ހަތިމް އަންދައި، މުސްލިމުންގެ ދީނީ ކަންކަމަށް އަރައިގަތުމުގެ އަމަލުތައް ރާއްޖެއިން ކުށްވެރިކޮށްފި

އ.ދ ގެ އިންސާނީ ހައްގުތަކާ ބެހޭ މަޖިލީހުގެ ޖަލްސާއެއް: ރާއްޖޭގެ ފަރާތުން އދ. ގެ އޮފީސްތަކަށް ކަނޑައަޅުއްވާފައި ހުންނަވާ ދާއިމީ މަންދޫބު، ޑރ. އާސިމް އަހުމަދު ވާހަކަ ދައްކަވަނީ.-- ފޮޓޯ: ފޮރިން މިނިސްޓްރީ

ފާތިމަތު އަޖްފާން، މިހާރު

12 ޖުލައި 2023 - 23:41

3 comments

ސްވިޑްން އާއި ޔޫރަޕްގެ ބައެއް ގައުމުތަކުގައި ކީރިތި ގުރްއާން އަންދައި މުސްލިމުންގެ ދީނީ ކަންކަމަށް އަރައިގަތުމުގެ އަމަލުތައް ފާޅުގައި ހިންގަމުންދާ މައްސަލާގައި އދ. ގެ އިންސާނީ ހައްގުތަކާ ބެހޭ މަޖިލީހުގައި ބޭއްވި ކުއްލި ބަހުސްގައި ރާއްޖެއިން ބައިވެރިވެ، އެކަން ކުށްވެރިކޮށްފި އެވެ.

އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގައި މިހާރު ހިނގަމުންދާ ބަހުސްގައި ރާއްޖެ ތަމްސީލު ކުރެއްވީ އދ. ގެ އޮފީސްތަކަށް ކަނޑައަޅުއްވާފައި ހުންނަވާ ދާއިމީ މަންދޫބު، ޑރ. އާސިމް އަހުމަދެވެ.

އެ ބަހުސްގައި އާސިމް ދެއްވި ހިތާބުގައި ވަނީ ކީރިތި ގުރުއާނުގެ މުސްހަފު އެންދުން އެންމެ ހަރުކަށި އިބާރާތުން ކުށްވެރިކުރައްވައި، އެފަދަ އަމަލުތަކުގެ ސަބަބުން އިޖުތިމާއީ ފޭރާމަށް ކުރާ ނޭދެވޭ އަސަރުތަކުގެ މައްޗަށް އަލިއަޅުއްވާލައްވައިފަ އެވެ.

އަދި އެފަދަ އަމަލުތަކަކީ ހިޔާލުފާޅު ކުރުމުގެ ހައްގުގެ ދަށުން ބަލައިގަނެވޭނެ އަމަލުތަކެއް ނޫން ކަމަށާއި އެފަދަ އަމަލުތަކުގެ ސަބަބުން އިސްލާމް ދީނާ މެދު ބިރުވެރިކަމާއި ނަފުރަތު އުފެދޭ ކަމަށް ވެސް އާސިމް ވިދާޅުވި އެވެ.

މުޖުތަމައުގެ ހަމަޖެހުމާއި މަސަލަސްކަން ގާއިމު ކުރުމަށް އެފަދަ އަމަލުތައް ނިމުމަކަށް ގެނައުމަށް ވެސް އޭނާ ވަނީ ގޮވާލައްވައިފަ އެވެ.

At the Urgent Debate at #HRC53 on the desecration of the Holy Quran Amb. @asim_mv condemned this abhorrent act & stated that acts of Islamophobia undermine all efforts to uphold the values of tolerance, & called for global solidarity to promote peace & coexistence. #MDVatHRC pic.twitter.com/q2G7vMJgaz
— Maldives Mission GVA (@MDVinGeneva) July 11, 2023

އިސްލާމް ދީނާ މެދު ނަފުރަތު އުފެދޭ އަދި ތަފާތު ކުރުންތަކާއި ހަމަނުޖެހުމަށް ހިތްވަރުދޭ އަމަލުތައް ހުއްޓުވުމުގެ މަގުސަދުގައި އޯއައިސީން ވަނީ އެ ބަހުސްގެ ތެރެއިން ގަރާރެއް ހުށަހަޅައިފަ އެވެ.

ރާއްޖެ ހިމެނޭހެން އދ. ގެ އިންސާނީ ހައްގުތަކާ ބެހޭ މަޖިލީހުގެ 28 މެމްބަރު ގައުމެއްގެ ތާއީދާ އެކު ބޮޑު އަގުލަބިއްޔަތަކުން އެ ގަރާރު ވަނީ ފާސްވެފަ އެވެ.

ސްވިޑންގެ ވެރިރަށް ސްޓޮކްހޯމްގައި ހުންނަ އެންމެ ބޮޑު މިސްކިތުގެ ކުރިމަތީގައި، މިއަހަރުގެ އަޞްހާ އީދު ދުވަހު، މީހަކު ކީރިތި ގުރްއާން އެންދީ، އިރާގުން ހިޖުރަކޮށް ސްވިޑްންގެ ރައްޔިތުކަން ހޯދައިގެން އުޅޭ، އުމުރުން 37 އަހަރުގެ ސަލްވާން މޫމިކާ ކިޔާ ފިރިހެނެކެވެ.