މާކިއުރީ ހިމެނޭ އާލާތްތައް ބޭނުންކުރުން ހުއްޓާލާ މުއާހަދާ އަށް އަމަލުކުރަން މަޖިލީހުގެ ލަފާ ހޯދަނީ

މާކިއުރީ ނުވަތަ ދިރޭރަހަ ހިމެނޭ އާލާތްތައް ބޭނުންކުރުން ހުއްޓާލުމަށް އދ. އިން އެކުލަވާލާފައިވާ މުއާހަދާ އަށް އަމަލުކުރަން ފެށުމަށް ރައްޔިތުންގެ މަޖިލީހުގެ ލަފާ ހޯދުމަށް ހުށަހެޅުމަށް ވަޒީރުންގެ މަޖިލީހުން އިއްޔެ ނިންމައިފި އެވެ.

ރައީސް އޮފީހުން އިއްޔެ ހަވީރު ބޭއްވި ޕްރެސް ކޮންފަރެންސްގައި އެ އޮފީހުގެ ޕަބްލިކް ޕޮލިސީގެ އަންޑަ ސެކްރެޓަރީ މުހައްމަދު ފިރުޒުލް ވިދާޅުވީ "މިނަމާޓާ ކޮންވެންޝަން އޮން މާކިއުރީ" ރާއްޖެއިން ތަސްދީގުކުރަން ވަޒީރުންގެ މަޖިލީހުން ލަފާދެއްވާފައި ވާތީ އެކަމާ މެދު ރައްޔިތުންގެ މަޖިލީހުގެ ލަފަޔަކަށް ހުށަހެޅުއްވުމަށް ރައީސް ޑރ. މުހައްމަދު މުއިއްޒު ނިންމަވާފައިވާ ކަމަށެވެ.

މި މުއާހަދާ ތަންފީޒުކުރުމުން އަމަލުކުރުން ލާޒިމުކުރާ ކަންކަމުގެ ތެރޭގައި، މާކިއުރީ ހިމެނޭ އާލާތްތައް ދެނެގަނެ، އެ ތަކެތި ފޭސް-އައުޓްކޮށް އޭގެ ބަދަލުގައި ބޭނުންކުރެވޭނެ އާލާތްތައް ހޯދަން ޖެހެ އެވެ. އަދި އެ ތަކެތި ނައްތާލުމުގައި ކަނޑައެޅިފައިވާ ގޮތެއްގެ މަތިން ތިމާވެއްޓަށާއި އިންސާނުންގެ ސިއްހަތަށް ރައްކާތެރި މިންގަނޑުތަކަށް އަމަލުކުރުމަށް ބާރުއަޅާނެ އެވެ. އަދި މި މުއާހަދާ ތަންފީޒުކުރުމުން މީގެ މަސައްކަތްތަކަށް ރާއްޖެ އަށް މާލީ އެހީ ވެސް ހަމަޖައްސައިދޭނެ އެވެ.

ރައީސް ޑރ. މުހައްމަދު މުއިއްޒު ސަރުކާރުގެ ތިމާވެއްޓާ ބެހޭ މިނިސްޓަރު ކަމަށް އައްޔަންކުރެއްވި ތޯރިގް އިބްރާހިމަށް މަގާމުގެ ލިޔުން ރައީސް ޑރ. މުއިއްޒު ހަވާލުކޮއްދެއްވަނީ.-- ފޮޓޯ: ރައީސް އޮފީސް

މާކިއުރީ ހިމެނޭ އާލަތްތަކުގެ ތެރޭގައި އެކި ކަހަލަ އިލެކްޓްރޯނިކް ސަމާނާއި ބެޓެރީ ހިމެނެ އެވެ. އަދި ބައެއް ކޮސްމެޓިކްސްގެ ބާވަތްތަކާއި ގަހަނާގައި ވެސް މާކިއުރީ ބޭނުންކޮށްފައި ހުރެ އެވެ. މާކިއުރީ އަކީ އިންސާނުންގެ ފުރާނަ އަށް އެކި ގޮތްގޮތުން ނުރައްކާތެރި މާއްދާއެއް އެކުލެވޭ އެއްޗެކެވެ.

ރައީސް އޮފީހުން ބުނި ގޮތުގައި، މި މުއާހަދާ ތަންފީޒުކުރުން ވާނީ ތިމާވެއްޓަށާއި އިންސާނުންގެ ސިއްހަތަށް މާކިއުރީގެ ސަބަބުން ކުރާ ނޭދެވޭ އަސަރު ކުޑަރުމަށް އެޅޭނެ މުހިންމު ފިޔަވަޅަކަށެވެ.

"މިނަމާޓާ ކޮންވެންޝަން އޮން މާކިއުރީ" އަކީ ދިރޭރަހަ އެކުލެވޭ އުފެއްދުންތަކުން ބޭރުވާ ނުރައްކާތެރި ވިހަ މާއްދާތަކުން އިންސާނުންގެ ސިއްހަތާއި ތިމާވެށި ރައްކާތެރިކުރުމުގެ މަގުސަދުގައި އދ. ގެ ތިމާވެއްޓާ ބެހޭ ޕްރޮގްރާމް، ޔުނައިޓެޑް ނޭޝަންސް އެންވަޔަރަންމަންޓް ޕްރޮގްރާމް (ޔުނެޕް)ގެ ފަރާތުން 2013 ވަނަ އަހަރު އެކުލަވާލާފައިވާ ބައިނަލްއަގުވާމީ މުއާހަދާއެކެވެ.

އެ މުއާހަދާ މިހާތަނަށް 147 ގައުމަކުން ތަސްދީގުކޮށްފައިވެ އެވެ. އަދި 2017 ވަނަ އަހަރުން ފެށިގެން ރާއްޖެއިން ވެސް އަންނަނީ މި މުއާހަދާ ތަސްދީގުކުރުމަށް މަސައްކަތްކުރަމުންނެވެ.