ޓޫރިޒަމް ގާނޫނުގެ ބިލްގެ ބަހުސާއި ކޮމިޓީގެ މަސައްކަތް އެއް ދުވަހުން ނިންމާލައިފި

ޓޫރިޒަމާ ބެހޭ ގާނޫނަށް އިސްލާހު ގެންނަ ބިލްގެ ބަހުސާއި ކޮމިޓީގެ މަސައްކަތް ރައްޔިތުންގެ މަޖިލިހުން އެއް ދުވަހުން ނިންމާލައިފި އެވެ.

ޓޫރިސްޓް ރިސޯޓުތައް ހެދުމަށް ދޫކޮށްފައިވާ ރަށްތަކާއި ބިންތަކުގެ މުއްދަތު އިތުރުކުރަން ފީ ދެއްކުމުގެ މުއްދަތަށް ބަދަލުތަކެއް ގެންނަން ޓޫރިޒަމާ ބެހޭ ގާނޫނަށް ސަރުކާރުގެ ފަރާތުން އިސްލާހު ހުށަހެޅުއްވީ ދަނގެތި ދާއިރާގެ ޕީއެންސީގެ މެންބަރު އަބްދުﷲ ރަޝީދެވެ.

ބިލްގެ ފުރަތަމަ ކިޔުން މިދިޔަ އަންގާރަ ދުވަހު އިއްވުމަށް ފަހު، ބިލްގެ އިބްތިދާއީ ބަހުސް ފެށީ މިއަދެވެ. އާންމުކޮށް ރައްޔިތުންގެ މަޖިލީހުގެ ޖަލްސާތައް ބުރާސްފަތި ދުވަހު ބާއްވާ ގޮތަށް ކަނޑައަޅާފައި ނެތް ނަމަވެސް، މިއަދަށް މަޖިލީހުގެ ޖަލްސާއެއް އެޖެންޑާ ކުރީ ވެސް ހަމައެކަނި އެ ބިލްގެ މަސައްކަތް ކުރިއަށް ގެންދާށެވެ.

އެ ބިލާ މެދު ގަޑިއެއްހާއިރު ވަންދެން މެމްބަރުން މިއަދު ބަހުސް ކުރެއްވި އެވެ. އެ މެމްބަރުން ވަނީ ޓޫރިޒަމް ގާނޫނަށް އިސްލާހު ގެނައުމުގެ ބިލްގެ މުހިންމު ކަމާއި ބިލްގެ މަސައްކަތް އަވަސް ކުރަންޖެހޭ ކަމަށް ވިދާޅުވެފަ އެވެ.

ބަހުސަށް ފަހު، ނެގި ވޯޓުގައި ބައިވެރިވެވަޑައިގެންނެވި 75 މެމްބަރުން އެ ބިލް ބަލައިގަތުމަށް ވޯޓު ދެއްވި އެވެ. އޭގެ ފަހުން ބިލް ވަނީ މުޅި މަޖިލީހުގެ ކޮމިޓީއަށް ފޮނުވައިފަ އެވެ.

ޖަލްސާ ނިންމާލުމަށް ފަހު، މަޖިލީހުގެ ރައީސް އަބްދުއްރަހީމް އަބްދުﷲ ރިޔާސަތުގައި އިންނަވައި މުޅި މަޖިލީހުގެ ކޮމިޓީގެ ބައްދަލުވުން ފެއްޓެވި އެވެ. ކޮމިޓީ ފެށުމާ އެކު، ފުނަދޫ ދާއިރާގެ ޕީއެންސީގެ މެމްބަރު މުހައްމަދު މަމްދޫހު ހުށަހެޅުއްވީ ބިލަށް ދެން އިތުރަށް ބަހުސް ކުރުމެއް ނެތި އަދި އިސްލާހުތަކެއް ވެސް ނުގެނެސް ކޮމިޓީން ފާސްކުރާށެވެ.

