ނަޝީދުގެ އިތުބާރު ނެތްކަމުގެ މައްސަލަ އަށް ޑިމޮކްރެޓްސް އިން ވަންނަނީ

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދެވޭނެ ގޮތެއް ހޯދުމަށް އެމްޑީޕީން ސުޕްރީމް ކޯޓަށް ހުށަހަޅާފައިވާ މައްސަލައިގެ ތެރެއަށް ދަ ޑިމޮކްރެޓްސް ޕާޓީން ތަދައްހުލްވާން މިއަދު ނިންމައިފި އެވެ.

ނަޝީދު ނިސްބަތްވެވަޑައިގަންނަވާ ޑިމޮކްރެޓްސް އިން މިއަދު މަޖިލީހުގެ އިދާރާގައި ބޭއްވި ނިއުސް ކޮންފަރެންސްގައި އެ ޕާޓީގެ ޕީޖީ ލީޑަރު، މެދު ހެންވޭރު ދާއިރާ މެންބަރު އަލީ އާޒިމް ވިދާޅުވީ ނަޝީދުގެ އިތުބާރު ނެތް ކަމުގެ މައްސަލަ ސުޕްރީމް ކޯޓަށް ހުށަހެޅުމުން އެއީ މަޖިލީހުގެ މައްޗަށް ކޮށްފައިވާ ދައުވާއެއް ކަމަށް ގަބޫލުކުރައްވާތީ ދުސްތޫރީ އެ މައްސަަލައިގެ ތެރެއަށް ތަދައްހުލުވާން އެ ޕާޓީން ނިންމާފައިވާ ކަމަށެވެ.

އެމްޑީޕީން ސުޕްރީމް ކޯޓަށް އެ މައްސަލަ ހުށަހެޅީ މިދިޔަ އާދިއްތަ ދުވަހުގެ ޖަލްސާއަށް އެ މައްސަލަ އެޖެންޑާ ކުރި ނަމަވެސް، މަޖިލީހުގެ ނައިބު ރައީސް އީވާ އަބްދުﷲ އަލާސްކަންފުޅާ އުޅުއްވާތީ މަޖިލީހަށް ހާޒިރުވެވަޑައިނުގަތުމުން މައްސަލަ ކުރިއަށް ނުގެންދެވިގެންނެވެ.

"ގަވާއިދުގައި، ގާނޫނު އަސާސީގައި ވަކި ކަމެއް ވަކި ގޮތަކަށް ކުރުމަށް ލިޔެފައި ވަނިކޮން ދެން އެ ކަމެއް އެހެން ގޮތަކަށް ކުރެވޭނެ ކަމަކަށް އަޅުގަނޑުމެން ގަބޫލެއް ނުކުރަން. އެހެންވީމާ އަޅުގަނޑުމެއްނެއް ނޫން މަޖިލިސް ހުއްޓުވާލައިގެން މި އުޅެނީ. އާދެ އަޅުގަނޑުމެން ތަދައްހުލްވާނަން ސުޕްރީމް ކޯޓަށް ހުށައަޅާފައިވާ މައްސަލައަށް ހައްލު ހޯދުމަށް،" އާޒިމް ވިދާޅުވި އެވެ.

ޑިމޮކްރެޓްސްގެ ޕީޖީ ލީޑަރު އާޒިމް މިއަދު ނޫސްވެރިންގެ ބައްދަލުވުމުގައި ވާހަކަދައްކަވަނީ.-- ފޮޓޯ: މަޖިލިސް

އާޒިމް ވިދާޅުވި ގޮތުގައި، ނަޝީދުގެ އިތުބާރު ނެތް ކަމުގެ މައްސަލަ އެމްޑީޕީން ހުށަހެޅީ އިންތިހާބީ ރައީސް ޑރ. މުހައްމަދު މުއިއްޒުގެ ހުވާކުރެއްވުމަށް ހުރަސް އެޅުމުގެ ގޮތުންނެވެ.

މިއަދުގެ ޕްރެސް ކޮންފަރެންސްގައި އާޒިމް ވަނީ ފިނޭންސް މިނިސްޓަރު އިބްރާހިމް އަމީރު ގާނޫނުއަސާސީއާ ހިލާފުވެފައި ކަމަށާއި އޭނާއާ މެދު ފިޔަވަޅު އަޅަން ޖެހޭ ކަމަށް ވެސް ވިދާޅުވެފަ އެވެ. އެއީ އަންނަ އަހަރުގެ ދައުލަތުގެ ބަޖެޓާއި ސަޕްލިމެންޓަރީ ބަޖެޓް ރައްޔިތުންގެ މަޖިލީހަށް ހުށަހަޅަން މިއަދުގެ ޖަލްސާއަށް އެޖެންޑާ ކޮށްފައިވީ ނަމަވެސް އެ ޖަލްސާއަށް މިނިސްޓަރު ވަޑައިނުގަތުމުންނެވެ.

Ameer Gaanoonu asaasee aa hilaafu vejje, fiyavalhu alhan jehey: Democrats

The most trusted news source in the Maldives

Mihaaru

އެގޮތަށް މިނިސްޓަރު ނިންމެވީ ނަޝީދު ވަކިކުރުމުގެ ގަރާރު ކުރިއަށް ނުގެންގޮސް، މަޖިލީހުގެ އިތުރު މަސައްކަތެއް ނުކުރެވޭނެ ކަމަށް މަޖިލީހުގެ ގަވާއިދުގައި ބަޔާންކޮށްފައި ވާތީ މިއަދުގެ ޖަލްސާ އަށް ބަޖެޓް ހުށަހަޅަން ވަޑައިނުގަތުމަށް ބަންޑާރަ ނައިބު އިބްރާހިމް ރިފްއަތު ލަފާ ދެއްވުމުންނެވެ.