އިޒްރޭލުން ލުބްނާންގެ ވެރިރަށް ބައިރޫތުގައި ހަމަލާ ދިން ތަނެއް: އިއްޔެ ވަނީ ލުބްނާނަށް ދިން ހަމަލާތަކުގެ އަދަދު ހާހަކަށްވުރެ މަތި. -- ފޮޓޯ: އޭއެފްޕީ
24 ސެޕްޓެމްބަރ 2024 - 06:38
2 comments
ލުބްނާންގައި ހިޒްބުﷲ ޖަމާއަތުގެ ބާރު އޮންނަ ސަރަހައްދުތަކަށް އިއްޔެ ދިން ހަމަލާތަކުގައި މަރުވި މީހުންގެ އަދަދު އެންމެ މަދުވެގެން ވެސް މިހާރު 492 އަށް އަރާފައިވާ ކަމަށްވާ ހެލްތު މިނިސްޓްރީން ބުނެފި އެވެ.
ފަލަސްތީނުގެ ޣައްޒާގައި އިޒްރޭލުން ހިންގަމުންދާ ގަތުލްއާންމުގެ ބަދަލު ހިފަން ހިޒްބުﷲ އިން ބޯޑަރު ހުރަސްކޮށް އިޒްރޭލަށް ދެމުންދާ ހަަމަލާތައް ހުއްޓުވާނެ ކަމަށް ބުނެ އިޒްރޭލުން ދޭން ފެށި ހަމަލާތަކުގައި މަރުވި މީހުންގެ ތެރޭގައި 35 ކުޑަކުދިން ވެސް ހިމެނެ އެވެ.
ޣައްޒާގައި ދެމުންދާ ހަމަލާތައް މުޅި ސަރަހައްދަށް ފެތުރިދާނެ ކަމުގެ ކަންބޮޑުވުން އޮއްވައި ދޭން ފެށި މި ހަމަލާތަކަކީ އިޒްރޭލުގެ ލާއިންސާނީ އަމަލުތައް އިތުރަށް ފުޅާކުރުން ކަމަށް ބުނެ އަރަބި ގައުމުތަކުން ވަނީ އެކަން ކުށްވެރިކޮށްފަ އެވެ.
މިދިޔަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ހަމާސް އިން އިޒްރޭލަށް ހަމަލާދީ ހާހަކަށްވުރެ ގިނަ މީހުން މަރާލުމާ އެކު އިޒްރޭލުން ޣައްޒާއަށް ހަމަލާދޭން ފެށުމުން ހިޒްބުﷲ އިން ވެސް ދިޔައީ އިޒްރޭލަށް ރޮކެޓާއި މިސައިލުން ހަމަލާ ދެމުންނެވެ.
އިޒްރޭލުން ބުނީ އިއްޔެ ލުބްނާންގައި ދިން ހަމަލާތައް އަމާޒުކުރި ހިޒްބުﷲގެ ހަނގުރާމަވެރިންގެ މަގާމުތަކަށް ކަމަށެވެ. މި ހަމަލާތައް 1،600 ތަނަކަށް އަމާޒުކުރި ކަމަށާއި މީގެ ތެރެއިން ބައެއް ހަމަލާތަކަކީ ހިޒްބުﷲގެ ވަކިވަކި މީސްމީހުންނަށް އަމާޒުކޮށްގެން ދިން ހަމަލާތަކެއް ކަމަށް ވެސް ބުންޏެވެ.
އިޒްރޭލުން ލުބްނާނަށް ދެމުންދާ ހަމަލާތަކާ ހެދި އާންމުން ރައްކާތެރި ހިސާބުތަކަށް ދިއުމަށް މަސައްކަތްކުރާއިރު ވެހިކަލްތަކުން މަގުތައް ތޮއްޖެހިފައި. -- ފޮޓޯ: އޭއެފްޕީ
ލުބްނާންގެ ވެރިރަށް ބައިރޫތުގައި "އޮޕަރޭޝަން ނޯތު އެރޯ" ގެ ނަމުގައި އިޒްރޭލުން ހިންގި އޮޕަރޭޝަނެއްގައި ހިޒްބުﷲގެ ތިން ވަނަ އަށް އެންމެ އިސް ކޮމާންޑަރު އަލީ ކަރާކީ އަށް ހަމަލާއެއް އަމާޒުކުރި އެވެ. ހިޒްބުﷲ އިން ބުނީ އޭނާ ސަލާމަތްވި ކަމަށާއި މިހާރު ވަނީ ރައްކާތެރި ހިސާބަކަށް ގެންގޮސްފައިވާ ކަމަށެވެ.
