ޓޮމް އާއި ޒެންޑަޔާ އަންނަ އަހަރު ކައިވެނިކުރަނީ

އިނގިރޭސި އެކްޓަރު ޓޮމް ހޮލެންޑާއި އެމެރިކާގެ އެކްޓްރެސް ޒެންޑަޔާ އަންނަ އަހަރު ކައިވެނިކުރަން ނިންމާފައިވާ ކަމަށް ރިޕޯޓްތައް ބުނެފި އެވެ.

ޓޮމް އާއި ޒެންޑަޔާގެ އާއިލާއާ ގާތް މީހަކާ ހަވާލާދީ "ލައިފް އެންޑް ސްޓައިލް" މެގަޒިންގައި ބުނީ އެ ދެ ތަރިންގެ ކައިވެނީގެ ވާހަކަ އާއިލާގެ ތެރޭގައި ދެކެވެމުން އަންނަތާ މިހާރު ދުވަސްތަކެއް ވެއްޖެ ކަމަށެވެ. އަދި އެ ކައިވެންޏަށް ދެ އާއިލާއިން ވެސް މިހާރު ތައްޔާރުވަމުން އަންނަ ކަމަށް ބުންޏެވެ.

އެ ދެ މީހުން ލޯބީ ގޮތުން ގުޅުނީ މާވެލްގެ ސުޕަހީރޯ ފިލްމު "ސްޕައިޑަމޭން"ގައި ކޯ-ސްޓާރުންގެ ގޮތުގައި މަސައްކަތްކުރަން ފެށިތާ ވެސް އެތައް ދުވަހެއްވީ ފަހުންނެވެ. އެ ދެމީހުން ރައްޓެހިވެގެން އުޅޭ ކަމަށް އޭރު އަޑު ފެތުރި ނަމަވެސް، އެކަން ދޮގުކޮށް ބުނަމުން އައީ ދެމީހުންނަކީ ވަރަށް ގާތް ރަށްޓެހިން ކަމަށެވެ.

ޓޮމް އާއި ޒެންޑަޔާ ލޯބީގެ ގޮތުން ގުޅިގެން އުޅޭކަން ކަށަވަރުވީ ޖުލައި 2021 ގަ އެވެ. އޭގެ ފަހުން، ދެމީހުން ވެސް ވަނީ އިންސްޓަގްރާމްގައި އެކަކު އަނެކެއްގެ ލޯބި ޕޯސްޓުތައް ކޮށްފަ އެވެ.

"ސްޕައިޑަމޭން"ގެ ތިން ފިލްމުގައި ވެސް ޓޮމްއާ އެކު ޒެންޑަޔާ މަސައްކަތްކުރި އެވެ.