އަބްދުއްރަހީމް، އިބޫ އަށް: އަޅުގަނޑުމެން އަނިޔާވެރިއެއް ނުވާނަން، އެކަމަކު އިންސާފުވެރިވާނަން

އެމްޑީޕީގެ ސަރުކާރުން ދޫކޮށްފައިވާ ގޯއްޗާއި ފްލެޓުތަކާ ގުޅޭގޮތުން ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ދައްކަވާ ވާހަކަފުޅުތަކަށް ރައީސް ޑރ. މުހައްމަދު މުއިއްޒުގެ ސްޕެޝަލް އެޑްވައިޒަރު، އަބްދުއްރަހީމް އަބްދުﷲ މިރޭ ރައްދު ދެއްވައިފި އެވެ.

މިހާރު ކަނޑައަޅާފައިވާ ލިސްޓާ އެއްގޮތަށް ގޯއްޗާއި ފްލެޓުތައް ދިނުމަށްޓަކައި، ކުރިއަށް އޮތް ރައްޔިތުން މަޖިލިހުގެ އަޣުލަބިއްޔަތު އެމްޑީޕީ އަށް ލިބުމުގެ މުހިއްމުކަން ފާހަގަ ކުރައްވައި އިބޫ ވިދާޅުވެފައި ވަނީ އެ އަޣުލަބިއްޔަތު އެ ޕާޓީ އަށް ލިބިއްޖެ ނަމަ ވަކި މުއްދަތެއްގެ ތެރޭގައި ފްލެޓުތަކުގެ މައްސަލަ ހައްލު ކޮށްދީ، ގޯއްޗާއި ފްލެޓު ހަވާލުކޮށްދޭނެ ކަމަށެވެ.

މަޖިލިސް އިންތިހާބުގައި ސަރުކާރަށް އަޣުލަބިއްޔަތު ލިބިއްޖެ ނަމަ ގޯތި ލިބިފައި ތިބި މީހުން އަތުން ގޯތިތައް އަތުލައި، ސަރުކާރުން ބޭނުންވާ މީހުންނަށް ބަހަލާނެ ކަމަށް ވެސް އިބޫ ވަނީ ވިދާޅުވެފަ އެވެ.

އަންނަ މަހުގެ 21 ގައި ބާއްވާ ރައްޔިތުންގެ މަޖިލިހުގެ އިންތިހާބުގައި ޕީޕީއެމް/ޕީއެންސީގެ ޓިކެޓުގައި އައްޑޫ ހުޅުދޫ ދާއިރާ އަށް ވާދަ ކުރައްވާ މުހައްމަދު ޝާހިދު (ޝާޑު)ގެ ކެމްޕެއިން ޖަގަހަ ހުޅުވުމަށް މިރޭ ބޭއްވި ޖަލްސާގައި އިބޫގެ އެ ވާހަކަތަކަށް ރައްދު ދެއްވަމުން އަބްދުއްރަހީމް ވިދާޅުވީ، އަމިއްލަ ލިސްޓަކަށް ފްލެޓްތަކާއި ގޯތިތައް ބަހާލީ ކޮން ބޭފުޅެއްކަން ރައްޔިތުންނަށް ސާފުވާ ކަމަށެވެ.

"ރައީސް ޑރ. މުހައްމަދު މުއިއްޒު ވިދާޅުވަނީ ސަރުކާރުން ރައްޔިތަކަށް ދީފައި އޮތް އެއްޗެއް އަތުނުލައްވާނަމޭ. އެ ދެއްވި ތަނަކު އެ ދެއްވި އެއްޗެއް ރައްޔިތުންނަށް ފޯރުކޮށްދެއްވާނަމޭ،" ރައީސް މުއިއްޒުގެ އެންމެ އަރިސް ބޭފުޅުންގެ ތެރޭގައި ހިމެނިވަޑައިގަންނަވާ ފޮނަދޫ ދާއިރާގެ ކުރީގެ މެމްބަރު އަދި ކުރިއަށް އޮތް މަޖިލިސް އިންތިހާބުގައި ވެސް އެ ދާއިރާ އަށް ނުކުންނަވާފައިވާ އަބްދުއްރަހީމް ވިދާޅުވި އެވެ.

ރައީސް، ޑރ. މުހައްމަދު މުއިއްޒު އާއި އަބްދުއްރަހީމް، ޕީއެންސީގެ ޖަލްސާއެއްގައި.-- ފޮޓޯ: ފާޔަޒް މޫސާ / މިހާރު

މި ސަރުކާރުން މަޖިލީހުގެ މެޖޯރިޓީ ހޯދުމަށް މަސައްކަތް ކުރަނީ މި ގައުމުން އަނިޔާވެރިކަން ނައްތާލައި، ވައްކަން ކޮށްފައިވާ މީހުންގެ ވައްކަންތައް ބަލައި އެ ކަންކަމަށް އިންސާފު ހޯދައި ދިނުމަށް ކަމަށް އަބްދުއްރަހީމް ވިދާޅުވި އެވެ.

"ގާނޫނީ އިމުގެ ތެރެއިން އެ ކަމަށް އިންސާފު ހޯދަންވެގެން މި އުޅެނީ. އަޅުގަނޑުމެން އަނިޔާވެރިއެއް ނުވާނަން، އެކަމަކު އަޅުގަނޑުމެން އިންސާފުވެރިވާނަން،" އޭނާ ވިދާޅުވި އެވެ.

