ރައީސް ވިދާޅުވީ ނަޝީދާ ފޯނުން އިއްޔެ ވާހަކަ ދެއްކެވީ ދުވަސްތަކަށްފަހު ކަމަށް ވިޔަސް، ދެ ބޭފުޅުން މާ ދުރުގައި ތިބި ތަނެއް ފެނިވަޑައިނުގެންނެވި ކަމަށެވެ.
18 ސެޕްޓެމްބަރ 2023 - 19:06
49 comments
ރިޔާސީ އިންތިހާބުގައި ގުޅިގެން މަސައްކަތްކުރުމާ ގުޅޭގޮތުން، އެމްޑީޕީގެ ކުރީގެ ރައީސް މުހައްމަދު ނަޝީދު އާ ވާހަކަދައްކަވާފައިވާ ކަމަށާއި، ނިޒާމީ ވޯޓު އަންނަ ނޮވެމްބަރު 17 ގެ ކުރިން ނެގިދާނެ ކަމަށް ދަންނަވާފައިވާނެ ކަމަށް، އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
މި މަހުގެ 30 ވަނަ ދުވަހު ބާއްވާ އިންތިހާބުގެ ދެ ވަނަ ބުރުގެ ކެމްޕެއިނަށް، ހެންވޭރުގެ ގޭގެއަށް ދޮރުން ދޮރަށް ފެއްޓެވުމަށްފަހު، މީޑިއާތަކާ ވާހަކަދައްކަވަމުން، ނޫސްވެރިއެއްގެ ސުވާލަކާ ގުޅިގެން ރައީސް ވިދާޅުވީ ގުޅިގެން މަސައްކަތް ކުރުމަށް ނަޝީދުގެ ޑިމޮކްރެޓްސް އިން ހުށަހަޅާފައިވާ ޝަރުތަކީ މި މަހުގެ 25 ގައި ނިޒާމީ ވޯޓެއް ނެގުން ކަމަށެވެ.
ނަމަވެސް، ރައީސް ވިދާޅުވީ އިންތިހާބުގެ ދެވަނަ ބުރަށް ކުޑަ ދުވަސްކޮޅަކަށް ވެފައި ވަނިކޮށް، ނިޒާމީ ވޯޓު ނެގުމަކީ އެހާ ޕްރެކްޓިކަލް ކަމެއް ނޫން ކަމަށާއި އިންތިހާބަށް ފަހު އެކަމުގެ ވޯޓެއް ނެގުމާ ގުޅޭގޮތުން މަޝްވަރާކުރެއްވި ކަމަށެވެ.
ރައީސް ވިދާޅުވި ގޮތުގައި އެ މަނިކުފާނު ހުށަހެޅުއްވީ "ރީޒަނަބްލް ޕްރޮޕޯޒަލް"އެކެވެ. އެއީ، ރަނގަޅަށް އަދި އިތުބާރުކަމާއެކު އެކަން ކުރެވޭނެ ގޮތެއް ކަން ފާހަގަކުރެއްވި އެވެ.
އެމްޑީޕީގެ 4 ވަނަ ކޮންގްރެސް ނިންމުމުގެ ރަސްމިއްޔާތުގައި ރައީސް އިބްރާހިމް މުހައްމަދު ސޯލިހު އަދި އެ ޕާޓީގެ އޭރުގެ ރައީސް މުހައްމަދު ނަޝީދު ބައިވެރިވެވަޑައިގަންނަވަނީ.-- ފޮޓޯ: ފަޔާޒު މޫސާ | މިހާރު
"ޑޭޓަކާ ގުޅޭގޮތުން ވެސް އަޅުގަނޑުމެން ވާހަކަ ދެއްކިން. ދައްކާފައި އެ ހުށަހެޅުން ހުށަހަޅާފައިވާނީ. އެއީ، މަޖިލީހުގައި މިހާރު ގަރާރެއް އެބައޮތް ދެއްތޯ، ނިޒާމީ ވޯޓު ނެގުމާ ގުޅޭގޮތުން. އަޅުގަނޑު ދެންނެވިން އެ ފާސްކޮށްފައި އަޅުގަނޑަށް ފޮނުއްވާށޭ، ފޮނުވީމަ އަޅުގަނޑު އިލެކްޝަންސް ކޮމިޝަނަށް ލިޔުމަކުން ރިކުއެސްޓް ކުރާނަމޭ މިވެނި ތާރީހެއްގައި އެ ވޯޓު ނަގައިދޭން. އޭރަށް އޮންނާނީ ދުވަސް ވެސް ކަނޑައެޅިފައި،" ޑިމޮކްރެޓްސްގެ ފަރާތުން އިންތިހާބުގައި ވާދަކުރެއްވި ހުޅުދޫ ދާއިރާގެ މެމްބަރު އިލްޔާސް ލަބީބް ނިޒާމު ބަދަލުކުރުމާ މެދު ރައްޔިތުންގެ ފެންނަ ނުފެންނަ ވޯޓެއް ނަގަން ސަރުކާރަށް ގޮވާލައި ހުށަހަޅުއްވާފައިވާ ގަރާރަށް އިޝާރާތް ކުރައްވައި ރައީސް ވިދާޅުވި އެވެ.