އޭނާގެ އެ ހުށަހެޅުއްވުމަށް ޕީއެންސީގެ އެހެން ބައެއް މެންބަރުން ތާއިދު ކުރެއްވި އެވެ.

ނަމަވެސް އިދިކޮޅު އެމްޑީޕީގެ ޕީޖީ ލީޑަރު ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވަނީ މި ބިލްގެ މަސައްކަތް އެހާ އަވަސް އަރުވާލައިގެން ކުރިއަށް ގެންދާ ސަބަބާ ގުޅޭ ގޮތުން ސުވާލު ކުރައްވައިފަ އެވެ. ނާޒިލް ވިދާޅުވީ ވަރަށް އަވަސްކޮށް ބިލްގެ މަސައްކަތް ކުރިއަށް ގެންދާ މަގުސަދު އެނގެން ބޭނުންވާ ކަމަށާއި އަދި މި ބިލްގެ ސަބަބުން މުސްތަގުބަލަށް ކުރާނެ ހެޔޮ އަސަރަކީ ކޮބައިކަން ސާފުވާން ވެސް ބޭނުންވާ ކަމަށެވެ.

ނާޒިލްގެ އެ ސުވާލަށް އަބްދުއްރަހީމް ޖަވާބެއް ނުދެއްވި އެވެ. އޭނާ ވިދާޅުވީ އެ ސުވާލަށް ޖަވާބު ދެއްވަން ޖެހޭ ކަމަށް ގަބޫލުފުޅު ނުކުރައްވާ ކަމަށާއި ބިލާ މެދު ބަހުސްކޮށް، އިސްލާހު ހުށަހެޅުމުގެ ފުރުސަތު މެންބަރުންނަށް އޮންނާނެ ކަމަށެވެ.

އޭގެ ފަހުން ވާހަކަ ދައްކަވަމުން މައްޗަންގޮޅި އުތުރު ދާއިރާގެ ޕީއެންސީގެ މެންބަރު އިބްރާޙީމް މުހައްމަދު ވިދާޅުވީ ޓޫރިޒަމް ގާނޫނުގެ ބިލްގެ މަސައްކަތް އަވަސް ވެގެން ކަންބޮޑުވާ މީހުންނަކީ ޓޫރިޒަމް އިންވެސްޓްމެންޓާ ދެކޮޅަށް މަސައްކަތް ކުރާ މީހުން ކަމަށެވެ.

ކޮމިޓީގެ ބަހުސަށް ފަހު، އެ ބިލް އޮތް ގޮތަށް އެއްވެސް އިސްލާހެއް ނުގެނެސް މަޖިލީހުގެ ތަޅުމަށް ފޮނުވަން މުޅި މަޖިލީހުގެ ކޮމިޓީގައި ބައިވެރިވެވަޑައިގެންނެވި 76 މެންބަރުން ވޯޓު ދެއްވި އެވެ.

ޓޫރިޒަމާ ބެހޭ ގާނޫނަށް ގެންނަ އިސްލާހު

ޓޫރިޒަމްގެ ގާނޫނުގައި މިހާރު އޮންނަ ގޮތުން ޓޫރިސްޓް ރިސޯޓެއް ހެދުމަށް ދޫކޮށްފައިވާ ރަށެއްގެ ނުވަތަ ބިމެއްގެ މުއްދަތު އިތުރުކޮށް ދެވޭނީ އެ ރިސޯޓެއް ދޫކުރާ ތާރީހުން ފެށިގެން 50 އަހަރަށް ވުރެ އިތުރު ނުވާނެ ގޮތެއްގެ މަތިންނެވެ. އެ އަށް ވުރެ މުއްދަތު އިތުރު ކުރެވޭނީ ދެ އަހަރު ދުވަސް ތެރޭގައި ފައިސާ ދައްކައި ނިންމަން އެއްބަސްވާ ނަމަ އިތުރުކުރާ ކޮންމެ އަހަރަކަށް 100،00 އެމެރިކާ ޑޮލަރު ދެއްކުމުންނެވެ.

