މަޖިލިސް އިންތިހާބުގައި ވޯޓުލުމަށް ރީ-ރަޖިސްޓާކުރުމުގެ ފުރުސަތު ހަ ދުވަހަށް ހުޅުވާލައިފި

ރިޔާސީ އިންތިހާބުގެ ދެވަނަ ބުރުގައި ވޯޓުލުމަށް ދިޔަ މީހަކު ވޯޓާސް ރަޖިސްޓްރީ ބަލަނީ: މަޖިލިސް އިންތިހާބުގައި ވޯޓުލުމަށް ރީ-ރަޖިސްޓާކުރުމުގެ ފުރުސަތު ހަ ދުވަހަށް ވަނީ ހުޅުވާލާފައި.-- ފޮޓޯ: ފަޔާޒް މޫސާ | މިހާރު

އިފްރާޒް އަލީ، މިހާރު

10 މާޗް 2024 - 15:22

1 comments

އަންނަ މަހު 21 ގައި ބާއްވާ ރައްޔިތުންގެ މަޖިލީހުގެ އިންތިހާބުގައި ވޯޓުލުމަށް ރީ-ރަޖިސްޓާކުރުމުގެ ފުރުސަތު ހަ ދުވަހުގެ މުއްދަތަކަށް މިއަދު ހުޅުވާލައިފި އެވެ.

އީސީގެ ނައިބު ރައީސް އަދި ތަރުޖަމާން އިސްމާއިލް ހަބީބް އެކްސްގައި ކުރެއްވި ޕޯސްޓެއްގައި ވިދާޅުވީ މަޖިލިސް އިންތިހާބުގައި ވޯޓުލުމަށް ރީ-ރަޖިސްޓާކުރުމުގެ ފުރުސަތު މިއަދުން ފެށިގެން އަންނަ ހޮނިހިރު ދުވަހުގެ މެންދުރު ފަހު 3:00 ގެ ނިޔަލަށް މިހާރު ހުޅުވާލާފައިވާ ކަމަށެވެ.

"ރީ-ރަޖިސްޓަރީ ކުރައްވަން ބޭނުންފުޅުވާ ފަރާތްތަކުން ދުރާލާ އޮންލައިންކޮށް ރީ-ރަޖިސްޓަރީ ކުރެއްވުން އެދެން،" ހަބީބް ވިދާޅުވި އެވެ.

މަޖިލިސް އިންތިހާބުގައި ވޯޓުލުމަށް ރީ-ރަޖިސްޓާކުރުމަށް ފޯމު ހުށަހަޅަން ޖެހެނީ އީސީގެ ޕޯޓަލް މެދުވެރިކޮށް އޮންލައިންކޮށެވެ.

ރީރަޖިސްޓަރީ ކުރާ ލިންކްhttps://t.co/pjLU1Fklsm #vihi24 @ElectionsMv @mvpeoplesmajlis @presidencymv @psmnewsmv
— Ismail Habeeb (@IsmailHabeeb) March 10, 2024

ކުރިން މި މަހު 17 ގައި ބާއްވާ ގޮތަށް ހަމަޖެއްސި މަޖިލިސް އިންތިހާބު އަންނަ މަހު 21 އަށް ފަސްކުރުމާ ގުޅިގެން ވޯޓުލުމުގެ ހައްގު އިތުރު 560 މީހަކަށް ވަނީ ލިބިފަ އެވެ. އެހެންވެ އެ މީހުންނާއި އިތުރު މީހުންނަށް ވެސް ރީ-ރަޖިސްޓާކުރުމުގެ ފުރުސަތު ދޭން އީސީން ނިންމި އެވެ.

ރާއްޖެއިން ބޭރުގައި ވޯޓުފޮށި ބަހައްޓަން ހުޅުވާލި ފުރުސަތުގައި އަދަދު ހަމަނުވާ ގައުމުތަކަށް ވެސް އިތުރު ފުރުސަތެއް ދީ، އަދަދު ހަމަވޭތޯ ހުޅުވާލަން ނިންމާފައިވާ ކަމަށް އީސީން ބުނެފައިވެ އެވެ. އަދި ލަންޑަނާއި ތައިލެންޑް ފަދަ ތަންތަނަށް އިތުރު ފުރުސަތު ދީ، 150 ހަމަވެއްޖެ ނަމަ، އެ ތަންތަނުގައި ވެސް ވޯޓުފޮށި ބަހައްޓަން ވަނީ ނިންމައިފަ އެވެ.