ބޮލީވުޑްގެ އެކްޓަރު އަޖޭ ދޭވްގަންގެ އާ ފިލްމު "ޝައިތާން" އަށް އިންޑިއާގެ ބޮކްސް އޮފީހުގައި 59.2 ކްރޯޑް ރުޕީސް (7.1 މިލިއަން ޑޮލަރު)ގެ އާމްދަނީއެއް ލިބިއްޖެ އެވެ.
ރިޕޯޓްތައް ބުނި ގޮތުގައި، މިދިޔަ ހުކުރު ދުވަހު ސިނަމާތަކުގައި ދައްކަން ފެށި "ޝައިތާން" އަށް އެންމެ ހަތަރު ދުވަސް ތެރޭގައި 50 ކްރޯޑް ރުޕީސް އަށް ވުރެ ބޮޑު އާމްދަނީއެއް ލިބުމަކީ ބޮޑު ކާމިޔާބީއެކެވެ. އަދި ކުރިއަށް އޮތް ހަފުތާއެއްހާ ދުވަސް ތެރޭގައި މި ފިލްމަށް 100 ކްރޯޑް ރުޕީސް ލިބޭނެ ކަމަށް މިހާރު ވަނީ ލަފާކޮށްފަ އެވެ.
ދުނިޔޭގެ ބޮކްސް އޮފީހުގައި މި ފިލްމަށް މިހާތަނަށް ވަނީ 82.8 ކްރޯޑް ރުޕީސް (9.8 މިލިއަން ޑޮލަރު)ގެ އާމްދަނީއެއް ލިބިފަ އެވެ.
އެ އާމްދަނީއާ އެކު މި ފިލްމު ވާނީ މިފަހުން ނުކުތް އަޖޭގެ އެންމެ ކާމިޔާބު ފިލްމަށެވެ. މިދިޔަ އަހަރު ނުކުތް އަޖޭގެ ފިލްމު "ބޯލާ" ވަނީ ބޮކްސް އޮފީހުގައި ނާކާމިޔާބުވެފަ އެވެ. ނަމަވެސް 2022 ވަނަ އަހަރު ނުކުތް އޭނާގެ ފިލްމު "ދުރިޝްޔަމް 2" އަށް ވަނީ އިންޑިއާގެ ބޮކްސް އޮފީހުގައި އެކަނި ވެސް 200 ކްރޯޑް ރުޕީސް އަށް ވުރެ ބޮޑު އާމްދަނީއެއް ލިބިފަ އެވެ.
އަޖޭއާ އެކު އާރު މަދަވަން އަދި ޖިޔޮތިކާ ލީޑު ރޯލު ކުޅޭ "ޝައިތާން"ގައި ދައްކަނީ އާދަޔާ ހިލާފު ބާރުތަކެއް ލިބިފައިވާ މީހަކު އާއިލާއެއް ގެއެއްގެ ތެރޭގައި ރަހީނުކޮށް ހިންގާ ރޫހާނީ ކަންތައްތަކެކެވެ. މި ފިލްމަކީ މިދިޔަ އަހަރު ނުކުތް އިންޑިއާގެ ގުޖުރާތުގެ ފިލްމެއް ކަމަށްވާ "ވަޝް"ގެ ހިންދީ ރީމޭކެވެ.
މި ފިލްމުގެ ޑައިރެކްޓަރު "ސުޕަ 30" އާއި "ކުއީން" ކަހަލަ ފިލްމުތައް ޑައިރެކްޓުކުރި ވިކާސް ބާލް އެވެ.
"ޝައިތާން" ޕްރޮޑިއުސްކޮށްފައި ވަނީ ޖިއޯ ސްޓޫޑިއޯސް އާއި ދޭވްގަން ފިލްމްސް އަދި ޕެނަރަމާ ސްޓޫޑިއޯސްގެ ބެނާތަކުގެ ދަށުން އަޖޭ ދޭވްގަން އާއި ޖިއޮތީ ދޭޝްޕަންޑޭ އާއި ކުމާރު މަންގަތު ޕާޓަކް އަދި އަބިޝެކް ޕާޓަކް އެވެ.