އަދި ދެ އަހަރު ދުވަހުގެ މުއްދަތަށް ފަހު ފައިސާ ދައްކައި ނިންމަން އެއްބަސްވާ ނަމަ މުއްދަތު އިތުރުކުރާ ކޮންމެ އަހަރަކަށް 200،000 އެމެރިކާ ޑޮލަރު ދެއްކުމުންނެވެ. އޭގެ އިތުރުން ދެ އަހަރު ތެރޭގައި ފަސް މިލިއަން ޑޮލަރު އެއްފަހަރާ ދައްކަން މިހާރު ޖެހެ އެވެ. ނަމަވެސް ސަރުކާރުގެ ފަރާތުން ދަނގެތި ދާއިރާގެ މެންބަރު އަބްދުﷲ ރަޝީދު ހުށަހެޅުއްވި އިސްލާހުގައި އެ މާއްދާ ބަދަލުކުރަން ވަނީ ހުށަހަޅައިފަ އެވެ.

އިސްލާހުގައިވާ ގޮތުން:

- ހަ މަސް ދުވަހުގެ ތެރޭގައި ފައިސާ ދައްކާ ހަލާސްކުރަން އެއްބަސްވާ ނަމަ މުއްދަތު އިތުރު ކުރާ ކޮންމެ އަހަރަކަށް 100،000 ޑޮލަރު ދެއްކުން

- ހަ މަސް ދުވަހަށް ފަހު ފައިސާ ދައްކާ ހަލާސްކުރަން އެއްބަސްވާ ނަމަ މުއްދަތު އިތުރުކުރާ ކޮންމެ އަހަރަކަށް 200،000 އެމެރިކާ ޑޮލަރު ދެއްކުން.

މިހާރު ގާނޫނުގައި އޮތްގޮތުން ކުއްޔަށް ހިފާފައިވާ ފަރާތުން ސަރުކާރަށް ދައްކަންޖެހޭ އެއްވެސް ކުއްޔެއް ނުވަތަ ޖޫރިމަނާއެއް ނުވަތަ ޓެކުހެއް ނުވަތަ ފީއެއް ނެތް ނަމަ 49 އަހަރު ދުވަހަށް އިތުރު ކުރެވިދާނެ އެވެ.

ގާނޫނު އޮންނަ ގޮތުން ފުރަތަމަ ދެ އަހަރު ދުވަހުގެ ތެރޭގައި މުއްދަތު އިތުރު ކުރުމުގެ ފީއެއްގެ ގޮތުގައި 5،000،000 ޑޮލަރު އެކީ އެއްފަހަރާ ދެއްކުމަށް ލާޒިމުވެ އެވެ. އަދި 99 އަހަރަށް މުއްދަތު އިތުރުކުރަން ހުށަހަޅާ ފަރާތްތަކަށް މުއްދަތު އިތުރު ކުރުމުގެ ފީއެއްގެ ގޮތުގައި 10 މިލިއަން ޑޮލަރު އެއްފަހަރާ ދައްކަން މިހާރު ޖެހެ އެވެ.

އެ މުއްދަތު ވެސް އިސްލާހު ކުރަން ވެސް ހުށަހަޅާފައިވެ އެވެ. އިސްލާހު ހުށަހަޅާފައިވަނީ ހަ މަސް ތެރޭގައި ފަސް މިލިއަން ޑޮލަރު އެކީ އެއްފަހަރާ ދައްކަން ޖެހޭނެ ގޮތަށް ހެދުމަށެވެ. އަދި ހަ މަސް ދުވަހަށް ފަހު ދައްކާނަމަ ފީއެއްގެ ގޮތުގައި 10 މިލިއަން ޑޮލަރު އެއްފަހަރާ ދައްކަންޖެހޭ ގޮތަށް ހެދުމަށް ހުށަހަޅާފައިވެ އެވެ.