ކުރީގެ ރައީސް އަބްދުﷲ ޔާމީން ހައްޔަރު ކުރުމަށް ސައްހަ ނޫން ކޯޓު އަމުރެއް ނެރުމާ ގުޅޭގޮތުން ފުލުހުން ކޮށްފައިވާ ތަހުގީގު ރިޕޯޓެއް ކަމަށް ބުނެ ސައްހަ ނޫން ރިޕޯޓެއް އުފެއްދި މައްސަލަ ފުލުހުން ތަހުގީގު ކުރަން ފަށައިފި އެވެ.
ފުލުހުން މިއަދު ނެރުނު ބަޔާނެއްގައި ބުނީ 2016 ވަނަ އަހަރު ޔާމީން ހައްޔަރު ކުރަން ފުލުހުން ނެރުނު ތަހުގީގު ރިޕޯޓު ކަމަށް ބުނެ ސޯޝަލް މީޑިއާގައި ދައުރު ކުރަނީ ސައްހަ ރިޕޯޓެއް ނޫން ކަމަށެވެ.
މި ސަރުކާރުގެ ބައެއް ވެރިންނަށް ތުހުމަތުކޮށް އެ ރިޕޯޓް ސޯޝަލް މީޑިއާގެ އިތުރުން ޔާމީން އިސްވެ ހުންނަވައިގެން އުފެއްދެވި ޕީއެންއެފްގެ ބައެއް ޖަލްސާތަކުގައި ވެސް ދައްކާފައިވެ އެވެ.
ފުލުހުން ނެރުނު ބަޔާނުގައިވަނީ އެ ރިޕޯޓުގައި ބޭނުން ކޮށްފައިވާ ހެޑާ އާއި ފުލުހުންގެ ލިޔެކިޔުންތަކުގައި ބޭނުން ކުރާ ހެޑާ ދިމާނުވާ ކަމަށެވެ.
އޭގެ އިތުރުން އޭރުގެ އެކްޓިން ކޮމިޝަނާ އޮފް ޕޮލިސް އަބްދުﷲ ނަވާޒްގެ ނަމުގައި ބޭނުން ކޮށްފައިވަނީ ފުލުހުންގެ ތަރުޖަމާނު އަދި އެސިސްޓަންޓް ކޮމިޝަނާ އޮފް ޕޮލިސް އަހުމަދު ޝިފާންގެ ސޮއި ކަމަށާއި އެ ސޮއި ބޭނުންކުރީ ފޯޖް ކޮށްގެން ކަމަށް ފުލުހުންގެ ބަޔާނުގައިވެ އެވެ.
ފުލުހުންގެ ރަސްމީ ލިޔެކިޔުންތަކުގައި ބޭނުން ކުރާ ފޯމެޓް ކޮޕީ ކޮށްގެންނާއި ބައެއް އިސްވެރިންގެ ސޮއި ފޯޖްކޮށްގެން ސައްހަ ނޫން ރިޕޯޓު ދައުރުކުރާ މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރާ ކަމަށް ފުލުހުންގެ ބަޔާނުގައިވެ އެވެ.
މީގެ އިތުރުން އޭސީސީގެ ނަމުގައި ސައްހަ ނޫން ތަހުގީގު ރިޕޯޓެއް ދައުރު ކުރާ މައްސަލައެއް ވެސް އެ ކޮމިޝަންގެ ފަރާތުން ހުށަހަޅާފައިވާ ކަމަށް ފުލުހުން ބުންޏެވެ.
މި ދެ މައްސަލަ ވެސް ތަހުގީގު ކުރަމުން އަންނަ ކަމަށާއި އެފަދަ ކަންކަމުން ބައިވެރިނުވާން އެދޭ ކަމަށް ފުލުހުން ބުންޏެވެ.
