާންޗާއި ހަތަރު ވިޔަފާރި މަރުކަޒާއި މާލޭގައި ކަސްޓަމަ ސާވިސް ސެންޓަރަކާއި އައްޑޫގައި ކޯލް ސެންޓަރެއް ގާއިމްކޮށް، ރާއްޖޭގެ އެކި ކަންކޮޅުތަކުގައި އިތުރު 20 އޭޓީއެމް ބަހައްޓަން ވަނީ ނިންމައިފަ އެވެ. އަދި 150 އާ ވަޒީފާ އުފައްދައި ބީއެމްއެލްގެ މުވައްޒަފުންގެ އަދަދު 850 އިން 1،000 އަށް އިތުރު ކުރަން ވެސް ވަނީ ހަމަޖައްސައިފަ އެވެ. އެ އާ ވަޒީފާތަކުގެ ތެރޭން ދެ ބައިކުޅަ އެއް ބައި (75 ވަޒީފާ) ރަށްރަށަށް ހާއްސަކޮށްފައި ވާއިރު، ބާކީ ބައި ހުޅުވާލަނީ މާލެ އާއި ވިލިމާލެ އަދި ހުޅުމާލެ ހިމެނޭ ގޮތަށް މާލެ ސަރަހައްދަށެވެ.

މީގެ އިތުރުން، އިޖުތިމާއީ ޒިންމާގެ ދަށުން، ކުރިއަށް އޮތް އަހަރުދުވަހުގެ ތެރޭގައި އާ 10 ސީއެސްއާރު ޕްރޮގްރާމް ހިންގަން ވެސް ބީއެމްއެލް އިން ވަނީ ނިންމައިފަ އެވެ.

"... [މިދިޔަ އަހަރު] މާލީ ގޮތުން ލިބުނު ކުރިއެރުމާ އަދި ހާއްސަކޮށް ލޯނު ދޫކުރުމުގެ މަސައްކަތްތައް ހަރުދަނާ ކުރެވުމަކީ އަޅުގަނޑުމެންގެ ހިދުމަތް ފޯރުކޮށްދެމުން ދާ މުޖުތަމައު އަށް އިންވެސްޓް ކުރުމަށް ލިބުނު ރަނުގެ ފުރުސަތެއް،" އެންޑްރޫ ވިދާޅުވި އެވެ.

މި އަހަރުގެ ފައިދާ ދަށްވެދާނެ

މިދިޔަ އަހަރު ރެކޯޑް އަދަދެއްގެ ފައިދާ ލިބުނަސް، މި އަހަރު ލިބޭ ފައިދާގެ މިންވަރު ދަށަށް ހިނގައިދާނެ ކަމަށް އެންޑްރޫ ވިދާޅުވި އެވެ. އޭގެ މައިގަނޑު ސަބަބުތަކަކީ، އޭނާ ވިދާޅުވި ގޮތުގައި، ބޭންކުން މިހާތަނަށް ހިންގާ އެންމެ ބޮޑު އިންވެސްޓްމަންޓް ޕްރޮގްރާމް މި އަހަރުގެ ތެރޭގައި ކުރިއަށް ގެންދިއުމާއި ބައެއް ލޯނުތަކުގެ އިންޓަރެސްޓް ރޭޓް ކުޑަކޮށްފައިވާތީ އެވެ.

"ނަމަވެސް، އަޅުގަނޑު އުއްމީދު ކުރަނީ މިހާރު އެކުލަވާލާފައިވާ ވަރުގަދަ ޓީމާ އެކު ބޭންކުގެ ވިޔަފާރި ކުރިއަރައި ކަސްޓަމަރުންގެ އަދަދު އިތުރުވެ، މި އަހަރަކީ ވެސް ބޭންކަށް ރަނގަޅު އަހަރަކަށް ވާނެ ކަމަށް،" އެންޑްރޫ ވިދާޅުވި އެވެ.

ބީއެމްއެލްގެ އިސް މަގާމުތަކަކަށް މި އަހަރުން ފެށިގެން ވަނީ ބަދަލު ގެނެސްފަ އެވެ. އެ ގޮތުން، ރިޓެއިލް ބޭންކިން ޑައިރެކްޓަރުގެ މަގާމުގައި ހުންނެވި މުހައްމަދު ޝަރީފް ވަނީ ޑައިރެކްޓަ އޮފް އޮޕަރޭޝަންސްގެ މަގާމަށާއި ޑެޕިއުޓީ ސީއީއޯ ކަމަށް އައްޔަންކޮށްފަ އެވެ. އަދި ޑައިރެކްޓަ އޮފް ކޯޕްރޭޓް ބޭންކިންގެ މަގާމުގައި ހުންނެވި ކުލްދީޕް ޕަލިވާލް ވަނީ ރީޓެއިލް އަދި ކޯޕްރޭޓް ބޭންކިންގެ ޒިންމާ ހިމެނޭ ގޮތަށް، ޑައިރެކްޓަ އޮފް ބިޒްނަސްގެ މަގާމަށް ހަމަޖައްސައިފަ އެވެ. މީގެ އިތުރުން، ޑައިރެކްޓަ އޮފް ބީއެމްއެލް އިސްލާމިކްގެ ނަމުގައި އާ މަގާމެއް އުފައްދައި، އިސްލާމިކް ބޭންކިން ދާއިރާގެ ބައިނަލްއަގުވާމީ ތަޖުރިބާކާރެއް ކަމަށްވާ ޒުލްކަރްނައިން ޓަމަން ވަނީ އެ މަގާމަށް އައްޔަންކޮށްފަ އެވެ.

ބީއެމްއެލް އިން އަންނަނީ އާ ބްރާންޗުތަކާއި ސެލްފް ސާވިސް އޭޓީއެމްތައް ރާއްޖޭގެ އެކި ސަރަހައްދުތަކުގައި ގާއިމްކޮށް، ބޭންކުގެ ހިދުމަތް ފުޅާ ކުރަމުންނެވެ. އެ ގޮތުން، މިހާތަނަށް ވަނީ 20 އަތޮޅުގައި 31 ބްރާންޗާއި 78 އޭޓީއެމް އާއި 4،000 ޕީއޯއެސް މާޗަންޓުންނާއި 190 ކޭޝް އެޖެންޓުންނާއި 19 ސެލްފް ސާވިސް ބޭންކިން ސެންޓަރު އަދި ފަސް ދޯނި ބޭންކިން ޔުނިޓް ގާއިމްކޮށްފަ އެވެ.