މީގެ ފަސް އަހަރު ކުރިން އިބޫ ވެރިކަމަށް ގެނައީ ރައްޔިތުންގެ ފުރިހަމަ ތާއީދާ އެކު ނަމަވެސް އެ މަނިކުފާނު ވަނީ ރައްޔިތުންނަށް ޣައްދާރު ވެފައި ކަމަށް އަބްދުއްރަހީމް ވިދާޅުވި އެވެ.

ދިވެހި ތާރީހަށް ބަލާއިރު ރާއްޖެ އަށް އެންމެ ބޮޑަށް ޣައްދާރުވީ ހަސަން ރަސްގެފާނު ކަމަށާއި އެކަމަކު، ކުރީގެ ރައީސް އިބޫ ވަނީ އެ އަށް ވުރެ މާ ބޮޑަށް ގައުމަށް ޣައްދާރު ވެފައި ކަމަށް އަބްދުއްރަހީމް ވިދާޅުވި އެވެ.

"މި އިބްރާހިމް މުހައްމަދު ސޯލިހު ގައުމަށް ޣައްދާރުވީ ވެރިކަމުގައި ހުރެގެން،" އޭނާ ވިދާޅުވި އެވެ.

އަބްދުއްރަހީމް ވިދާޅުވި އެކަން ތަކުރާރު ކުރަން ދެން ދޫ ނުކުރައްވާނެ ކަމަށެވެ.

"އިބްރާހިމް މުހައްމަދި ސޯލިހު ކަހަލަ އަނިޔާވެރިންނަކަށް މި ގައުމުގެ ފަސްގަނޑަކުން ޖާގައެއް ނުދޭނަމޭ. ވަރަށް ކެރިގެން މި ވާހަކަ މި ދައްކަނީ. ނުދޭނަމޭ. ބޭނުންހާ ގޮތަކަށް މި ގައުމަކު ނޫޅެވޭނޭ. މިއީ ދިވެހި ރައްޔިތުންގެ ގައުމެކޭ، މިއީ އިބްރާހިމް މުހައްމަދު ސޯލިހުގެ އެކަނި ގައުމެއް ނޫނޭ. އެމްޑީޕީގެ އެކަނި ގައުމެއް ވެސް ނޫނޭ، ޕީއެންއެފްގެ އެކަނި ގައުމެއް ވެސް ނޫނޭ،" އަބްދުއްރަހީމް ވިދާޅުވި އެވެ.

"އަޅުގަނޑުމެންނަށް ރައްދު ދޭން ކެރޭނެ ކޮންމެ މީހަކަށް ވެސް، އެއީ އަޅުގަނޑުމެން މި ވަކާލާތު ކުރަނީ ދިވެހި ރައްޔިތުންގެ ހައްގުގައި ކަމަށް ވާތީ."

Sarukaarah Majilis majority libijje nama, flat list olhaalaane: Ibu

The most trusted news source in the Maldives

Mihaaru

އަބްދުއްރަހީމް ވިދާޅުވި ގޮތުގައި، އެމްޑީޕީގެ ސަރުކާރުން "ދިވެހި ދައުލަތުގެ ހަޒާނާ ދޮވެލީ" އެންމެންގެ ކުރިމަތީގަ އެވެ. އަދި ދައުލަތުގެ ރިޒާވުގައި ހުރި 900 އެއްހާ މިލިއަން ޑޮލަރަށް ވީ ގޮތެއް ވެސް ނޭނގުނު ކަމަށް އޭނާ ވިދާޅުވި އެވެ.

"އިބްރާހިމް މުހައްމަދު ސޯލިހު އަށް ދަންނަވަން، ވަޑައިގަންނަވާށޭ އަޅުގަނޑުމެންނާ އެކީގައި އެއް ޕޯޑިއަމެއްގައި، ކައިރީގައި ޕޯޑިއަމެއް ބަހައްޓައިގެން މި ވާހަކަ ދައްކާލަން. ނިކަން ރަނގަޅަށް ޖަދަލު ކޮށްލަން. މި ގައުމުގެ ހައްގުގައި، ރައްޔިތުންގެ ހައްގުގައި މި ގައުމުގެ މިނިވަން ކަމަށްޓަކައި އިބްރާހިމް މުހައްމަދު ސޯލިހާ ޖަދަލު ކުރަން އަޅުގަނޑު އެކަނި ވެސް ނުކުންނަން މި ހުރީ ތައްޔާރަށް،" އަބްދުއްރަހީމް ވިދާޅުވި އެވެ.

ރައީސް މުއިއްޒު ވެސް ރޭ ވަނީ އިބޫ އަށް ވަރަށް ބޮޑަށް ފާޑުވިދާޅުވެފަ އެވެ. އެ މަނިކުފާނު ވިދާޅުވީ ފަސް އަހަރެއްގައި ރައީސުލްޖުމްހޫރިއްޔާގެ މަގާމު އަދާކުރަން ލިބުމަކީ ހިތްޕުޅަށް އަރާވަޑައިގަންނަވާ ގޮތަކަށް އިތުރުފުޅު ހަދަން ލިބޭ ލައިސެންސެއް ނޫން ކަމަށެވެ. އެ އަށް ވުރެ އިހުލާސްތެރި އަދި ތެދުވެރިވާން ޖެހޭނެ ކަމަށް އެ މަނިކުފާނު ވިދާޅުވި އެވެ.