ލުބްނާންގެ ގައުމީ ޓީވީން ބުނި ގޮތުގައި އިޒްރޭލުން ގެންދަނީ އިރުމަތީ ސަރަހައްދުތަކަށް ވެސް ހަމަލާ ދެމުންނެވެ. އަނެއްކޮޅުން ހިޒްބުﷲ އިން ވަނީ އިޒްރޭލުގެ ފަސް ތަނަކަށް ހަމަލާ ދީފައިވާ ކަމަށް ބުނެފަ އެވެ. ހިޒްބުﷲގެ ހަމަލާތަކުން ސަލާމަތްވާން އިޒްރޭލުގެ ހައިފާގައި އާންމުން އުޅޭ މަންޒަރުތައް ފެނިފައިވެ އެވެ.
ލުބްނާނުގެ ހެލްތު މިނިސްޓްރީން ބުނީ އިޒްރޭލުގެ ހަމަލާތަކުގައި 35 ކުޑަކުދިންނާއި 58 އަންހެނުންނާ އެކު 492 މީހުން މަރުވެ 1،645 މީހަކު ޒަހަމްވެފައިވާ ކަމަށެވެ. ހެލްތް މިނިސްޓަރު ފިރާސް އަބިއާދު ވިދާޅުވީ އެތައް ހާސް އާއިލާއެއްގެ ގެދޮރު ގެއްލިފައިވާ ކަމަށެވެ.
ޣައްޒާ އާއި އިޒްރޭލުގެ ދެކުނު ބޯޑަރުން ލުބުނާންގެ އުތުރުގައި ހަމަނުޖެހުންތައް ވަރުގަދަވުމާ އެކު ދުނިޔޭގެ ބާރުތަކުން އިޒްރޭލާއި ހިޒްބުﷲ އިން ހަނގުރާމައާ ދުރުވާން ދަނީ ގޮވާލަމުންނެވެ. -- އޭއެފްޕީ
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މާހިރު
24 September 2024
މިދުނިޔޭގައި މިއޮތީ ޖަންގަލީގެ އުސޫލެވެ. ފަލަސްތީނުގެ ބިންތަކަށް ވެރިވެގަނެ ފަލަސްތީނުގެ ނަސްލު ނައްތާލުމަށް އިސްރާއީލުންދޭ ހަމަލާތައް ޓެރަރިސްޓް ހަމަލާއަށް ނުވެފައި، އޭގެ ބަދަލުގައި އިސްރާއީލަށް ހަމަލާއެއް ދިނުމުން އެއީ ޓެރަރިސްޓް ހަމަލާއަށްވެފައި، އިސްރާއީލާއި އެމެރިކާ ގުޅިގެން އެބައިމީހުން ބޭނުންހާގޮތަކަށް ބޭނުންތަނަކަށް ހަމަލާދީ އެތަނެއްގައި އުޅޭ ކުދިބޮޑު އެންމެން މަރާ މުޅިތަން ސުންނާފަތި ކުރާއިރުވެސް އެންމެން މިތިބެނީ ކުޅިބަލާށެވެ.
ނެތީމޭނެތީމޭ
24 September 2024
އިޒްރޭލުގެ ނިމުންއަންނަނީ މިރާއްޖޭގެ ސިޔާސީ ޕާރޓީ ތަކާއި ވެރިކަން ކުރާ ޕާރޓީ ތަކަށް ނުކުރެއޭ އިޒްރޭލުގެ އަމަލު ތައް ކުށްވެރިކޮށް ހަދާ އަދި އެމެރިކާ އާއި ޔޫރަޕް އިން އިޒްރޭލަށް ފޯރުކޮށްދޭ ހަތިޔާރު އެއްކޮށް ހުއްޓާލަން ގޮވަން ނުކެރިގެން އުޅެނީ ކިއެއްވެތޭ އިސްލާމް ދީނުގައި އޮންނަ ކަމެއް ނޫނޭ މުޝްރިކުން މުސްލިމުންނާއި ދެކޮޅަށް ދޭ ހަމަލާ ތައް ކުށްވެރި ނުކޮޮށް ތިބުމަކީ ސަރުކާރަށް ތިޔާ އުޅެނީ ރަނގަޅަށް ދީން ނޭގިގެންނޭ ބުނަން މަމެން ނެތީމޭ...