އިންޑިއާގެ ސިފައިންގެ ފަހު ބެޗު މި މަހު 10 ގެ ކުރިން ފުރާނެ ކަމުގެ ޔަގީންކަން ދީފި

ރާއްޖޭގައި ތިބި އިންޑިއާގެ ސިފައިންގެ ފަހު ބެޗު، ދެ ގައުމުން ކުރިން އެއްބަސްވެފައިވާ ގޮތަށް މި މަހުގެ 10 ގައި ރާއްޖެ ދޫކޮށް ދާނެ ކަމުގެ ޔަގީންކަން ދެ ގައުމުގެ އިސްބޭފުޅުން ދެއްވައިފި އެވެ.

ރާއްޖެ އާއި އިންޑިއާއާ ދެމެދު ބާއްވާ ހައި-ލެވެލް ކޯ ގްރޫޕްގެ ހަތަރު ވަނަ ބައްދަލުވުން އިންޑިއާގެ ވެރިރަށް ނިއު ދިއްލީގައި ބޭއްވުމަށް ފަހު މިއަދު ރާއްޖޭގެ ފޮރިން މިނިސްޓްރީން ނެރުނު ނޫސްބަޔާނެއްގައި ބުނީ އެ ބައްދަލުވުމުގައި ކުރެވުނު މަޝްވަރާތަކުގައި ދެ ފަރާތުން ވެސް ދެ ގައުމުގެ ދެމެދުގައި މިހާރު އޮތް ހާރިޖީ ގުޅުމާ ބެހޭ ގޮތުން ވާހަކަދެއްކި ކަމަށެވެ.

ތަރައްގީ އާއި ދިފާއީ ދާއިރާއިން ދެ ގައުމުގެ ގުޅުން ބަދަހިކުރުމާއި ގުޅޭ ގޮތުން ވެސް، އެ ބައްދަލުވުމުގައި ދެ ގައުމުގެ ދެމެދުގައި މަޝްވަރާ ކުރި ކަމަށް އެ ބަޔާނުގައި ބުންޏެވެ.

ފޮރިން މިނިސްޓްރީން ބުނީ ރާއްޖޭގައި އިންޑިއާ ސިފައިން ތިބި ތިން ސަރަހައްދުގެ ތެރެއިން އެންމެ ފަހު ސަރަހައްދުގައި ތިބި ސިފައިންގެ މި މަހުގެ 10 ވަނަ ދުވަހުގެ ކުރިން ފޮނުވާލައި އެ މީހުންގެ ބަދަލުގައި މަދަނީ މީހުން ގެންނާނެ ކަމަށެވެ. އަދި ލޮޖިސްޓިކަލް ހުރިހާ އިންތިޒާމެއް ވެސް ޝެޑިއުލާ އެއްގޮތަށް ކުރިއަށް ގެންދާ ކަމަށް މިނިސްޓްރީން ބުންޏެވެ.

ރާއްޖެ އާއި އިންޑިއާއާ ދެމެދު ބާއްވާ ހައި-ލެވެލް ކޯ ގްރޫޕްގެ ފަސްވަނަ ބައްދަލުވުން އަންނަ މަހު ނުވަތަ ޖުލައި މަހު ބާއްވަން އެއްބަސްވެފައިވާ ކަމަށް ވެސް މިނިސްޓްރީން ބުންޏެވެ.

ބާކީ ތިބި އިންޑިއާގެ ސިފައިން މި މަހު 10 ގައި އަނބުރާ ފޮނުވާލާއިރު، ފޮރިން މިނިސްޓަރު މޫސާ ޒަމީރު ރަސްމީ ދަތުރެއްގައި މި މަހު 9 ގައި އިންޑިއާ އަށް ވަޑައިގަންނަވާ ގޮތަށް ވަނީ ހަމަޖައްސަވައިފަ އެވެ. މިއީ ރައީސް ޑރ. މުހައްމަދު މުއިއްޒު މިދިޔަ ނޮވެމްބަރު މަހުގެ 17 ވަނަ ދުވަހު މަގާމުގެ ހުވާކުރެއްވި ފަހުން މި ސަރުކާރުގެ އިސްބޭފުޅަކު އިންޑިއާ އަށް ކުރައްވާ ފުރަތަމަ ރަސްމީ ދަތުރެވެ.

Foreign Minister Zameer anna hafthaagai India ah

The most trusted news source in the Maldives

Mihaaru

ރާއްޖެ އަށް އިންޑިއާ އިން ހަދިޔާ ކޮށްފައިވާ ދެ ހެލިކޮޕްޓަރާއި ޑޯނިއާ މަތިންދާބޯޓު ދުއްވަން ގެނެސްފައި ތިބި އިންޑިއާގެ ސިފައިން ބޭލުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. ދެ ގައުމުން އެކަމާ މެދު ފުޅާ ދާއިރާއެއްގައި މަޝްވަރާކޮށް، އެއްބަސްވުމެއްގައި ސޮއިކޮށްފައި ވަނީ އިންޑިއާގެ ސިފައިންގެ ބަދަލުގައި އެ ތިން އުޅަނދު ދުއްވަން ތިބޭނީ އެ ގައުމުގެ ސިވިލިއަނުން ކަމަށެވެ. އެހެންވެ، ބާލަމުންދާ އިންޑިއާ ސިފައިންގެ ބަދަލުގައި މިހާރު ގެނެސްފައި ވަނީ އިންޑިއާގެ ސިވިލިއަނުންނެވެ.

ރައީސް ވިދާޅުވެފައިވާ ގޮތުގައި، އިންޑިއާ އިން ހަދިޔާ ކޮށްފައިވާ ތިން އުޅަނދު ދުއްވަން އެ ގައުމުގެ ސިވިލިއަނުން ގެންނަނީ ވަކި މުއްދަތަކަށެވެ. އަދި އެއީ ދާއިމީ ބައެއް ނޫނެވެ.

އިންޑިއާ ސިފައިންގެ ފުރަތަމަ ބެޗު ރާއްޖެ ދޫކޮށް ދިޔައީ މިދިޔަ މާޗު މަހުގެ ކުރީކޮޅެވެ. އަދި ދެވަނަ ބެޗު ފުރީ މިދިޔަ މަހު އެވެ.