"ރިޔާސީ އިންތިހާބު ނިމުމާއެކީގައި އެކަން ކުރެވޭނެ ގޮތްތަކެއް ބާއްވާފައި އަޅުގަނޑު ބާއްވާނަމޭ. އެ ހުށަހެޅުން އަޅުގަނޑު ހުށަހަޅާފައިވާނީ. އޭގެ ފަހަކުން އަދި ޖަވާބެއް ނުލިބޭ. އެއީ ނޮވެމްބަރު 17 ގެ ކުރިން."
އެ މަނިކުފާނު ވިދާޅުވީ ނަޝީދާ ފޯނުން އިއްޔެ ވާހަކަ ދެއްކެވީ ދުވަސްތަކަށްފަހު ކަމަށް ވިޔަސް، ދެ ބޭފުޅުން މާ ދުރުގައި ތިބި ތަނެއް ފެނިވަޑައިނުގެންނެވި ކަމަށެވެ.
"ކުރިއެކޭ އެއްގޮތަށް ހަމަ ފުރަތަމަ ވެސް ފަށައިގަނެވުނު ވާހަކަ ދައްކަން. މި އުޅެނީ ސިޔާސީ ހިޔާލު ތަފާތުވުންތަކެއް. އިއްޔެ ވާހަކަދެކެވުނީ މުޅިން މިކަމާ ގުޅޭގޮތުން،" ރައީސް ވިދާޅުވި އެވެ.
ނަޝީދު އެމްޑީޕީއާ ކޯލިޝަން ހަދައިފިނަމަ ފުރަތަމަ ބުރުގައި ޑިމޮކްރެޓްސްއިން ހޯދި 15،000 އަށް ވުރެ ގިނަ ވޯޓުގެ ބޮޑުބައި ލިބޭނެ ކަމަށް ވެސް ރައީސް ވިދާޅުވި އެވެ. ދެވަނަ ބުރުގައި ޑިމޮކްރެޓްސްއިން އަމަލު ކުރާނެ ގޮތެއް މިރޭ ބާއްވާ އެ ޕާޓީގެ ކައުންސިލުގެ ބައްދަލުވުމުގައި ނިންމާނެ ކަމަށް ވަނީ ބުނެފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މުހަންމަދު..
19 September 2023
މިއޮށް ހުރިހާ ދުވަހު ނުކޮށް ހުރެފަ މިހާރު ކޮން ނިޒާމެއްގެ ވާހަކަބާ. ކުރިން ނުކުރި ކަމެއް ފަހުންވެސް ކުރެވޭނެ ދުވަހެއް ނާންނާނެ.
ޖަބަލް ޕޫރު
19 September 2023
މިދިޔަ 20 އަހަރުގެ ރިޔާސީ ވެރިކަމުގަ ވައްކަމާ ލޫޓުވުން ހައްދު ފަހަނަ އަޅާފަ. ރަގަޅު ކުރަން ބޭނުންވޭތޯ އަހަންވީ ރައްޔިތުންގާތުގަ! ހުދުމުހުތާރުތޯ، ރަސްކަމެއްތޯ، މިލިޓަރީތޯ، ޕާލިމެންޓަރީތޯ، ރިޔާސީތޯ! މިހާރައްވުރެ ރަގަޅުނުވިއްޔާ ވަގުން ފިލާނީ! ގައުމު ދަރާނީ! އާންމުން ރަތައް އަރާނީ! ކަޅުފެހި ޓީމު ވެރިވެގަންނާނީ! ދިވެހިގައުމުގަ ހިންގަންވާނީ ގިނަދިވެހިން ބޭނުން ގޮތައް! ވޯޓަކުން މޮޅުވާގޮތަކައް! ގައުމު ލޫޓުވިޔަ ނުދެވޭނެ ނިޒާމެއް ބޭނުން!
ޖަގުއާ
18 September 2023
އިބޫއަށް ގޮތްހުސްވީމަ ތިހެން ކިޔަނީ..ކުރިންވެސް ނަޝީދުކައިރީބުނި ތިކަން ކުރާނަމޭ.ބަރުލަމާނީ ބޭނުންނުވާކަމަށްވެސް އިބޫބުނި.ވެރިކަން ގެއްލިދާނެތީ ތިއުޅެނީ.މވެރިކަން ލިބުމާއިއެކު ނަޝިދު އެއްލާލާނެ.
އައިމިނާ
18 September 2023
ހީލަތްތެރިން. ކީއްވެހޭ. 3 އަހަރުގެ ވެރިކަމުގަ އަވަސް އަވަސް ކޮށްފަ ނިޒާމީ ވޯޓް ނުނެގީ. މިހާރު ކީއްވެހޭ އަވަސް އަރުވާލާފަ ނިޒާމީ ވޯޓެއްގެ ވާހަކަ ތިޔަ ދައްކަނީ. ހީލަތްތެރިކަން ނޫން އެހެން ކޮންކަމެއްހޭ އޮތީ.
ވޯޓުވާނީ އިތުރެއްނޫން. މަދު
18 September 2023
ރައީސް ބަރުލަމާނީ ވޯޓަށް ތާއީދު ކުރައްވައި އެކަން ހިންގަވާނަމަ އޭގެ ސަބަބުން އިތުރު ވާނެކަމަށް ތިހީކުރައްވާ 15 ހާހަށްވުރެން މާގިނަ ވޯޓު ގެއްލޭނެ. އެމްޑީޕީ ހާޑްކޯރ ގިނަ މީހުންވެސް ބަރުލަމާނަށް ތާއީދެއް ނުކުރޭ. ކޮރޮޕްޓް މަޖުލީހެއް އޮންނަ ތާކު ބަރުލަމާނީ ގެނައުމަކީ އަމިއްލަ ފައިގައި ފުރޯއިން ޖެހުން.
7% ބައި
18 September 2023
ނުހޮވުނަސް ހެޔޮނުވާނެ ނަޝީދާ އެއްބައިވާން. މިހާރު އެއުޅެނީ ސިޔާސީގޮތުން ހުޅުނބު ގޮސްގެން. ޕްރައިމަރީން ތިމަންނަ ފެއިލްވީ ތިމަންނަޔަށް ތާއީދުކުރާ 29 ހާސް މީހުން ޕާޓީން ކަނޑާލީމަޔޭ ކިޔައިގެން ޕާޓީ ބައިބައިކޮއްލި މީހާޔަށް މުޅި ރާއްޖޭން ލިބުނީ 15 ހާސްވޯޓް.
ވިކިލީކްސް
18 September 2023
ރައްޔިތުން އަދިވެސް ބޭނުމީ ރިޔާސީ ނިޒާމެއް.
ރަންނަ
19 September 2023
ވައްކަން ކުރަން ފަސޭހަބެފަ ހަވާބްދާރީ ވާކަށް ނުޖެހޭ. އެހެންވީމަ ރިޔާސީ ސަޅީ
އެހެ
18 September 2023
ބެސްޓްފްރެންޑް އަބަދުވެސް ބެސްޓްވާނެ. އެކަމެއް ނުކެނޑުވޭނެ.
ޝޮކްތެރަޕީ
18 September 2023
އެމްމެ މީހަކު ބޭނުން ވެގެން ނިޒާމު ބަދަލު ކުރުމަކީ ރާއްޖެއަ ލިބޭނެ ބޮޑު ގެއްލުމެއް. ރިސްވަތު ބަހާ ނިޒާމެއް ބޭނުމެއްނުން.
ބައިކަނޑި
18 September 2023
ތިގޮތަށް ތިކަން ނިމިއްޖެއްޔާ ރައީސަށް ލިބޭ ވޯޓު ބޮޑު ތަނުން މަދުވާނެ. ފުރަތަމަ ބުރުގައި ރައީސަށް ވޯޓުދިން އެތައް ބަޔަކު ތިކަމާ ދެކޮޅުކަން ވޯޓުން ދައްކާނެ.